Job 12

Lingala 2020 (Mokanda na Bomoi)

← Chapter 11 Jump to: Chapter 13 →

1Yobo azongisaki:

2« Solo, bozali penza bato; tango bokokufa, bwanya mpe ekokufa elongo na bino!

3Kasi atako bongo, ngai mpe nazali mayele lokola bino, boleki ngai na eloko te. Nani ayebi te makambo wana nyonso?

4Nakomi eloko ya kotiola na miso ya baninga na ngai, ngai oyo nazali kobelela Nzambe mpo ete ayanola ngai; moto ya sembo, moto ya alima, ye nde akomi eloko ya kotiola!

5Bato ya esengo basekaka bato oyo bazali na pasi, babetaka bato oyo batepaka-tepaka kisambeti.

6Bandako ya bato ya mobulu ezalaka na kimia, mpe bato oyo batombokelaka Nzambe, oyo bamonaka makasi na bango lokola Nzambe, bango nde babatelamaka.

7Kasi tuna nyama ya zamba, ekoteya yo; tuna ndeke ya likolo, ekolakisa yo;

8loba na mabele, ekoteya yo; to tika ete mbisi ya ebale monene epesa yo sango.

9Kati na yango, ekelamu nini eyebi te ete loboko ya Yawe nde esalaki nyonso wana?

10Bomoi ya bikelamu nyonso mpe pema ya bato nyonso ezali kati na loboko na Ye.

11Boni, litoyi emekaka maloba te ndenge lolemo emekaka bilei?

12Bwanya ezalaka kati na bampaka te? Bomoi ya molayi epesaka mayele te?

13Bwanya mpe makasi ezali epai ya Nzambe, toli mpe mayele ezali ya Ye.

14Bakokoka te kotonga lisusu oyo Ye asili kobebisa, bakokoka kokangola te moto oyo Ye asili kokanga.

15Soki akangi mayi, bokawuki ekotaka; kasi soki afungoli yango, mokili ezindaka.

16Makasi mpe elonga ezali ya Ye; moto oyo basili kokosa mpe moto oyo akosi, bango mibale bazali ya Ye.

17Amemaka bapesi toli na bowumbu mpe akomisaka basambisi bato ya maboma;

18afungolaka minyololo ya bakonzi mpe akangaka liputa na baloketo na bango;

19amemaka Banganga-Nzambe na bowumbu mpe akweyisaka bato oyo bavanda kala na bokonzi;

20akangaka minoko ya bato oyo balobaka malamu, alongolaka mikolo bososoli;

21asopelaka bakonzi soni, abotolaka bibundeli ya bato ya makasi;

22abimisaka na pwasa, makambo ya sekele, makambo oyo ezali kati na molili, mpe abimisaka na pole bililingi oyo eleki mwindo;

23atombolaka bikolo mpe abebisaka yango, akomisaka minene mindelo ya bikolo mpe apanzaka yango;

24alongolaka makanisi ya bakonzi ya bikolo mpe asalaka ete batambola kati na bisobe oyo ezanga nzela

25mpo ete batepatepa kati na molili, na kozanga pole; mpe asalaka ete batepatepa lokola moto alangwe masanga.

← Chapter 11 Jump to: Chapter 13 →

Recommended Reading

Commentary Job Commentaries → Devotional Job Devotional Guide → Get This Bible Lingala (Mokanda na Bomoi) Study Bible →