Haggai 1

Lahu Bible Edited © Thailand Bible Society and Bible Society of Myanmar, 2010, 2020.

Jump to: Chapter 2 →

1Paˇshaˇ mvuhˇmiˬ hta‸ Daˍriˆ uˉ peunˍ ve nyiˇ hkʼaw‸ teˇ hkʼaw‸, ha pa hkaw‸ maˬ teˇ maˬ awˉ lawˉ teˇ nyi htaˇ, Gʼuiˬsha tcuh kaˍ paˍ Haˆgehˇ hta‸ tawˇ yaw piˇ ve yoˬ. Tawˇ chi teˇ hpaˍ lehˬ, Yuˇda‸ mvuhˇmiˬ hta‸ uˉ peunˍ chehˇ ve Shaˍteˍlaˆ ve yaˇ Zeˍruˆbaˍbeˍlaˆ leh Yawˇzaˍdehˆ ve yaˇ paw hkuˇ lonˉ Yawˇsuˆ hui awˬ pon hpeh‸ ve yoˬ.

2Gʼuiˬsha kʼoˆ ve, Chaw yaˇ teˇ hpaˍ lehˬ bon yehˬ hta‸ kʼaw‸ gu te tuˬ ve awˬ yanˇ maˇ gaˬ sheˍ teh‸ kʼoˆ chehˇ ve yoˬ, teh‸ Haˆgehˇ hta‸ kʼoˆ piˇ ve yoˬ.

3Oˇ ve hkʼaw‸ nawˇ, jawˇmawˇ Gʼuiˬsha tcuh kaˍ paˍ Haˆgehˇ hta‸ tawˇ yaw piˇ leh kʼoˆ ve,

4Ngaˬ ve chaw teˇ hpaˍ-oˬ, nawˬ hui lehˬ da‸ jaˇ ve yehˬ hkʼaw chehˇ taˍ leh aˬ hto‸ ma pa taw ngaˬ ve bon yehˬ hta‸ hkʼe leˇ baˬ taˍ ve le.

5Nawˬ hui hkʼaˬ hkʼe hpeh‸ la chehˇ ve hta‸ maˇ mawˬ laˇ.

6Nawˬ hui caˬ maˇ maˇ ti taˍ ve htawˇ, a ciˉ ceh tiˉ gʼa gʼeu‸ ve yoˬ. Nawˬ hui awˍ gʼa caˇ chehˇ ve htawˇ, meu‸ jehˇ chehˇ sheˍ ve yoˬ. Nawˬ hui a pehˉ meuˇ gʼuiˬ gʼa dawˬ chehˇ ve htawˇ, dawˬ maˇ law‸ hpeh‸ chehˇ ve yoˬ. Nawˬ hui veu‸ kʼaˇ gʼa veu‸ chehˇ ve htawˇ, kaˆ chehˇ sheˍ ve yoˬ. Kanˉ te shehˍ hpaˇ teˇ hpaˍ lehˬ, caˇ maˇ law‸ dawˬ maˇ law‸ hpeh‸ chehˇ ve yoˬ.

7Chi hkʼe hpeh‸ la chehˇ ve hta‸ nawˬ hui maˇ mawˬ laˇ.

8Chi beu‸ hkʼaw hkʼoˆ lo kʼai leh suhˆ yuˬ veu laˇ peuˬ hkʼaw‸ nawˉ, bon yehˬ hta‸ gu te-o. Oˇ hkʼe te ve kʼo, ngaˬ ha lehˬ nyi hkʼaˇ suh leh, oˇ kaˬ lo ngaˬ ve awˬ me‸ awˬ hponˇ tawˆ la tuˬ yoˬ.

9Nawˬ hui lehˬ caˬ shiˍ maˇ maˇ gʼa tuˬ yoˬ teh‸ dawˇ chehˇ taˍ ve yoˬ. Ya‸ hkʼaˇ, nawˬ hui caˬ shiˍ a ciˉ ceh tiˉ gʼa ve yoˬ. Nawˬ hui lehˬ caˬ shiˍ oˇ ve teˇ hpaˍ hta‸ aˉ hkʼaw lo pfuhˇ keu chehˇ ve teˇ yanˇ, caˬ shiˍ oˇ ve teˇ hpaˍ hta‸ ngaˬ meuˆ baˬ ve yoˬ. Aˬ hto‸ ma pa taw ngaˬ oˇ hkʼe te ve le. Awˬ lawn kʼo, nawˬ hui lehˬ a shu yawˇ ve yehˬ hta‸ da‸ la tuˬ gʼaˇ hte‸ te chehˇ ve htawˇ, ngaˬ ve bon yehˬ hta‸ hkʼe leˇ baˬ taˍ ve pa taw yoˬ.

10Chi hta‸ pa taw, chi beu‸ mvuhˇ yeˬ maˇ kʼaw‸ laˬ leh, te‸ chiˉ kʼaw‸ yeˬ la maˇ hpeh‸ ve yoˬ.

11Chi hta‸ pa taw, ngaˬ lehˬ nawˬ hui ve ti mi, a pehˉ meuˇ hko, shaˍ lonˍ hko, to nuˇ to shaˆ teˇ hpaˍ leh, nawˬ hui ti taˍ hkʼa taˍ ve awˬ ceuˬ teˇ hpaˍ awˬ hkʼoˆ lo mvuhˇ yeˬ maˇ laˬ piˇ lawˬ ve yoˬ, teh‸ kʼoˆ ve yoˬ.

12Oˇ htaˇ Zeˍruˆbaˍbeˍlaˆ, Yawˇsuˆ leh Baˍbuˍlonˍ mvuhˇmiˬ lo kʼaw‸ la taˍ ve Iˉsaˍreˍlaˆ chaw hkʼa peu-eˬ, Gʼuiˬsha yawˇ hui hta‸ te tcuh ve hkʼe te ve yoˬ. Yawˇ hui kawˆ jaˇ leh, Gʼuiˬsha ve tcuh kaˍ paˍ Haˆgehˇ ve tawˇ hta‸ na yuˬ leh te ve yoˬ.

13Oˇ htaˇ Haˆgehˇ lehˬ, Ngaˬ nawˬ hui geh chehˇ tuˬ ka ti‸ te ve yoˬ, teh‸ Gʼuiˬsha kʼoˆ taˍ ve tawˇ oˇ ve Iˉsaˍreˍlaˆ chaw hui hta‸ hto piˇ ve yoˬ.

14Gʼuiˬsha lehˬ chaw teˇ gʼaˇ le le bon yehˬ hta‸ kʼaw‸ gu te gaˇ ve nyi ma cawˬ la piˇ lawˬ ve yoˬ. Yuˇda‸ mvuhˇmiˬ ve jawˇmawˇ Zeˍruˆbaˍbeˍlaˆ, paw hkuˇ lonˉ Yawˇsuˆ leh shu ve mvuhˇmiˬ lo kʼaw‸ la taˍ ve Iˉsaˍreˍlaˆ chaw hkʼa peu-eˬve hta‸ nyi ma oˇ hkʼe cawˬ la piˇ ve yoˬ. Hkʼe te leh, yawˇ hui lehˬ Jawˇmawˇ Gʼuiˬsha ve bon yehˬ hta‸ kʼaw‸ tanˬ gu ve yoˬ.

15Yawˇ hui chi hkʼe tanˬ gu ve lehˬ, Daˍriˆ jawˇmawˇ te ve nyiˇ hkʼaw‸ teˇ hkʼaw‸, ha pa hkʼaw‸ maˬ teˇ maˬ, nyiˇ chi awˇ nyi htaˇ hpeh‸ ve yoˬ.

Jump to: Chapter 2 →