Revelation 22

Lahu LHINT (Lahu Shi)

← Chapter 21 Jump to:

1Awg yand u ve haq, Ghig sa he lehq Yawg nehax ve kaw jaw huh tuhaz lehq med u ve yaq kaw nux awg kaw jen lo yaq veh chehd che, co ha teq vid tug te che a kaz lawg muhd nuh maq cuh yad u ve ngag haq mawa che yaog. A kaz u ve awr lehr, kehg daq jad che huhx meh kehr-or haq sur che yaog. A kaz lawg u ve ni phawd phawad lo co ha teq vid gha che cix sir cehg cawg che yaog. Cix sir cehg u ve awr lehr, awg sir teq chi nid ceng nuhq lehq, har pa mag gha lia awg sir nuhaq che yaog. Awg phaq teq pa awr lehr, chaw ceng teq pa ve nag che guhg che haq na vehr vid tug awg pun yaog.

3Kheh te lehq, ted cear liz Ghig sa khen che haq te pawz-a liz maq gha kawq khanr. Med u ve awg khuhn Ghig sa he lehq Yawg nehax ve kaw jaw cawg lehq, yawd ved awg ceg teq pa yawd haq a kor pi tug yaog.

4I hehd awr lehr, yawd ved mehz khuhd haq gha mawg lehq, i hehd ve nar kaq kawn huh yawd ved awg meh cawg lar tug yaog.

5Kheh te lehq, muhd phiq che ted ceng te pawz-a liz mad kawq cawg. A mir khehd awg ghiz haq lehd ma koz, muhd ni awg ghiz haq lehd ma koz, i hehd maq lor. Awg lawn ghod ver, Jawd mawd Ghig sa awr lehr, i hehd haq awg ghiz paw vid tug yaog. I hehd awr lehr, co co taer taer gha uq penr tug yaog.

6Kheh te lehq, muhd nuh maq cuh yad ngag haq te pawz kawq koz che, “Tawd khuhd che teq pa awr lehr, kar tiq yeg lehq awg cehg mag cawd che tawd khuhd phehq che yaog. Ghig sa ve cuh kar var teq pa ve ni ma teq pa haq uq penr che Awg ha phu ve Jawd mawd Ghig sa awr lehr, maq muh tand ver phehaq tug awg ceng teq pa yawd ved awg ceg teq pa haq mar vid tug, yawd ved muhd nuh maq cuh yad haq lag peha lar che yaog,” lehd koz che yaog.

7“Ngawx lor, ngag har naq lag tug yaog. Phehaq tug ve awg lawn teq pa liq che awg khuhn buhq lar che Ghig sa ve tawd khuhd haq na yug lehq te che chaw awr lehr, awg bon ir che yaog,” lehz Yer suq ngag haq koz ax che yaog.

8Ngag awg ton Yod hanr awr lehr, awg ceng che teq pa haq gha kad gha mawg che yaog. Che teq pa haq gha kad gha mawg peg che te yand, ngag haq mawa che muhd nuh maq cuh yad te ghad haq a kor pi tug, yawd ved khi pad huh ngag boz cuhx vehr che yaog.

9Kheh ma khuhd, yawd ngag haq koz ax che, “Che kheh taq te. Ngag liz nawg geh teq geha awg ceg phehq che yaog. Nawg ved a vix a nax phehq che Ghig sa ve cuh kar var teq pa geh lehd ma koz, liq che awg khuhn buhq lar che tawd khuhd teq pa haq na yug lehq te che chaw teq pa geh lehd ma koz, i hehd geh teq geha liz, ngag awr lehr awg ceg phehq che yaog. Ghig sa haq a kor pi-oq,” lehz ngag haq koz ax che yaog.

10Kheh te lehq yawd ngag haq kawq koz ax che, “Liq che awg khuhn buhq lar che phehaq tug ve awg lawn che teq pa ve tawd khuhd haq cunr ta dawz. Awg lawn ghod ver, awg yand ned vehor.

11Haeg che haq te che chaw awr lehr, haeg che haq kawq cax te vid ser. Chaq chiz che chaw awr lehr, chaq chiz che haq kawq cax te vid ser. Thed che cawd che chaw awr lehr, thed che cawd che haq kawq cax te vid ser. Daq kehg che chaw awr lehr, daq kehg che haq kawq cax te vid ser,” lehd koz che yaog.

12“Ngawx lor, ngag har naq lag tug yaog. Chaw awg gha lia, a sug yawd te lar che haq kenr daq che heh pid tug, laq sawnr haq ngag yug veha lag tug yaog.

13Ngag awr lehr Ar lar phaz he lehq Aw me gaz phehq che yaog. Awg kawd ped maq he lehq awg leh med liz ngag phehq che yaog. Awg khiz penr he lehq awg leh med liz phehq che yaog,” lehz Yer suq ngag haq koz ax che yaog.

14Co ha teq vid gha che cix sir cehg lo lag tug a khawag gha tug he lehq lad vend ghaz mir khuh teq pa awg khuhn lo gha gehe tug awg pun, a sug yawd ved a poq yehg maq haq chuhd kha che chaw awr lehr, awg bon ir che yaog.

15Awg bag phawd awr lo awr lehr, phid heh te che chaw, ned te che chaw, hax chawd hax paz te che chaw, su haq dawz vehr che chaw, sax ho haq a kor pi che chaw he lehq her ka che haq haq lehq her ka chehd che chaw awg gha lia chehd chehd che yaog.

16“Ngag Yer suq awr lehr, Khreq yad awg mor teq pa awg pun awg ceng che teq pa nig hehd haq sax khiz khanr tug, ngag ved muhd nuh maq cuh yad haq lag peha che yaog. Ngag awr lehr, Dar viq ve awg chi he lehq awg ceng awg khad phehq che yaog. Awg ghiz pawd hehnd jad che pig tuhz liz ngag phehq che yaog,” lehz Yer suq ngag haq koz ax che yaog.

17Awg ha phu he lehq awg phad mawd he tug ve yad mid hax koz che, “Lar-oq.” Kheh te lehq, gha kad che chaw awr lehr, “Lar-oq,” lehd koz-oq. A kaz sex che chaw liz laoq. Dawg gad che chaw a sug te ghad lehd ma koz, awg phuhd ma pid tug lor che co ha teq vid gha che a kaz haq dawg vid laoq.

18Liq che awg khuhn buhq lar che phehaq tug ve awg lawn che ve tawd khuhd haq gha kad che chaw awg gha lia haq ngag kheh te sa tiq pehar che yaog. Awg ceng che teq pa haq chaw te ghad ghad thehnr vid ver, liq che awg khuhn buhq lar che cir yanr che awg ceng teq pa Ghig sa yawd haq kawq thehnr vid tug yaog.

19Kheh te lehq, phehaq tug ve awg lawn che ve liq che awg khuhn buhq lar che tawd khuhd haq, chaw te ghad ghad tawd khuhd ted pehg pehar haq yug chid bag ver, liq che awg khuhn buhq lar che heh, co ha teq vid gha che cix sir cehg awg khuhn he lehq daq kehg che med awg khuhn yawd gha tug ve awg ceng haq, Ghig sa yug kha vid tug yaog.

20Awg lawn che teq pa haq sax khiz khanr sehr phad koz che, “Awg cehg mag ngag har naq lag tug yaog,” lehd koz che yaog. A meng, Jawd mawd Yer suq-og, lar-oq.

21Jawd mawd Yer suq ve awg bon awg sinx Ghig sa ve daq che kehg che chaw awg gha lia geh cawg vid-oq.

← Chapter 21 Jump to: