Zephaniah 2

Lao Bible 2012 (ພຣະຄຳພີສັກສິ)

← Chapter 1 Jump to: Chapter 3 →

1ຊົນຊາດທີ່ບໍ່ມີຢ່າງອາຍເອີຍ ຈົ່ງຮູ້ສຶກຕື່ນຕົວສາເຖີດ ກ່ອນພວກເຈົ້າຈະຖືກພັດໃຫ້ປິວໄປ ເໝືອນດັ່ງແກບຖືກລົມພັດ

2ກ່ອນຄວາມໂກດຮ້າຍເປັນໄຟເຜົາຜານຂອງພຣະເຈົ້າຢາເວ ຈະມາເຖິງພວກເຈົ້າ ຄືກ່ອນວັນທີ່ພຣະອົງຈະລະບາຍຄວາມໂກດຮ້າຍອັນໃຫຍ່ຂອງພຣະເຈົ້າຢາເວ.

3ຈົ່ງສະແຫວງຫາພຣະເຈົ້າຢາເວສາເຖີດ ພວກເຈົ້າທຸກຄົນທີ່ເປັນປະຊາຊົນ ຜູ້ຖ່ອມໃຈໃນດິນແດນ ຄືຜູ້ທີ່ເຊື່ອຟັງຂໍ້ຄຳສັ່ງຂອງພຣະອົງ. ຈົ່ງຊອກຫາຄວາມຊອບທຳ ແລະຈົ່ງຊອກຫາຄວາມຖ່ອມໃຈລົງ. ບາງທີພວກເຈົ້າອາດຈະຫລົບໜີຈາກການລົງໂທດກໍໄດ້ ໃນວັນທີ່ພຣະເຈົ້າຢາເວລະບາຍຄວາມໂກດຮ້າຍອັນໃຫຍ່ຂອງພຣະອົງນັ້ນ.

4ຈະບໍ່ມີຜູ້ໃດເຫຼືອຢູ່ໃນເມືອງກາຊາ. ອາຊະເກໂລນຈະກາຍເປັນເມືອງຮົກຮ້າງ. ປະຊາຊົນຂອງເມືອງອາຊະໂດດຈະຖືກຂັບໄລ່ໃຫ້ອອກໄປໃນເຄິ່ງມື້ ແລະຊາວເອັກໂຣນຈະຖືກຂັບໄລ່ໃຫ້ອອກໄປຈາກເມືອງຂອງພວກເຂົາ.

5ເຄາະກຳເປັນຂອງພວກເຈົ້າສາແລ້ວ ຊາວເກເຣັດເອີຍ ຄືປະຊາຊົນທີ່ຢູ່ຕາມແຄມຝັ່ງທະເລ. ຖ້ອຍຄຳຂອງພຣະເຈົ້າຢາເວໄດ້ກ່າວໂທດພວກເຈົ້າ ໂອ ການາອານດິນແດນແຫ່ງຊາວຟີລິດສະຕິນເອີຍ ພຣະອົງຈະທຳລາຍພວກເຈົ້າ ແລະຈະບໍ່ມີຜູ້ໃດໃນພວກເຈົ້າລອດຊີວິດ.

6ດິນແດນຂອງພວກເຈົ້າຕາມຊາຍທະເລຈະກາຍເປັນທົ່ງເປີດແປນ ທີ່ມີທັງຕູບຂອງພວກລ້ຽງແກະແລະຄອກແກະໃນທີ່ນັ້ນ.

7ຊາວຢູດາຜູ້ທີ່ລອດຊີວິດຈະຄຸ້ມຄອງດິນແດນຂອງພວກເຈົ້າ. ພວກເຂົາຈະລ້ຽງຝູງແກະຢູ່ທີ່ນັ້ນ ແລະນອນຢູ່ຕາມເຮືອນ ໃນເມືອງອາຊະເກໂລນ. ພຣະເຈົ້າຢາເວ ພຣະເຈົ້າຂອງພວກເຂົາ ຈະສະຖິດຢູ່ນຳພວກເຂົາ ແລະຈະເຮັດໃຫ້ພວກເຂົາຈະເລີນຮຸ່ງເຮືອງຂຶ້ນອີກ.

8“ເຮົາໄດ້ຍິນປະຊາຊົນຊາວໂມອາບແລະອຳໂມນ ດູໝິ່ນປະໝາດ ແລະເຍາະເຍີ້ຍປະຊາຊົນຂອງເຮົາ ແລະຄຸຍໂມ້ວ່າ ພວກຕົນໄດ້ຢຶດເອົາດິນແດນຂອງພວກເຂົາແລ້ວ.

9ເພາະສະນັ້ນ ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ ພຣະເຈົ້າຂອງຊາດອິດສະຣາເອນ ມີຊີວິດຢູ່ຢ່າງແນ່ແທ້ສັນໃດ ເຮົາຂໍສາບານວ່າ ໂມອາບແລະອຳໂມນຈະຖືກທຳລາຍສັນນັ້ນ ດັ່ງເມືອງໂຊໂດມແລະໂກໂມຣາ. ເມືອງເຫຼົ່ານີ້ຈະກາຍເປັນບໍ່ເກືອ ແລະຮົກຮ້າງເພພັງຕະຫລອດໄປ ຊຶ່ງຈະມີແຕ່ຫຍ້າເກີດຂຶ້ນທົ່ວໄປ. ປະຊາຊົນຂອງເຮົາຜູ້ທີ່ລອດຊີວິດຈະປຸ້ນສະດົມເມືອງຕ່າງໆ ແລະຢຶດເອົາດິນແດນຂອງພວກເຂົາ.”

10ດ້ວຍວິທີນີ້ແຫຼະ ປະຊາຊົນໂມອາບແລະອຳໂມນຈະໄດ້ຮັບໂທດ ຍ້ອນຄວາມອວດດີແລະຄວາມຈອງຫອງຂອງພວກເຂົາ ແລະຍ້ອນການດູໝິ່ນປະໝາດປະຊາຊົນຂອງພຣະເຈົ້າຢາເວອົງຊົງຣິດອຳນາດຍິ່ງໃຫຍ່.

11ພຣະເຈົ້າຢາເວຈະເຮັດໃຫ້ພວກເຂົາສະທ້ານຢ້ານກົວ. ພຣະອົງຈະທຳລາຍບັນດາພະໃນແຜ່ນດິນໂລກ ລົງສູ່ການບໍ່ມີປະໂຫຍດ ແລະຕໍ່ໄປ ທຸກໆຊົນຊາດກໍຈະນະມັດສະການພຣະອົງໃນດິນແດນຂອງຕົນເອງ.

12ພຣະອົງຍັງຈະສັງຫານປະຊາຊົນຊາວເອທິໂອເປຍ ຄືກັນ.

13ພຣະອົງຈະໃຊ້ອຳນາດຂອງພຣະອົງເພື່ອທຳລາຍເມືອງທາງທິດເໜືອຄືອັດຊີເຣຍ. ພຣະອົງຈະເຮັດໃຫ້ນີເນເວເປັນເມືອງຮົກຮ້າງເພພັງ ຄືເປັນຖິ່ນແຫ້ງແລ້ງກັນດານທີ່ແຫ້ງແລ້ງ.

14ມັນຈະກາຍເປັນບ່ອນຢູ່ຂອງຝູງແກະ, ຝູງສັດລ້ຽງ ແລະສັດນາໆຊະນິດ. ນົກເຄົ້າຈະຢູ່ໃນທີ່ນັ້ນທ່າມກາງສິ່ງຮົກຮ້າງເພພັງ ແລະສົ່ງສຽງຮ້ອງຈາກປ່ອງຢ້ຽມ. ນົກກາທັງຫລາຍຈະຮ້ອງຢູ່ຕາມຂັ້ນໄດທາງປະຕູເຂົ້າເຮືອນ. ຂື່ຂາງໄມ້ແປກທີ່ໃຊ້ໃນການກໍ່ສ້າງເຮືອນຈະເພພັງລົງ.

15ເຫດການເຊັ່ນນີ້ຈະເກີດຂຶ້ນກັບເມືອງທີ່ອວດດີອວດເກັ່ງເຖິງກຳລັງຂອງຕົນເອງ ແລະທັງຄິດວ່າຕົນປອດໄພແລ້ວ. ຊາວເມືອງຄິດວ່າ ເມືອງຂອງພວກຕົນນັ້ນຍິ່ງໃຫຍ່ທີ່ສຸດໃນໂລກ. ມັນຈະກາຍເປັນເມືອງທີ່ເປົ່າປ່ຽວ ຄືຈະເປັນບ່ອນທີ່ສັດປ່າທັງຫລາຍພັກຜ່ອນ. ທຸກໆຄົນທີ່ຍ່າງກາຍໄປມາກໍຈະຢ້ານກົວຈົນຂົນລຸກ.

← Chapter 1 Jump to: Chapter 3 →