Psalms 145

Lugbara (E’yo Siza Alatararu Munguniri BIBLIA)

← Chapter 144 Jump to: Chapter 146 →

1Ma nga mi inzi, Mungu mani, Opi Amboru la, azini ma nga ru mini inzi etuzu ’dani ’dani.

2Ma nga mi inzi etu dria, ma nga mi ru inzi etuzu ’dani ’dani.

3Yehovani ambo, onyiruni ’ba ma inzi eri tu; ’ba econi ambo erini nizaru ku.

4Atipi nga azi mini inzi anzi yini ma tia, yi nga yi dri ’yeta okporu mini ’diyi ece.

5Ma nga asisile dro diza mini opiniri pi ma dria inzita mini pie, ’yeta osutaru mini ’diyi pie dria.

6Te ’ba yi nga ’yeta mini uri fepi ’ba dri ’diyi ma okpo ma e’yo o’yo, azini ma nga ambo miniri ma e’yo olu.

7Yi nga onyi mini amboruri ma e’yo eku azini yi nga e’yo kililiru miniri ngo.

8Yehovani asi ndriza be, eri ga yikisi tre, ’bani adra mbele ku, yiki aleru eriniri amboru tu.

9Yehovani ’ba dria ’ye onyiru, yiki eriniri ovu azi erini ’yele ’diyi vusi dria.

10Azi mini ’yele ’diyi dria nga awa’dia ’yo mi dri, Yehova la, azini ’ba alatararu mini ’diyi nga mi inzi ra!

11Yi nga suru miniri ma diza ma e’yo olu, yi nga okpo mini ma e’yo ’yo,

12’yeta mini amboru ’diyi pi ecezu anzi ’bani dri, suru mini ma diza opiniri be.

13Suru mini eri suru ’dani ’daniri, opi mini nyaleri ovu a’bianzi vusi dria.

14Yehovani ’ba dria e’depi va ’diyi edre, eri ’ba dria avupi va ’diyi enga.

15Mile ’ba driani ovu mi vu mi tezu, mi yi dri nyaka yini fe ewu vusi.

16Mi dri mini anda ra, mi afa idriru ’diyi ma abiri de dria.

17Yehovani onyiru geri erini vusi eri asi ndriza be ’yeta erini vusi dria,

18Yehovani ’ba dria owupi vunia ’diyi vu ogogo, eri ’ba dria owupi vunia asi adarusi ’diyi vu ogogo.

19Eci nga e’yo ’ba eri rupi ’diyini leleri ’ye ra, eri nga wuta yini eri, nga yi opa ra.

20Yehovani ’ba dria eri lepi ’diyi ma ta mba ra; te eri nga ’ba onzi ’diyi dri ja dria.

21Ma tileni nga Yehovani inzi, ’ba rua ari be ’diyi dria ma inzi ru erini alatararuri ’dani ’dani.

← Chapter 144 Jump to: Chapter 146 →

Recommended Reading

Commentary Psalms Commentaries → Devotional Psalms Devotional Guide → Get This Bible Lugbara (E’yo Siza Alatararu Munguniri BIBLIA) Study Bible →