Micah 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Laˬ tuˬ ve awˬ yanˇ hkʼaw bon yehˬ te taˍ kuiˬ hkʼaw pui lehˬ, shu a‸ kehˉ mvuh jaˇ ve hkʼaw pui hpeh‸ la tuˬ yoˬ. Chaw ceuˬ maˇ maˇ oˇ kaˬ lo laˬ leh,

2Ngaˬ hui Gʼuiˬsha ve hkʼaw hkʼoˆ lo taˆ-e leh, Iˉsaˍreˍlaˆ chaw hui ve Gʼuiˬsha ve bon yehˬ lo kʼai-a veuˬ. Yawˇ ngaˬ hui hta‸ te tcuh laˇ gaˇ ve awˬ ceuˬ hta‸ ca henˇ yuˬ leh, Yawˇ leuˆ laˇ ve ya‸ kʼaw hta‸ ngaˬ hui toˇ kʼai-a veuˬ. Awˬ lawn kʼo, Gʼuiˬsha ve tawˇ hkawˇ Yeˍruˆsaˍlehnˍ hkʼaw tawˆ la ve yoˬ. Yawˇ lehˬ Ziˉonˍ hkʼaw hkʼoˆ lo chehˇ taˍ leh, yawˇ ve chaw teˇ hpaˍ hta‸ tawˇ yaw piˇ ve yoˬ, teh‸ kʼoˆ tuˬ yoˬ.

3Chaw ceuˬ oˇ ve teˇ hpaˍ ya‸ da‸ jiˆ da‸ ve hta‸ maˇ kʼoˆ, vuiˇ kuiˬ neˇ kuiˬ lo chehˇ ve awˬ gʼaˇ uiˍ ve chaw teˇ hpaˍ ya‸ da‸ jiˆ da‸ ve hta‸ maˇ kʼoˆ, Yawˇ mehˉ kʼai piˇ lawˬ tuˬ yoˬ. Yawˇ hui lehˬ a shu yawˇ ve aˉhtaw hta‸ laˇ hpuiˇ kʼaw‸ lawˍ leh, a shu yawˇ ve gehˇ teˇ hpaˍ hta‸ law‸ kʼawˉ kʼaw‸ te tuˬ yoˬ. Chaw ceuˬ teˇ hpaˍ lehˬ, ma‸ teˇ pawˆ ka‸ gʼa kʼaw‸ bawˆ tuˬ ve maˇ heˆ.

4Chaw teˇ gʼaˇ le le a shu yawˇ ve a pehˉ meuˇ hko leh, maˉ nawˆ hko hkʼaw gawˬ lehˍ gʼa chehˇ leh, chaw teˇ gʼaˇ ka‸ yawˇ hui hta‸ kawˆ tuˬ te piˇ tuˬ ve maˇ heˆ. Chi hkʼe hpeh‸ la tuˬ kanˇ paˆ uiˍ ve Gʼuiˬsha ka ti‸ te taˍ peuˬ ve yoˬ.

5Chaw ceuˬ teˇ hpaˍ lehˬ, a shu yawˇ ve gʼuiˬsha teˇ hpaˍ hta‸ oˉ kʼoˍ pui chehˇ ve yoˬ. Ya‸ hkʼaˇ, ngaˬ hui lehˬ Jawˇmawˇ Gʼuiˬsha hta‸ co co taiˍ taiˍ oˉ kʼoˍ pui leh, yawˇ ve tawˇ hta‸ na yuˬ tuˬ yoˬ.

6Gʼuiˬsha kʼoˆ ve, Ngaˬ ciˍ yanˍ piˇ leh shu mvuhˇmiˬ hkʼaw gʼa tu‸ hkanˍ chehˇ ve chaw teˇ hpaˍ hta‸ ngaˬ teˇ geh kʼaw‸ shaw hpoˆ piˇ tuˬ ve awˬ yanˇ gaˬ la chehˇ ve yoˬ.

7Yawˇ hui lehˬ, hkui kʼaw‸ paˍ teˇ hpaˍ hpeh‸ leh, yehˬ hta‸ vuiˇ da‸ jaˇ ve yoˬ. Ya‸ hkʼaˇ, yawˇ hui hta‸ ngaˬ awˬ suhˉ teˇ pawˆ kʼaw‸ gu te piˇ leh, yawˇ hui lehˬ chaw ceuˬ lonˉ teˇ ceuˬ kʼaw‸ hpeh‸ la tuˬ yoˬ. Oˇ ve teˇ nyi hta‸ tanˬ leh ngaˬ lehˬ co co taiˍ taiˍ Ziˉonˍ hkʼaw hkʼoˆ lo chehˇ taˍ leh, yawˇ hui hta‸ uˉ peunˍ tuˬ yoˬ.

8Gʼuiˬsha yawˇ ve chaw teˇ hpaˍ hta‸ ha‸ shaˉ piˇ taˍ kuiˬ, Yeˍruˆsaˍlehnˍ venˇ-oˬ, nawˬ lehˬ nawˬ ve mvuhˇmiˬ hkʼaw lo shu a‸ kehˉ uiˍ jaˇ ve venˇ lonˉ teˇ pawˆ gʼa kʼaw‸ hpeh‸ la tuˬ ve yoˬ.

9Aˬ hto‸ ma pa taw, nawˬ awˬ hkawˇ bvuhˬ chaweh kuˬ chehˇ ve le. Aˬ hto‸ ma pa taw nawˬ lehˬ yaˇ paw tuˬ naˬ chehˇ ve yaˇ miˇ hkʼa shuˍ gʼa tu‸ hkanˍ chehˇ ve le. Nawˬ jawˇmawˇ maˇ cawˬ ve pa taw laˇ. Nawˬ hta‸ dawˇ hkʼaˇ piˇ laˇ shehˍ hpaˇ teˇ hpaˍ suh-e peuˬ ve pa taw laˇ.

10Yeˍruˆsaˍlehnˍ venˇ yaˇ teˇ hpaˍ-oˬ, yaˇ paw tuˬ naˬ chehˇ ve yaˇ miˇ teˇ gʼaˇ hkʼa shuˍ, hpeˆ dawˇ leh hkʼanˇ chehˇ-oˆ. Awˬ lawn kʼo, nawˬ hui lehˬ chi beu‸ venˇ hta‸ gʼa baˬ taˉ leh hkʼaw hkʼoˆ lawˬ hkʼoˆ lo gʼa ca chehˇ tuˬ yoˬ. Nawˬ hui Baˍbuˍlonˍ mvuhˇmiˬ lo gʼa kʼai tuˬ yoˬ. Ya‸ hkʼaˇ, oˇ kaˬ lo Gʼuiˬsha lehˬ nawˬ hui hta‸ canˇ paˍ teˇ hpaˍ ve la‸ sheh hkʼaw lo ponˬ laˇ tuˬ yoˬ.

11Chaw ceuˬ maˇ maˇ nawˬ hui hta‸ ca bawˆ la leh, Yeˍruˆsaˍlehnˍ venˇ hta‸ gʼa te luˬ piˇ tuˬ yoˬ. Venˇ chi ve luˬ kʼai sheˆ kʼai ve hta‸ ngaˬ hui gʼa mawˬ tuˬ yoˬ, teh‸ yawˇ hui kʼoˆ tuˬ yoˬ.

12Ya‸ hkʼaˇ, chaw chi teˇ hpaˍ lehˬ Gʼuiˬsha hkʼaˬ hkʼe dawˇ taˍ ve hta‸ yawˇ hui maˇ shiˍ. Caˬ jaw‸ ve hkʼe, Gʼuiˬsha yawˇ hui hta‸ teˇ geh shaw hpoˆ leh ciˍ yanˍ piˇ tuˬ ve hta‸ yawˇ hui maˇ shiˍ.

13Gʼuiˬsha kʼoˆ ve, Yeˍruˆsaˍlehnˍ venˇ yaˇ teˇ hpaˍ-oˬ, nawˬ hui ve canˇ paˍ teˇ hpaˍ hta‸ ciˍ yanˍ piˇ tuˬ tawˆ kʼai loˬ. Awˬ hkaw lehˬ sho hpeh‸ leh, hkui kiˆ lehˬ kuiˇ hpeh‸ ve nuˇ paˍ lonˉ hkʼa shuˍ, ngaˬ nawˬ hui hta‸ awˬ gʼaˇ uiˍ la piˇ tuˬ yoˬ. Nawˬ hui lehˬ chaw ceuˬ maˇ maˇ ve hta‸ te luˬ te sheˆ piˇ leh, yawˇ hui hiˉ yuˬ lu yuˬ taˍ ve hpu shi mawˇ jeˬ hkʼa peu-eˬ, ngaˬ geh gʼa yuˬ veu laˇ tuˬ yoˬ.

← Chapter 3 Jump to: Chapter 5 →