Malachi 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Gʼuiˬsha kʼaw‸ yaw hkʼaw‸ leh kʼoˆ ve, Ngaˬ ve ya‸ kʼaw hta‸ gu shehˍ hpaˇ teˇ gʼaˇ hta‸ ngaˬ peu laˇ tuˬ yoˬ. Oˇ htaˇ, nawˬ hui ca chehˇ ve Gʼuiˬsha lehˬ Yawˇ ve bon yehˬ hkʼaw laˬ tuˬ yoˬ. Nawˬ hui dawˇ law chehˇ ve chaw teˇ gʼaˇ, nawˬ hui geh laˬ leh ngaˬ ve ka ti‸ shaˉ caˆ awˬ lawn nawˬ hui hta‸ kʼoˆ maˍ laˇ tuˬ yoˬ, teh‸ Gʼuiˬsha kʼoˆ ve yoˬ.

2Ya‸ hkʼaˇ, Yawˇ laˬ tuˬ ve awˬ nyi hta‸ a shu teˇ gʼaˇ hkanˍ gʼa tuˬ le. Yawˇ tawˆ la ve teˇ yanˇ, a shu te‸ chehˇ hpeh‸ tuˬ le. Yawˇ lehˬ hpu hta‸ da‸ kehˬ la piˇ ve aˬ miˍ leh, da‸ jaˇ ve sha pehˍ hkʼa shuˍ hpeh‸ tuˬ yoˬ.

3Yawˇ lehˬ hpu hta‸ da‸ kehˬ la piˇ ve ca liˉ paˍ hkʼa shuˍ, chaw yaˇ teˇ hpaˍ hta‸ suhˉ jehˬ tuˬ yoˬ. Hpu leh shi hta‸ da‸ kehˬ la piˇ ve hkʼa shuˍ yawˇ lehˬ paw hkuˇ teˇ hpaˍ hta‸ da‸ kehˬ la piˇ tuˬ yoˬ. Oˇ htaˇ, yawˇ hui lehˬ da‸ ve tanˇ tuˬ teˇ hpaˍ Gʼuiˬsha geh yuˬ laˬ tuˬ yoˬ.

4Yuˇda‸ chaw leh Yeˍruˆsaˍlehnˍ venˇ yaˇ teˇ hpaˍ htawˇ, ponˬ laˬ htaˇ yawˇ hui te jaw ve hkʼe, Gʼuiˬsha nyi ma cawˇ ve tanˇ tuˬ teˇ hpaˍ Gʼuiˬsha geh yuˬ laˬ tuˬ yoˬ.

5Kanˇ paˆ uiˍ ve Jawˇmawˇ Gʼuiˬsha kʼoˆ ve, Nawˬ hui hta‸ suhˉ jehˬ tuˬ ngaˬ laˬ tuˬ yoˬ. Faˍ te ve chaw, haˉ chawˇ haˉ paˆ te ve chaw, maˇ hteˇ maˇ cawˇ ve shaˉ hkiˆ hkanˍ ve chaw, shu hta‸ kanˉ te tcuh leh gʼaˇ hpfuhˇ hkʼa deh‸ maˇ piˇ ve chaw, mehˇchawˇma, yaˇcuˬshi leh hkehˉ chaw hta‸ fawˉ mehˍ ve chaw, leh ngaˬ hta‸ maˇ yawˆ yan ve chaw teˇ hpaˍ hta‸ ngaˬ suhˉ jehˬ piˇ tuˬ yoˬ.

6Ngaˬ lehˬ maˇ htaiˍ maˇ pa puiˉ ve Gʼuiˬsha hpeh‸ ve yoˬ. Yaˍkoˆ ve awˬ ceuˬ awˬ hkʼaˇ teˇ hpaˍ-oˬ, nawˬ hui hkʼa peu-eˬ luˬ kʼai sheˆ kʼai peuˬ ve chaw hpeh‸ ve maˇ heˆ.

7Nawˬ hui ve awˬ puˍ awˬ pi teˇ hpaˍ hkʼa shuˍ, nawˬ hui lehˬ ngaˬ ve awˬliˇtawˇhkawˇ hta‸ baˬ taˉ peuˬ. Ngaˬ geh kʼaw‸ hpfuhˆ kʼaw‸ la-o. Oˇ hkʼe te ve kʼo, ngaˬ htawˇ nawˬ hui geh kʼaw‸ hpfuhˆ kʼaw‸ la tuˬ yoˬ. Nawˬ geh kʼaw‸ hpfuhˆ kʼaw‸ la tuˬ, ngaˬ hui hkʼaˬ hkʼe gʼa te tuˬ le, teh‸ nawˬ hui kʼoˆ ve yoˬ.

8Ngaˬ nawˬ hui hta‸ kʼaw‸ na nyi shaˍ. Gʼuiˬsha hta‸ heˍ caˇ ve cawˇ-aw laˇ. Maˇ cawˇ. Ya‸ hkʼaˇ, nawˬ hui heˍ caˇ chehˇ ve yoˬ. Hkʼaˬ hkʼe te heˍ caˇ ve le, teh‸ nawˬ hui kʼaw‸ na nyi laˇ ve yoˬ. Teˇ chi pun teˇ pun tanˇ tuˬ leh, hpu tanˇ keu kuiˬ awˬ hkʼaw lo nawˬ hui heˍ caˇ chehˇ ve yoˬ.

9Nawˬ hui hkʼa peu-eˬ hkeu ve hta‸ gʼa hkanˍ tuˬ yoˬ. Awˬ lawn kʼo, chaw yaˇ hkʼa peu-eˬ ngaˬ hta‸ heˍ caˇ chehˇ ve yoˬ.

10Nawˬ hui teˇ chi pun teˇ pun tanˇ tuˬ hkʼa peu-eˬ bon yehˬ lo yuˬ veu laˇ-oˆ. Oˇ hkʼe te ve kʼo, bon yehˬ hkʼaw caˇ tuˬ hkʼa biˇ cawˬ tuˬ yoˬ. Ngaˬ hta‸ lawˇ nyi gaˇ ve kʼo lawˇ nyi-o. Ngaˬ lehˬ mvuhˇ naw ma yehˬ miˉ hpaw leh, nawˬ hui awˬ hkʼoˆ lo awˬ bon awˬ shinˉ hkʼa biˇ ya‸ la piˇ chehˇ ve hta‸ nawˬ hui gʼa mawˬ tuˬ yoˬ.

11Nawˬ hui ve caˬ hta‸ ngaˬ awˬ pfuhˇ ma caˇ tcuh tuˬ ve maˇ heˆ. Nawˬ hui ve hko hkʼaw lo htawˇ, a pehˉ meuˇ shiˍ hkʼa biˇ naw‸ la tuˬ yoˬ.

12Nawˬ hui ve mvuhˇmiˬ lehˬ da‸ jaˇ ve mvuhˇmiˬ hpeh‸ ve pa taw, awˬ nu ve chaw ceuˬ hkʼa peu-eˬ nawˬ hui hta‸, Awˬ bon uiˍ ve chaw, teh‸ kʼoˆ tuˬ yoˬ.

13Nawˬ hui ngaˬ hta‸ hkʼa mvuhˇ hkʼa na kʼoˆ chehˇ ve yoˬ. Ya‸ hkʼaˇ, nawˬ hui lehˬ Ngaˬ hui nawˬ hta‸ hkʼaˬ hkʼe kʼoˆ ve le, teh‸ kʼoˆ chehˇ ve yoˬ.

14Gʼuiˬsha ve kanˉ te ve lehˬ, te‸ chiˉ tcuhˉ kuiˬ maˇ cawˬ. Yawˇ kʼoˆ ve hkʼe te leh ngaˬ hui venˇbaˆ dawˇ hpfuhˆ peuˬ ve awˬ lawn Yawˇ hta‸ hpeu‸ maˍ piˇ ve lehˬ aˬ hto‸ ma tcuhˉ kuiˬ cawˬ ve le.

15Ha lehˬ puiˉ ve chaw lehˬ, caˆ muiˬ puiˉ ve chaw hpeh‸ ve hta‸ ngaˬ hui gʼa mawˬ chehˇ ve yoˬ. Haiˬ ve chaw lehˬ uiˍ la da‸ la chehˇ ve ceh tiˉ maˇ heˆ. Yawˇ hui Gʼuiˬsha hta‸ ka‸ lawˇ nyi leh, Gʼuiˬsha yawˇ hui hta‸ te‸ chiˉ maˇ te piˇ mawˬ, teh‸ nawˬ hui kʼoˆ chehˇ ve yoˬ.

16Oˇ htaˇ Gʼuiˬsha hta‸ kawˆ ve chaw teˇ gʼaˇ leh teˇ gʼaˇ na‸ uˉ te da‸ chehˇ ve hta‸ Gʼuiˬsha gʼa kaˇ ve yoˬ. Gʼuiˬsha mehˆ gʼuˇ suhˍ lo, yawˇ hta‸ kawˆ leh yawˆ yan ve chaw teˇ hpaˍ ve awˬ meh bvuh‸ keu taˍ ve caˇ lanˇ li‸ kʼoˆ teˇ maˬ cawˬ ve yoˬ.

17Gʼuiˬsha kʼoˆ ve, Chaw chi teˇ hpaˍ lehˬ, ngaˬ ve chaw hpeh‸ ve yoˬ. Ngaˬ suhˉ jehˬ ve awˬ nyi gaˬ kʼo, yawˇ hui lehˬ ngaˬ ve chaw hpeh‸ tuˬ yoˬ. Awˬ pa teˇ gʼaˇ yawˇ ve tawˇ hta‸ na yuˬ ve yaˇ paˍ hta‸ ha kʼaˉ piˇ ve hkʼe, ngaˬ yawˇ hui hta‸ ha kʼaˉ piˇ tuˬ yoˬ.

18Hteˇ ve cawˇ ve chaw leh haiˬ ve chaw, ngaˬ ve tawˇ hta‸ na yuˬ ve chaw leh maˇ na yuˬ ve chaw, hkʼaˬ ma peun da‸ ve hta‸ ngaˬ ve chaw teˇ hpaˍ gʼa mawˬ tuˬ yoˬ, teh‸ kʼoˆ ve yoˬ.

← Chapter 2 Jump to: Chapter 4 →