1 Peter 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Chi hkʼa shuˍ shuˍ, awˬ miˇ ma teˇ hpaˍ htawˇ, a shu yawˇ ve awˬ hpawˇ awˬ hawˉ lo hkʼa deh‸ chehˇ-oˆ. Nawˬ hui ve awˬ hpawˇ teˇ hpaˍ hpaˍ lehˬ, bon hkawˇ hta‸ maˇ na yuˬ ve htawˇ, nawˬ hui yawˆ yan puiˉ ve leh da‸ kehˬ ve awˬ liˇ awˬ hkʼa teˇ hpaˍ te ve hta‸ yawˇ hui gʼa mawˬ ve teˇ yanˇ,

2nawˬ hui te‸ chiˉ maˇ kʼoˆ maˍ piˇ ve ka‸, nawˬ hui ve da‸ ve awˬ liˇ awˬ hkʼaˇ hta‸ pa taw, nawˬ hui yawˇ hui hta‸ maˍ gʼa tuˬ yoˬ.

3Nawˬ hui awˬ hkiˇ shawˍ ve lehˬ, uˉ hkeh mvuh hpeˇ ve, shi hkʼeun tcuhˉ ve, veu‸ jiˇ kʼaˇ jiˇ ve, awˬ hta‸ hpawˇ awˬ hkiˇ shawˍ ve ceh taˇ hpeh‸ piˇ.

4Ya‸ hkʼaˇ nawˬ hui awˬ hkiˇ shawˍ ve lehˬ, nyi ma nuˇ nehˬ ve leh gawˬ lehˍ chehˇ puiˉ ve, awˬ hkʼaw hpawˇ awˬ hkiˇ shawˍ ve teˇ ceuˬ hpeh‸ piˇ-oˆ. Awˬ hkiˇ shawˍ ve chi teˇ ceuˬ lehˬ, maˇ luˬ puiˉ leh, Gʼuiˬsha mehˆ gʼuˇ suhˍ awˬ hpfuhˇ hkʼaˆ jaˇ ve yoˬ.

5Aˬ sho-eˬ htaˇ Gʼuiˬsha hta‸ dawˇ law chehˇ ve da‸ kehˬ ve yaˇ miˇ teˇ hpaˍ htawˇ, a shu yawˇ awˬ to hta‸ awˬ hkiˇ chi hkʼe te shawˍ ve yoˬ. Yawˇ hui lehˬ, a shu yawˇ ve awˬ hpawˇ awˬ hawˉ lo hkʼa deh‸ chehˇ puiˉ ve yoˬ.

6Tawˇ pa haˉ te kʼo, Saˍraˇ lehˬ, Aˍbraˍhanˍ ve hkawˇ hta‸ na yu‸ leh, yawˇ hta‸ jawˇ mawˇ teh‸ kʼoˆ ve yoˬ. Nawˬ hui da‸ ve hta‸ te leh, hkʼaˬ hkʼe hpeh‸ htawˇ kawˆ puiˉ ve nyi ma maˇ cawˬ ve kʼo, nawˬ hui Saˍraˇ ve yaˇ miˇ teˇ hpaˍ hpeh‸ ve yoˬ.

7Chi hkʼa shuˍ shuˍ, awˬ hpawˇ teˇ hpaˍ-oˬ, a shu yawˇ ve awˬ miˇ ma geh chehˇ ve awˬ hkʼaw lo, yawˇ awˬ pon dawˇ nyi puiˉ ve nyi ma cawˬ piˇ-oˆ. Yawˇ hui lehˬ, nawˬ hui a‸ kehˉ awˬ gʼaˇ nuˇ ve htawˇ, co ha te‸ ve awˬ bon hta‸ nawˬ hui geh teˇ geh awˬ shinˉ gʼa caˇ ve pa taw, yawˇ hui hta‸ yawˆ yan-o. Chi hkʼe te ve kʼo, nawˬ hui bon lawˬ ve hta‸ tawˍ taˍ tuˬ maˇ cawˬ.

8Awˬ leh meuˇ ve tawˇ lehˬ, nawˬ hui hkʼa peu-eˬ nyi ma teˇ shiˍ tiˉ taˍ-o‸. Awˬ viˉ awˬ nyi teˇ gʼaˇ leh teˇ gʼaˇ ha kʼaˉ da‸ leh ha‸ da‸-o‸. Nyi ma nuˇ lehˍ te leh, shu awˬ hawˉ lo nyi ma nehˬ lehˍ taˍ-o‸.

9Shu awˬ haiˬ te laˇ ve htawˇ, awˬ haiˬ taˇ kʼaw‸ te hkʼaw‸. Shu hkʼa mvuhˇ hkʼa na kʼoˆ laˇ ve htawˇ, hkʼa mvuhˇ hkʼa na taˇ kʼaw‸ kʼoˆ hkʼaw‸. Ya‸ hkʼaˇ, yawˇ hui hta‸ na‸ piˇ-oˆ. Nawˬ hui awˬ bon gʼa tuˬ, chi ve awˬ pon Gʼuiˬsha nawˬ hui hta‸ kuˬ yuˬ taˍ peuˬ.

10A sha‸ te‸ gaˇ leh, ha lehˬ dawˇ sha ve awˬ nyi teˇ hpaˍ hta‸ mawˬ gaˇ ve chaw lehˬ, a shu yawˇ ve ha tehˍ haiˬ ve hkawˇ hta‸ taˇ yaw. A shu yawˇ ve meuˇ guiˬ heˍ ve hkawˇ hta‸ ka‸ taˇ kʼoˆ.

11Haiˬ ve hta‸ jaw kʼai leh, da‸ ve hta‸ te-o. Cawˇ da‸ hui da‸ ve teˇ ceuˬ hta‸ ca leh, oˇ ve awˬ hkʼaˇ suh gʼa‸ kʼai-o.

12Awˬ lawn kʼo, Jawˇmawˇ Gʼuiˬsha ve mehˆ shiˍ lehˬ, hteˇ ve cawˇ ve chaw hui hta‸ nyi chehˇ ve yoˬ. Yawˇ ve naˍ paw htawˇ, yawˇ hui ve bon lawˬ hkawˇ hta‸ na chehˇ ve yoˬ. Ya‸ hkʼaˇ, Jawˇmawˇ Gʼuiˬsha lehˬ, awˬ haiˬ hkʼa te ve chaw teˇ hpaˍ hta‸ yawˇ ve canˇ paˍ yoˬ teh‸ shawˍ taˍ ve yoˬ.

13Nawˬ hui da‸ ve hta‸ gʼaˇ hte‸ te chehˇ ve kʼo, a shu nawˬ hui hta‸ ca ya‸ la tuˬ le.

14Ya‸ hkʼaˇ, hteˇ ve cawˇ ve hta‸ pa taw nawˬ hui gʼa tu‸ gʼa hkanˍ puiˉ ve law kʼo, awˬ bon uiˍ ve yoˬ. Yawˇ hui ho laˇ ve hta‸ taˇ kawˆ, sho‸ sha‸ ve nyi ma ka‸ taˇ cawˬ piˇ.

15Nawˬ hui ve nyi ma awˬ hkʼaw lo Hkri‸ hta‸ Jawˇmawˇ yoˬ teh‸ shawˍ taˍ leh yawˆ yan-o. Nawˬ hui dawˇ law taˍ ve awˬ lawn, hkʼa na nyi laˇ ve chaw teˇ hpaˍ hta‸ hkʼaˬ hkʼe yaw hkʼaw‸ piˇ tuˬ, hkʼa deh‸ gu taˍ-o‸. Ya‸ hkʼaˇ, nyi ma nuˇ nehˬ leh yawˆ yan ve awˬ hkʼaw lo te-o.

16Nawˬ hui shiˍ puiˉ ve nyi ma hta‸ kehˬ lehˍ cawˬ piˇ-oˆ. Oˇ hkʼe te ve kʼo, Hkri‸ awˬ hkʼaw lo nawˬ hui te ve da‸ ve awˬ liˇ awˬ hkʼaˇ teˇ hpaˍ hta‸ hkʼaiˉ leh venˇbaˆ taˍ ve chaw teˇ hpaˍ lehˬ, gʼa ya‸ taw tuˬ yoˬ.

17Gʼuiˬsha nyi ma cawˇ ve kʼo, da‸ ve hta‸ te leh tu‸ ve hkanˍ ve hta‸ gʼa hkanˍ ve lehˬ, haiˬ ve hta‸ te leh gʼa hkanˍ ve a‸ kehˉ leuˉ leh da‸ ve yoˬ.

18Awˬ lawn kʼo, Hkri‸ lehˬ ngaˬ hui ve venˇ baˆ hta‸ pa taw teˇ pawˆ gʼa suh ve yoˬ. Gʼuiˬ sha geh ngaˬ hui hta‸ shiˍ kʼo‸-e gʼa tuˬ, hteˇ ve cawˇ ve chaw teˇ gʼaˇ lehˬ, maˇ hteˇ maˇ cawˇ ve chaw hui awˬ pon hkanˍ suh ve yoˬ. Yawˇ awˬ to suh ve htawˇ, Awˬ ha hpu hta‸ pa taw kʼaw‸ te‸ la ve yoˬ.

19Awˬ ha hpu hta‸ pa taw yawˇ kʼai leh, htawnˍ hkʼaw chehˇ ve awˬ ha teˇ hpaˍ hta‸ bon ca maˍ ve yoˬ.

20Awˬ ha oˇ ve teˇ hpaˍ lehˬ, Noˉa‸ ve awˬ co-e htaˇ Gʼuiˬsha ve hkawˇ hta‸ maˇ na yuˬ ve pa taw, htawnˍ hkʼaw chehˇ taˍ ve yoˬ. Noˉa‸ haw lo‸ kʼoˍ lonˉ hta‸ te chehˇ htaˇ, chaw yaˇ Gʼuiˬsha hkawˇ hta‸ na yuˬ tuˬ Gʼuiˬsha yeunˇ hkanˍ leh law taˍ htawˇ, yawˇ hui maˇ na yuˬ. Hkʼe te leh, chaw hiˉ gʼaˇ ceh tiˉ iˉ kaˆ awˬ hkʼaw lo gʼa ponˬ ve yoˬ.

21Chi hkʼa shuˍ shuˍ, chi beu‸ baˆtiˆsaˬ lehˬ, nawˬ hui hta‸ ponˬ laˇ ve yoˬ. Baˆtiˆsaˬ kʼoˆ ve lehˬ, awˬ to hta‸ ngawˉ taˍ ve awˬ meˇ tsuhˇ baˬ ve hta‸ kʼoˆ ve maˇ heˆ. Ya‸ hkʼaˇ, Yeˍsuˆ Hkri‸ kʼaw‸ te‸ tu la ve pa taw, Gʼuiˬsha mehˆ gʼuˇ suhˍ shiˍ puiˉ ve nyi ma da‸ la kehˬ la ve hta‸ kʼoˆ ve yoˬ.

22Yeˍsuˆ Hkri‸ lehˬ mvuhˇ naw ma lo taˆ kʼo‸-e leh, Gʼuiˬsha ve la‸ sha paˉ lo chehˇ taˍ ve yoˬ. Mvuhˇ naw ma tcuh yaˇ teˇ hpaˍ uˉ peunˍ shehˍ hpaˇ teˇ hpaˍ leh, kanˇ paˆ cawˬ shehˍ hpaˇ teˇ hpaˍ ka‸ yawˇ awˬ hawˉ lo chehˇ ve yoˬ.

← Chapter 2 Jump to: Chapter 4 →