2 Timothy 4

Lao Bible 2012 (ພຣະຄຳພີສັກສິ)

← Chapter 3 Jump to:

1ເຮົາສັ່ງເຈົ້າຢູ່ຊ້ອງພຣະພັກພຣະເຈົ້າ ແລະຢູ່ຊ້ອງພຣະພັກພຣະຄຣິດເຈົ້າເຢຊູ ຜູ້ຈະຊົງພິພາກສາທັງຄົນເປັນແລະຄົນຕາຍ ໂດຍອ້າງເຖິງການທີ່ພຣະອົງຈະຊົງສ່ອງສະຫວ່າງມາປາກົດ ແລະອ້າງເຖິງຣາຊອານາຈັກຂອງພຣະອົງວ່າ,

2ຈົ່ງເອົາໃຈໃສ່ເທດສະໜາສັ່ງສອນພຣະທຳຂອງພຣະເຈົ້າ ທັງໃນເວລາມີໂອກາດແລະບໍ່ມີໂອກາດ, ຈົ່ງຊັກຊວນດ້ວຍເຫດຜົນ, ຈົ່ງເຕືອນສະຕິແລະໜູນໃຈ ດ້ວຍຄວາມພຽນອົດທົນທຸກຢ່າງແລະໃນການສິດສອນ.

3ເພາະຈະເຖິງເວລາທີ່ຄົນຈະບໍ່ຍອມຟັງຫລັກຄຳສອນອັນແທ້ຈິງ ແຕ່ຈະປະຕິບັດຕາມຄວາມປາຖະໜາຂອງເຂົາເອງ ແລະຈະຮວບຮວມຄຳສອນໄວ້ເພື່ອຕອບສະໜອງຄວາມຕ້ອງການຂອງເຂົາ.

4ຄົນເຫຼົ່ານັ້ນ ຈະບໍ່ຟັງຄວາມຈິງອີກຕໍ່ໄປ ເຂົາຈະຫັນໄປສົນໃຈນິຍາຍເລື່ອງຕ່າງໆ.

5ແຕ່ເຈົ້າຈົ່ງລະວັງຕົນເອງໃຫ້ດີໃນທຸກສະພາບການ, ຈົ່ງອົດທົນຕໍ່ຄວາມຍາກລຳບາກ ແລະຈົ່ງເຮັດໜ້າທີ່ຂອງຜູ້ປະກາດຂ່າວປະເສີດ ຈົ່ງປະຕິບັດໜ້າທີ່ການຂອງເຈົ້ານັ້ນໃຫ້ສຳເລັດ.

6ສຳລັບເຮົານັ້ນ ເຖິງເວລາແລ້ວທີ່ຈະຕົກເປັນເຄື່ອງບູຊາ ແລະເຖິງເວລາແລ້ວທີ່ເຮົາຕ້ອງຈາກໂລກນີ້ໄປ.

7ເຮົາໄດ້ຕໍ່ສູ້ຢ່າງສຸດກຳລັງ ເຮົາໄດ້ແລ່ນແຂ່ງຂັນຈົນເຖິງທີ່ສຸດ ແລະເຮົາໄດ້ຮັກສາຄວາມເຊື່ອໄວ້ແລ້ວ.

8ແຕ່ນີ້ຕໍ່ໄປ ມົງກຸດຄືລາງວັນແຫ່ງຄວາມຊອບທຳ ຊົງຈັດໄວ້ຖ້າເຮົາແລ້ວ ຊຶ່ງອົງພຣະຜູ້ເປັນເຈົ້າ ຜູ້ພິພາກສາທີ່ຍຸດຕິທຳ ຈະຊົງປະທານແກ່ເຮົາໃນວັນນັ້ນ ແລະບໍ່ແມ່ນແກ່ເຮົາພຽງຜູ້ດຽວ ແຕ່ຈະຊົງປະທານແກ່ຄົນທັງປວງ ທີ່ມີໃຈຍິນດີໃນການຊົງສ່ອງສະຫວ່າງມາປາກົດຂອງພຣະອົງ.

9ຈົ່ງຮີບຮ້ອນໃຈມາຫາເຮົາໄວໆ.

10ເພາະວ່າເດມາໄດ້ຫລົງຮັກສິ່ງຂອງຝ່າຍໂລກເສຍແລ້ວ ແລະໄດ້ປະຖິ້ມເຮົາ ໜີໄປເມືອງເທສະໂລນິກ. ເກເຊັນໄດ້ໄປແຂວງຄາລາເຕຍ ແລະ ຕີໂຕໄດ້ໄປທີ່ເມືອງດັນມາເຕຍ.

11ມີແຕ່ລູກາເທົ່ານັ້ນ ທີ່ຢູ່ກັບເຮົາ ຈົ່ງເອົາມາຣະໂກມານຳເຈົ້າດ້ວຍ ເພາະວ່າເພິ່ນຊ່ວຍເຮົາຫລາຍໃນພາລະກິດການຮັບໃຊ້.

12ເຮົາໄດ້ໃຊ້ຕີຂີໂກໄປທີ່ເມືອງເອເຟໂຊ.

13ເມື່ອເຈົ້າມາ ຈົ່ງເອົາເສື້ອຄຸມທີ່ເຮົາໄດ້ປະໄວ້ກັບກາລະໂປ ທີ່ເມືອງໂທອາດນັ້ນມານຳດ້ວຍ ຈົ່ງເອົາໜັງສືຕ່າງໆມາເໝືອນກັນ ເປັນຕົ້ນໜັງສືທີ່ຂຽນໃສ່ແຜ່ນໜັງນັ້ນ.

14ອາເລັກຊັນເດີຊ່າງທອງແດງນັ້ນ ໄດ້ເຮັດຮ້າຍຕໍ່ເຮົາຫລາຍຢ່າງ ອົງພຣະຜູ້ເປັນເຈົ້າຈະຊົງຕອບແທນໃຫ້ສົມກັບການທີ່ລາວເຮັດນັ້ນ.

15ເຈົ້າເອງ ກໍຈົ່ງລະວັງຕົວລາວໃຫ້ດີ ເພາະລາວເວົ້າຂັດຂວາງຕໍ່ສູ້ຖ້ອຍຄຳຂອງພວກເຮົາຢ່າງຮຸນແຮງ.

16ບໍ່ມີຜູ້ໃດເຂົ້າຂ້າງເຮົາຈັກຄົນ ເມື່ອເຮົາກ່າວແກ້ຄະດີເທື່ອທຳອິດນັ້ນ ທຸກຄົນໄດ້ປະຖິ້ມເຮົາໝົດ ຂໍພຣະເຈົ້າຢ່າຖືໂທດພວກເຂົາເລີຍ

17ແຕ່ອົງພຣະຜູ້ເປັນເຈົ້າສະຖິດຢູ່ກັບເຮົາ ແລະຊູກຳລັງເຮົາຂຶ້ນ ເພື່ອໃຫ້ເຮົາສາມາດປະກາດຂ່າວປະເສີດອັນຄົບຖ້ວນ ແກ່ຄົນຕ່າງຊາດທຸກຄົນ ແລະເຮົາກໍໄດ້ຖືກຊ່ວຍກູ້ເອົາໃຫ້ພົ້ນຈາກປາກຂອງສິງໂຕ.

18ອົງພຣະຜູ້ເປັນເຈົ້າຊົງຊ່ວຍກູ້ເອົາເຮົາໃຫ້ພົ້ນຈາກຄວາມຊົ່ວຊ້າທຸກຢ່າງ ແລະນຳເຮົາເຂົ້າໄປສູ່ອານາຈັກສະຫວັນຂອງພຣະອົງຢ່າງປອດໄພ ຂໍໃຫ້ສະຫງ່າຣາສີ ຈົ່ງມີແກ່ພຣະອົງ ສືບໆໄປເປັນນິດເທີ້ນ ອາແມນ.

19ເຮົາຂໍຝາກຄວາມຄິດເຖິງ ມາຍັງປີຊະກີລາກັບອາກີລາ ແລະຄອບຄົວໂອເນຊີໂຟໂຣ.

20ເອຣາຊະໂຕ ໄດ້ຄ້າງຢູ່ທີ່ເມືອງໂກຣິນໂທ ແລະເຮົາໄດ້ປະໂທຟີໂມໄວ້ທີ່ເມືອງມີເລໂຕ ເພາະວ່າລາວປ່ວຍ.

21ຈົ່ງພະຍາຍາມມາຫາເຮົາ ກ່ອນລະດູໜາວໃຫ້ໄດ້. ຢູບູໂລ, ປູເດັນ, ລີໂນ ແລະ ກະໂລເດຍກັບພີ່ນ້ອງຄຣິສຕຽນທັງໝົດ ກໍຝາກຄວາມຄິດເຖິງມາຫາເຈົ້າເໝືອນກັນ.

22ຂໍອົງພຣະຜູ້ເປັນເຈົ້າ ຈົ່ງສະຖິດຢູ່ກັບວິນຍານຂອງເຈົ້າເທີ້ນ. ຂໍໃຫ້ພຣະຄຸນ ຈົ່ງສະຖິດຢູ່ກັບພວກເຈົ້າທຸກຄົນເທີ້ນ.

← Chapter 3 Jump to: