2 John 1

Lahu Bible Edited © Thailand Bible Society and Bible Society of Myanmar, 2010, 2020.

Jump to:

1Ngaˬ lehˬ awˬ hoˉ chaw mawˇ teˇ gʼaˇ hpeh‸ leh, leuˆ yuˬ taˍ ve yaˇ miˇ teˇ gʼaˇ leh yawˇ ve yaˇ ehˉ teˇ hpaˍ hta‸ li‸ chi bvuh‸ laˇ ve yoˬ. Hteˇ ve cawˇ ve teˇ ceuˬ awˬ hkʼaw lo ngaˬ nawˬ hui hta‸ ha‸ ve yoˬ. Ngaˬ ceh tiˉ ha‸ ve maˇ heˆ. Hteˇ ve cawˇ ve teˇ ceuˬ hta‸ hkʼa shiˍ ve chaw hkʼa peu-eˬ htawˇ nawˬ hui hta‸ ha‸ ve yoˬ.

2Ngaˬ hui awˬ hkʼaw lo cawˬ taˍ ve hteˇ ve cawˇ ve teˇ ceuˬ hta‸ pa taw, nawˬ hui hta‸ ha‸ ve yoˬ. Hteˇ ve cawˇ ve chi teˇ ceuˬ lehˬ, co co taiˍ taiˍ ngaˬ hui geh cawˬ tuˬ yoˬ.

3Awˬ pa Gʼuiˬsha leh, Awˬ pa ve Yaˇ hpu Yeˍsuˆ Hkri‸ geh lo, awˬ bon teˇ ceuˬ, ha kʼaˉ ve teˇ ceuˬ leh dawˇ sha gaˇ sha ve teˇ ceuˬ ngaˬ hui geh cawˬ tuˬ yoˬ. Hteˇ ve cawˇ ve teˇ ceuˬ leh ha‸ pehnˇ ve teˇ ceuˬ awˬ hkʼaw lo chi teˇ hpaˍ ngaˬ hui geh cawˬ tuˬ yoˬ.

4Awˬ pa ngaˬ hui hta‸ tawˇ pe‸ laˇ ve hkʼe, nawˬ ve awˬ yaˇ awˬ duˬ teˇ hpaˍ hpaˍ hteˇ ve cawˇ ve teˇ ceuˬ awˬ hkʼaˇ suh kʼai chehˇ ve hta‸ ngaˬ gʼa mawˬ ve pa taw, ha lehˬ jaˇ ve yoˬ.

5Chi beu‸ lehˬ, tawˇ piˇ ve awˬ suhˉ teˇ hkawˇ ngaˬ nawˬ hta‸ bvuh‸ laˇ ve maˇ heˆ. Awˬ hkuiˉ puiˍ htaˇ ka‸ ngaˬ hui gʼa taˍ peuˬ ve tawˇ hkawˇ ngaˬ nawˬ hta‸ bvuh‸ laˇ ve yoˬ. Yaˇ miˇ-oˬ, ngaˬ hui teˇ gʼaˇ leh teˇ gʼaˇ ha‸ da‸ tuˬ nawˬ hta‸ lawˬ hkawˉ ve yoˬ.

6Yawˇ tawˇ piˇ taˍ ve hkʼe ngaˬ hui te ve lehˬ, ha‸ pehnˇ ve teˇ ceuˬ hpeh‸ ve yoˬ. Ha‸ pehnˇ ve awˬ hkʼaˇ suh kʼai-o teh‸ tawˇ piˇ taˍ ve chi teˇ hkawˇ hta‸ awˬ hkuiˉ puiˍ htaˇ ka‸ nawˬ hui gʼa kaˇ taˍ peuˬ.

7Awˬ lawn kʼo, Yeˍsuˆ Hkri‸ lehˬ chaw yaˇ ve awˬ suhˍ awˬ shaˍ pfuhˇ leh laˬ ve maˇ heˆ teh‸ kʼoˆ ve chaw heˍ paˍ laiˉ gʼaˇ miˬguiˬ hkʼoˆ teˇ kaˬ le le lo kʼai peuˬ. Chi hkʼe ve chaw lehˬ, chaw heˍ paˍ hpeh‸ leh, Yeˍsuˆ ve canˇ paˍ lonˉ htawˇ hpeh‸ ve yoˬ.

8Nawˬ hui te peuˬ ve kanˉ teˇ hpaˍ maˇ gʼa mehˉ kʼai leh, nawˬ hui awˬ bon hkʼa biˇ gʼa hpeh‸ tuˬ, a shu yawˇ awˬ to hta‸ shaˍ ti‸ taˍ-o‸.

9Hkri‸ maˍ piˇ ve awˬ hkʼaw lo maˇ chehˇ leh, dawˇ ponˬ dawˇ leuˉ ve chaw hkʼaˬ ve teˇ gʼaˇ maˇ kʼoˆ, Gʼuiˬsha hta‸ maˇ caˉ da‸. Hkri‸ maˍ piˇ ve awˬ hkʼaw lo chehˇ taˍ ve chaw teˇ gʼaˇ lehˬ, Awˬ pa hta‸ ka‸ Yaˇ hpu hta‸ ka‸ caˉ da‸ ve yoˬ.

10Chaw teˇ gʼaˇ gʼaˇ nawˬ hui geh laˬ leh maˍ piˇ ve tawˇ hkawˇ chi maˇ pfuhˇ laˬ ve kʼo, yawˇ hta‸ yehˬ hkʼaw taˇ ha‸ yuˬ, hpuˇ da‸ ve teˇ yanˇ tawˇ ka‸ taˇ yaw.

11Awˬ lawn kʼo, hpuˇ da‸ ve teˇ yanˇ yawˇ hta‸ tawˇ yaw ve chaw teˇ gʼaˇ lehˬ, yawˇ te ve haiˬ ve kanˉ teˇ hpaˍ hta‸ yawˇ geh teˇ geh te ve hkʼe yoˬ.

12Ngaˬ nawˬ hui hta‸ li‸ bvuh‸ laˇ tuˬ maˇ maˇ cawˬ ve htawˇ, htawˇ gʼeuˆ leh naˬ meu‸ gʼuiˬ maˇ bvuh‸ gaˇ. Ya‸ hkʼaˇ, ngaˬ hui ha lehˬ ve biˇ la tuˬ, ngaˬ nawˬ hui geh laˬ leh, mehˆ hpfuhˇ tawˍ da‸ taˍ ve awˬ hkʼaw lo tawˇ gʼa yaw da‸ tuˬ ve hta‸ ngaˬ dawˇ law chehˇ ve yoˬ.

13Leuˆ yuˬ taˍ ve nawˬ awˬ viˉ ma ve awˬ yaˇ awˬ duˬ hui nawˬ hta‸ ha‸ pehnˇ ve hkawˇ shanˍ feu laˇ ve yoˬ.

Jump to: