Zephaniah 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Emi oku emi ngulupi, awa’dini emi oku emi tualu, suru ovupi drinza kokoruri la,

2de nga azita efuni ku, de nga o’du nde agani ekile anya drilekole ku, de nga aoko aciru Yehovaniri eceani emi dria ku, de nga o’du adra Yehovanirini ecani emi dria ku indi.

3Emi nda Yehovani, emi ’ba ovupi nyakua asi e’yere be azita erini ma ta mbapi e’yo liza erini be ’diyi dria; emi ada onyi, emi nda asi e’yere moo; i kani yi nga emi ozi o’du nde adra Yehovanirisi ra yani.

4Te yi nga Gazani ku pirini, azini Asikelonini nga ovu andruru; etu agaa yi nga ’ba Asidodia ’diyi dro amve, te yi nga Ekironini nze pi ola be.

5Candi ’ba ripi miri tia ’diyi dri, emi ’ba suru Keretia ’diyi! E’yo Yehovaniri i fu mi be, Kanani angu Filisitiari la! Ma nga mi dri la ra, ’dini ’ba aluni ngani adri mi alia ku.

6Azini angu miri tiari nga ovu iribiru anyapa dri, jo be ’ba kabilo ocepi ’diyini, lico be kabilo o’biru ’diyi dri indi.

7Azini angu miri tiari nga ovu suru Yudani acepi ’diyi dri; yi nga kabilo yini o’biru ’diyi oce alenia ’dale; ondre be yi nga la va jo Asikelonia ’diyi ma alia. Te Yehova Mungu yiniri nga emu yi andri, nga ’ba yini ndra obile ati’baru ’diyi omvi,

8Ma eri o’data Moabuni o’dale ’diyi azini onzomara Amoni anzini, yini ’ba mani onzozu ’diyi, yini afu ’bale angu yinisirisi.

9E’yo ’disi, ekile mani ovule idrirurile, Yehova asikari ongulumuruni, Mungu Israeliniri ’yo kini, Adada, Moabuni nga ovu ekile Sodomule, azini Amoni anzi nga ovu ekile Gomorale, aukau pi ma pari, a’i ’bile be, eri nga ovu andruru ’dani ’dani. ’Ba mani acepi ’diyi nga yi opa, yi nga ovu ’ba acepi suru mania ’diyi ma afaru.

10Yi nga e’yo ’diyi isu afu yini ma e’yosi, a’disiku yi o’da ’ba Yehova asikari ongulumurunirini ’diyi, fu yi yi be indi.

11Yehovani nga ovu uriuriru yi dri; eri nga adrou dria wudrikuruni ’diyi ’ba toko; ’ba yi nga eri inzi’i, ’ba dria alu alu pari ini vusi, adaru angu dria yi olipi suru ndu ndu vusi ’diyi.

12Emi ’ba Etiopiaa ’diyi indi, sei manini nga emi olini.

13Te eri nga i ma dri eju angu andraleruri ’yezu, nga Asuria ma dri ja; nga vini Nineveni oja andruru, ’wizaru ekile rokole.

14Anyapa o’biru yi nga ola eri ma angu agaduaria, suru dria ma anyapa pie; gbuluku pi ozuku be iritro nga adri pati i’diza erini ma talaa; yi nga awu wu derisaa, anguni nga du andruru kpere jotilia; pati marioni ’diyi ma drini nga ovu mgboru.

15’Diri aku ndra ovupi ayikoru candi egapi kuri, ’yopi i asia kini, Ma indi, ’ba azini maleni yo, kiri ma’iri. Aku nde oja i andruru, pari anyapa pini yi olazu aleniariru ’doni ya! ’Ba dria agapi kalanisiri nga eri onzi, yi nga dri sa erisi.

← Chapter 1 Jump to: Chapter 3 →