2 Thessalonians 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Awˬ viˉ awˬ nyi teˇ hpaˍ-oˬ, ngaˬ hui nawˬ hui hta‸ chi hkʼe lawˬ hkawˉ ve yoˬ. Ngaˬ hui ve Jawˇmawˇ Yeˍsuˆ Hkri‸ kʼaw‸ ya‸ la leh, yawˇ hta‸ hpuˇ da‸ tuˬ ngaˬ hui gʼa hpawnˬ da‸ tuˬ ve awˬ lawn hta‸ nawˬ hui taˇ dawˇ hkiˉ.

2Jawˇmawˇ Yeˍsuˆ ve awˬ nyi gaˬ la peuˬ teh‸, awˬ ha awˬ hkʼaw lo shu gʼa mawˬ ve maˇ kʼoˆ, shu kʼoˆ chehˇ ve maˇ kʼoˆ, ngaˬ hui li‸ chi hkʼe bvuh‸ laˇ ve yoˬ teh‸ shu kʼoˆ ve maˇ kʼoˆ, chi teˇ hpaˍ hta‸ pa taw nawˬ hui nyi ma sho‸ sha‸ ve taˇ cawˬ piˇ.

3Chaw teˇ gʼaˇ ka‸ nawˬ hui hta‸ teˇ ceuˬ awˬ hkʼaw lo ka‸ maˇ gʼa heˍ yuˬ beˬ yuˬ gʼa tuˬ, shaˍ ti‸ te-o. Awˬ lawn kʼo, awˬ nyi oˇ ve maˇ gaˬ sheˍ gʼuˇ suhˍ, awˉ lawˉ htaˇ Gʼuiˬsha hta‸ hpfuhˆ kʼai ve teˇ ceuˬ hpeh‸ la tuˬ leh, venˇbaˆ awˬ shehˍ hpaˇ teh‸ kʼoˆ ve, luˬ ve sheˆ ve awˬ yaˇ teˇ gʼaˇ tawˆ la tuˬ yoˬ.

4Chaw oˇ ve teˇ gʼaˇ lehˬ, gʼuiˬsha teh‸ shu hkʼa kʼoˆ ve hkʼa peu-eˬ hta‸ maˇ kʼoˆ, oˉ kʼoˍ pui ve awˬ ceuˬ hkʼa peu-eˬ hta‸ maˇ kʼoˆ, yawˇ gʼaˇ hte‸ tawˍ taˍ leh, oˇ ve teˇ hpaˍ a‸ kehˉ yawˇ awˬ to hta‸ yawˇ taˍ uiˍ ve yoˬ. Yawˇ lehˬ Gʼuiˬsha ve bon yehˬ lonˉ awˬ hkʼaw lo mui taˍ leh, yawˇ awˬ to Gʼuiˬsha hpeh‸ ve yoˬ teh‸ yawˇ kʼoˆ ve yoˬ.

5Ngaˬ nawˬ hui geh chehˇ sheˍ ve teˇ yanˇ, awˬ lawn chi teˇ hpaˍ ngaˬ nawˬ hui hta‸ hto laˇ peuˬ ve hta‸ nawˬ hui maˇ dawˇ nawˇ leh laˇ.

6Chaw oˇ ve teˇ gʼaˇ lehˬ, yawˇ ve awˬ yanˇ cawˇ ve teˇ yanˇ hkʼa tawˍ lehˆ tawˆ la tuˬ, chi beu‸ yawˇ hta‸ hkʼaˬ hkʼe tawˍ taˍ chehˇ ve awˬ lawn nawˬ hui shiˍ ve yoˬ.

7Awˬ lawn kʼo, haiˬ ve teˇ ceuˬ lehˬ, chi beu‸ ka‸ baˬ kuiˬ lo kanˉ te chehˇ ve yoˬ. Ya‸ hkʼaˇ, haiˬ ve teˇ ceuˬ hta‸ tawˍ taˍ shehˍ hpaˇ maˇ tawˆ kʼai ve ceh ceh, oˇ ve hta‸ yawˇ tawˍ taˍ tuˬ yoˬ.

8Tawˍ taˍ shehˍ hpaˇ teˇ gʼaˇ tawˆ kʼai peuˬ hkʼaw‸ nawˉ, venˇbaˆ awˬ shehˍ hpaˇ oˇ ve teˇ gʼaˇ hkʼa tawˍ lehˆ tawˆ la tuˬ yoˬ. Jawˇmawˇ Yeˍsuˆ lehˬ chaw oˇ ve hta‸ meuˆ pehˍ leh, yawˇ hkʼa tawˍ lehˆ ya‸ la ve awˬ hkʼaw lo chaw oˇ ve teˇ gʼaˇ hta‸ te luˬ tuˬ yoˬ.

9Chaw oˇ ve teˇ gʼaˇ laˬ ve lehˬ, Saˍtanˍ te taˍ ve kanˉ hta‸ cuˇ leh laˬ tuˬ yoˬ. Kanˇ paˆ hkʼa biˇ cawˬ ve awˬ hkʼaw lo maˇ kʼoˆ, shu hta‸ heˍ yuˬ tuˬ awˬ heˆ leh anˇ tuˬ teˇ hpaˍ hta‸ te ve awˬ hkʼaw lo maˇ kʼoˆ,

10luˬ kʼai sheˆ kʼai tuˬ ve chaw oˇ ve teˇ hpaˍ hta‸ heˍ yuˬ beˬ yuˬ gʼa tuˬ, maˇ hteˇ maˇ cawˇ ve teˇ ceuˬ le le hta‸ yehˇ ve awˬ hkʼaw lo maˇ kʼoˆ, yawˇ laˬ tuˬ yoˬ. Luˬ kʼai sheˆ kʼai tuˬ ve chaw teˇ hpaˍ lehˬ, htaiˍ hkʼaw‸ ve hta‸ gʼa tuˬ, hteˇ ve cawˇ ve teˇ ceuˬ hta‸ ha‸ ve nyi ma maˇ cawˬ ve pa taw, luˬ kʼai sheˆ kʼai tuˬ yoˬ.

11Hkʼe te leh, hteˇ ve cawˇ ve teˇ ceuˬ hta‸ maˇ yonˍ leh, maˇ hteˇ maˇ cawˇ ve teˇ ceuˬ awˬ hkʼaw lo ha lehˬ ve chaw hkʼa peu-eˬ hta‸ suhˉ taˆ piˇ tuˬ,

12maˇ heˆ heˆ ve teˇ ceuˬ hta‸ yawˇ hui yonˍ tuˬ awˬ pon dawˇ ya‸ jaˇ ve teˇ ceuˬ Gʼuiˬsha yawˇ hui awˬ hkʼoˆ hta‸ gaˬ la piˇ lawˬ ve yoˬ.

13Jawˇmawˇ Yeˍsuˆ ha‸ ve awˬ viˉ awˬ nyi teˇ hpaˍ-oˬ, nawˬ hui awˬ pon Gʼuiˬ sha hta‸ ngaˬ hui hkʼaˬ htaˆ ka‸ gʼa chiˇ mvuh ve yoˬ. Awˬ lawn kʼo, Awˬ ha hpu nawˬ hui hta‸ da‸ piˇ kehˬ piˇ leh, hteˇ ve cawˇ ve tawˇ hkawˇ hta‸ nawˬ hui yonˍ ve pa taw, htaiˍ hkʼaw‸ ve hta‸ gʼa tuˬ awˬ hkuiˉ puiˍ htaˇ ka‸ Gʼuiˬsha nawˬ hui hta‸ leuˆ yuˬ taˍ peuˬ.

14Oˇ hkʼe hpeh‸ la tuˬ, ngaˬ hui maˍ ve ha lehˬ ve bon hkawˇ hta‸ Gʼuiˬsha cuˇ leh nawˬ hui hta‸ kuˬ yuˬ taˍ peuˬ. Yawˇ chi hkʼe te ve lehˬ, ngaˬ hui ve Jawˇmawˇ Yeˍsuˆ Hkri‸ ve awˬ me‸ awˬ hponˇ hta‸ nawˬ hui gʼa tuˬ awˬ pon te ve yoˬ.

15Hkʼe te leh awˬ viˉ awˬ nyi teˇ hpaˍ-oˬ, yeˬ chaweh chehˇ taˍ-o‸. Ngaˬ hui nawˬ hui hta‸ tawˇ yaw laˇ ve awˬ hkʼaw lo maˇ kʼoˆ, li‸ bvuh‸ laˇ ve awˬ hkʼaw lo maˇ kʼoˆ, ngaˬ hui hkʼa maˍ laˇ ve awˬ liˇ awˬ hkʼaˇ teˇ hpaˍ hta‸ hkʼa deh‸ vawˆ taˍo‸.

16Ngaˬ hui ve Jawˇmawˇ Yeˍsuˆ Hkri‸ awˬ to leh ngaˬ hui ve Awˬ pa Gʼuiˬsha lehˬ, nawˬ hui ve nyi ma hta‸ dawˇ sha la piˇ leh, da‸ ve kanˉ leh da‸ ve tawˇ teˇ ceuˬ le le awˬ hkʼaw lo nawˬ hui hta‸ yeˬ la piˇ lawˬ-o‸.

17Ngaˬ hui ve Awˬ pa Gʼuiˬsha lehˬ, ngaˬ hui hta‸ ha‸ leh, yawˇ ve awˬ bon hta‸ pa taw co co taiˍ taiˍ dawˇ sha ve teˇ ceuˬ maˇ kʼoˆ, dawˇ law ve teˇ ceuˬ maˇ kʼoˆ, ngaˬ hui hta‸ pe‸ laˇ peuˬ ve yoˬ.

← Chapter 1 Jump to: Chapter 3 →