2 Samuel 9

Lao Bible (ฉบับอักษรลาว)

← Chapter 8 Jump to: Chapter 10 →

1ດາວິດ ໜ່າຍ ກ໋າ, “ເຊົາໂລ ເຍີຍ ໂຕ້ວ ຕສົງ ມ່າຍ ມ່ຽນ ເຕສ່ງ ໄຟ ໄມ້ ມ່າຍ? ເຢຍ ອ໋ອຍ ເຫວີ່ຍ ໂຢນາທານ ວິ່ນ ຕສີ້ງ ເອນ ປຸນ ນິ່ນ.”

2ຢຽມ ເຊົາໂລ ເຍີຍ ເປຢົ໊າ ມ່າຍ ເຕົ້າ ໂປວ, ບົ໋ວ ເຫ່ວ ຊິບາ. ນິ່ນ ບົວ ເຫ່ວ ນິ່ນ ຕ້າຍ ດາວິດ ວົ້ວ. ຮູ່ງ ເຕ໋ຍ ຕສ່ຽວ ໜ່າຍ ນິ່ນ, “ເມີ່ຍ ເຊ ຊິບາ ໄຟ?” ຊິບາ ເຕົາ, “ເຕສີ໌ຍ ເຍີຍ. ເຢຍ ເຊ ຊິບາ.”

3ຮູ່ງ ເຕ໋ຍ ໜ່າຍ ກ໋າ, “ເຊົາໂລ ເຍີຍ ໂຕ້ວ ຕສົງ ຖສໍ່ ມ່າຍ ມ່ຽນ ເຕສ່ງ ໄຟ ໄມ້ ມ່າຍ, ເຫວີ່ຍ ປຸນ ເຢຍ ໄຮ່ ຕສິ໋ວ ທິນ-ຮູ່ງ ເຍີຍ ເອນ ໂຕສ໋ວ ຫລົງ ປຸນ ນິ່ນ ບົວ ໄຟ?” ຊິບາ ກ໊ອງ ບົ໋ວ ຮູ່ງ ເຕ໋ຍ, “ຖສໍ່ ມ່າຍ ເຕົ້າ ໂຢນາທານ ເຍີຍ ຕອນ. ນິ່ນ ເຍີຍ ເຕສົ໋າ ໄບ ເຍີຍ.”

4ຮູ່ງ ເຕ໋ຍ ໜ່າຍ ນິ່ນ, “ນິ່ນ ຢຽມ ຫາຍ?” ຊິບາ ກ໊ອງ, “ນິ່ນ ຢຽມ ໂລເດບາ, ຢຽມ ອຳມີເອນ ເຍີຍ ຕອນ, ມາຄີເລ, ເຍີຍ ເປຢົ໊າ.”

5ຮູ່ງ ເຕ໋ຍ ຕສ່ຽວ ພ້າຍ ມ່ຽນ ມີ່ງ ເຖົາ ໂລເດບາ, ອຳມີເອນ ເຍີຍ ຕອນ, ມາຄີເລ, ເຍີຍ ເປຢົ໊າ.

6ເຊົາໂລ ເຍີຍ ຟຸນ, ໂຢນາທານ ເຍີຍ ຕອນ, ເມຟີໂບເຊດ, ຕ້າຍ ລໍ໌ ດາວິດ ຕສ່ຽວ ພົວະ ເອຈ່ຍ ເດົາ ປ໋າຍ. ດາວິດ ກ໊ອງ, “ເມຟີໂບເຊດ ອ້າ!” ເມຟີໂບເຊດ ເຕົາ, “ເຢຍ ເຊ ເມີ່ຍ ເຍີຍ ໂປວ ອ໊ະ.”

7ດາວິດ ກ໊ອງ ບົ໋ວ ນິ່ນ, “ໄມ້ ຕູ໋ງ ກ້ຳ ເດສ໋ຍ. ເຢຍ ຕສູ໊ງ ອ໋ອຍ ເຫວີ່ຍ ເມີ່ຍ ເຍີຍ ເຕຍ, ໂຢນາທານ, ໂຕສ໋ວ ຫລົງ ປຸນ ເມີ່ຍ. ເຢຍ ອ໋ອຍ ເຕສ໊າະ ເມີ່ຍ ເຍີຍ ອົງ, ເຊົາໂລ, ເຍີຍ ຢຽດ ຕສູ໊ງ ເດົາ ຝູງ ດສ໋ວນ ປຸນ ເມີ່ຍ. ເມີ່ຍ ຢ່າ ຕຸ໊ ຕສັ່ນໆ ຈວັ່ງ ເຢຍ ເຍີຍ ເຕ້ຍ ຫຍັ່ນ ຫຮນາງ.”

8ເມຟີໂບເຊດ ແອ໋ງ ປ໋າຍ ຮູ່ງ ເຕ໋ຍ ກ໊ອງ, “ເຢຍ, ເມີ່ຍ ເຍີຍ ໂປວ, ຕ໋ອງ ຮນັ້ງ ຢຽດ ເຕົ້າ ຈູ໊-ໄຕ່. ຮູ່ງ ເຕ໋ຍ ຝູ່ງ ດົ່ງ ໜ່າຍ ຄໍ້-ລ່ຽນ ເຢຍ?”

9ຮູ່ງ ເຕ໋ຍ ແອ໋ງ ເຫ່ວ ເຊົາໂລ ເຍີຍ ໂປວ, ຊິບາ, ຕ້າຍ ກ໊ອງ ບົ໋ວ ນິ່ນ, “ຕະຟ່ານ ເຊົາໂລ ເຖສົາ ນິ່ນ ເຍີຍ ໂຕ້ວ ຕສົງ ເຍີຍ ຢຽດ ຕສູ໊ງ ກະນ້າຍ ເຢຍ ຈິວ ປຸນ ເມີ່ຍ ເຍີຍ ຕສ໊ຽວ ເຍີຍ ຟຸນ.

10ເມີ່ຍ ເຖສົາ ເມີ່ຍ ເຍີຍ ຕອນ, ເມີ່ຍ ເຍີຍ ໂປວ, ອ໋ອຍ ຕສຸ ເຖງ ເມີ່ຍ ເຍີຍ ຕສ໊ຽວ ເຍີຍ ຟຸນ ໂຕສ໋ວ ລີ່ງ ເຕີ່ຍ, ຊຽວ ແກງ-ຕສວັ໋ງ ຕ້າຍ ເຫວີ່ຍ ປຸນ ເມີ່ຍ ເຍີຍ ຕສ໊ຽວ ເຍີຍ ຟຸນ ມ່າຍ ຫຍັ່ນ ຮົບ. ມປ່າ ເມີ່ຍ ເຍີຍ ຕສ໊ຽວ ເຍີຍ ຟຸນ, ເມຟີໂບເຊດ, ອ໋ອຍ ຕສຸ ຕສັ່ນໆ ເຕສວີ໌ຍ ເຢຍ ເຍີຍ ເຕ້ຍ ຫຍັ່ນ ຫຮນາງ.” ຊິບາ ມ່າຍ ຕສຽບ ຮມ໌ ເຕົ້າ ຕອນ ເຖສົາ ຫຍີ່ ຕສຽບ ເຕົ້າ ໂປວ.

11ຊິບາ ກ໊ອງ ບົ໋ວ ຮູ່ງ ເຕ໋ຍ, “ຕະຟ່ານ ເຢຍ ເຍີຍ ຕສ໊ຽວ, ຮູ່ງ ເຕ໋ຍ, ພ້າຍ ເຢຍ, ເມີ່ຍ ເຍີຍ ໂປວ, ເຢຍ, ເມີ່ຍ ເຍີຍ ໂປວ, ຕສ່ຽວ ເອີຍ ຈ໊ຽນ ໂຕສ໋ວ.” ເມຟີໂບເຊດ ຕສ່ຽວ ຢຽມ ຮູ່ງ ເຕ໋ຍ ເຍີຍ ເຕ້ຍ ຫຍັ່ນ ຮນັ້ງ ຮູ່ງ ເຕ໋ຍ ເຍີຍ ຢຽດ ເຕົ້າ ຕອນ ນໍ.

12ເມຟີໂບເຊດ ມ່າຍ ເຕົ້າ ຕອນ-ໄຝ ເຫ່ວ ມີຄາ. ຢຽມ ຊິບາ ເຍີຍ ເປຢົ໊າ ເຍີຍ ເຕົ້າໆ ມ່ຽນ ຢຽດ ຕສູ໊ງ ໂຕສ໋ວ ເມຟີໂບເຊດ ເຍີຍ ໂປວ.

13ຮນັ້ງ ໜ່າຍ ເມຟີໂບເຊດ ຢຽມ ເຢລູຊາເລມ, ເຫວີ່ຍ ຕສຸ ນິ່ນ ຕສັ່ນໆ ຢຽມ ຮູ່ງ ເຕ໋ຍ ເຍີຍ ເຕ້ຍ ຫຍັ່ນ ຫຮນາງ. ນິ່ນ ເຍີຍ ອີ ເຈັ໊ຍ ເຕສົ໋າ ຕສູ໊ງ ໄບ ເຍີຍ.

← Chapter 8 Jump to: Chapter 10 →