2 Timothy 1

Lao Bible (ฉบับอักษรลาว)

Jump to: Chapter 2 →

1ເຢຍ, ເປົາໂລ, ເອີຍ ທິນ-ຮູ່ງ ເຍີຍ ຕສະເອີ໋ຍ ໂຕສ໋ວ ກີຕູ່ ເຢຊູ ເຍີຍ ກົງ-ໂຕສ້ ເຫວີ່ຍ ຕສຸ້ນ ທິນ-ຮູ່ງ ແລ໌ງ ປຸນ ເຍີຍ ແໝ່ງ, ຕົ້ງ ມ່ຽນ ເຂົາ ກີຕູ່ ເຢຊູ ຕຸ໊ ຕ້າຍ ເຍີຍ ຕສຢັ້ງ ແໝ່ງ.

2ເຢຍ ເຟ້ຍ ຝຽນ ປຸນ ເຢຍ ຮນ້ຳ ໄຫ່ ເຍີຍ ຕອນ, ທິໂມໄທ. ໂທ້ ຕສັ່ງ ເຕ໋ຍ ທິນ-ຮູ່ງ ເຖສົາ ບົວ ເຍີຍ ຕສ໊ຽວ ກີຕູ່ ເຢຊູ ຄໍ້-ລ່ຽນ ເມີ່ຍ, ເຖສີຍ ເອນ ເຖສີຍ ແປ້ງ ອອນ ປຸນ ເມີ່ຍ.

3ເຢຍ ແລ໌ງ ຕສີ້ງ ທິນ-ຮູ່ງ, ຕົ້ງ ເຢຍ, ຮນັ້ງ ເຢຍ ເຍີຍ ອົງ-ຖາຍ ບົວ ນໍ, ຫລົ່ງ ທສີງ-ເດສ່ງ ໂຮຍ້ວ ຟູ-ສູ ວົ້ວ ເຕົ້າ. ເຢຍ ຮນອຍໆ ມ໌ວນໆ ເຕົ໋າ ເກົ໋າ ເຍີຍ ຕສຢັ້ງ ໂຫ່ ເຢຍ ຕສັ່ນໆ ຈັ໋ງ ຕສຸ ເມີ່ຍ.

4ເຢຍ ຈັ໋ງ ຕສຸ ເມີ່ຍ ຍ້ຽມ ເຍີຍ ວວມ-ເໝວີ່ຍ ຕສ່ຽວ ຕສະເກ້ງ! ອ໋ອຍ ປວັດ ເມີ່ຍ ໄຫ່. ຕຸ໊ ປວັດ ເມີ່ຍ ນໍ, ເຢຍ ຕສ່ຽວ ອຈຽນ-ໂຢ້ວ ອອນ-ເຫລາະ ອ໊ະ.

5ເຢຍ ຈັ໋ງ ຕສຸ ເມີ່ຍ ຕສຽນໆ ເຍີຍ ສຽນ, ຮນັ້ງ ຕສິ້ນ ດ່າງ ເມີ່ຍ ເຍີຍ ຕາ ກູ໋, ໂລອິດ, ເຖສົາ ເມີ່ຍ ເຍີຍ ມາ, ຢູນິດ, ຕສຽນໆ ສຽນ ວົ້ວ ນໍ. ເຢຍ ສຽນ ຕີ່ງ ເມີ່ຍ ອີ້ ຕສັ່ນ ຢ່າ ຮນັ້ງ ວົ້ວ ນໍ ສຽນ.

6ເຫວີ່ຍ ນ້າຍ ເຢຍ ເຖງ ເມີ່ຍ ຈັ໋ງ ຈ໊ຽນ ເຢຍ ມານ ຈ໊ຽນ ເມີ່ຍ ວົ້ວ ຕສັ່ນ, ທິນ-ຮູ່ງ ເຖສີຍ ປຸນ ເຍີຍ ຕສີ້ງ ເຫຍີ່ຍ, ເມີ່ຍ ອ໋ອຍ ຕສຸ ປຸນ ຮນັ້ງ ໂຕ໌ວ ນໍ ຫຮຢາງ ຕ້າຍ.

7ທິນ-ຮູ່ງ ເຖສີຍ ປຸນ ບົວ ເຊ ໄມ້ ເຕສີ໌ຍ ກ້ຳ ເດສ໋ຍ ເຍີຍ ໂຮຍ້ວ. ນິ່ນ ປຸນ ບົວ ເຍີຍ ໂຮຍ້ວ ມ່າຍ ທຈະ, ປຸນ ບົວ ຮນ້ຳ ມ່ຽນ, ຢ່າ ໄຮ່ ກຸ໊ນ ຕຸ໊ ກັ້ນ.

8ຮນັ້ງ ໜ່າຍ, ໄມ້ ຕູ໋ງ ໄຍ້ ເຖງ ບົວ ເຍີຍ ຕສ໊ຽວ ເຢຊູ ໂຕສ໋ວ ຕສອງ-ເຕສ໋ງ. ເຢຍ ເຫວີ່ຍ ກີຕູ່ ຕສຸ ຫວວນ ຈ໊ຽນ ໂລ່, ເມີ່ຍ ຢ່າ ໄມ້ ຕູ໋ງ ເຫວີ່ຍ ເຢຍ ໄຍ້. ຕ໋າວ ດສ໋ວນ ເມີ່ຍ ຢ່າ ອ໋ອຍ ຕສຸ ເຂົາ ທິນ-ຮູ່ງ ເຍີຍ ທຈະ ເຫວີ່ຍ ຄູ້ ຝຽນ ມ່າຍ ປ່ວນ ສ່ຽວ ໂຄ້ວ.

9ທິນ-ຮູ່ງ ໂອຈ໋ວ ບົວ, ຢ່າ ເຫ່ວ ບົວ ຕ້າຍ ໂຕສ໋ວ ນິ່ນ ເຍີຍ ທສີງ-ເດສ່ງ ມ່ຽນ, ໄມ້ ເຕສີ໌ຍ ເຫວີ່ຍ ບົວ ໂຕສ໋ວ ເຍີຍ ຫາຍ ຫຍູ່ງ ຄູ້ ສີ່, ເຊ ເອີຍ ນິ່ນ ກັ້ນ ເຍີຍ ຕສະເອີ໋ຍ ເຖສົາ ນິ່ນ ເຍີຍ ເອນ ຮນັ້ງ. ນ້າຍ ຫຍູ່ງ ເອນ, ຢຽມ ຕົ້ງ ທສໍ ໝ່ານ ໂກ໊ວ ໝ່ານ ຕ່ອຍ ວົ້ວ ຕສັ່ນ ທິນ-ຮູ່ງ ຫລົ່ງ ກີຕູ່ ເຢຊູ ເຖສີຍ ປຸນ ບົວ.

10ມປ່າ ອີ້ ຕສັ່ນ ບົວ ເຍີຍ ໂອຈ໋ວ ຕສ໊ຽວ ກີຕູ່ ເຢຊູ ເອຈ່ຍ ຕ້າຍ ປິ໋ວ ເມ່ງ ນ້າຍ ຫຍູ່ງ ເອນ, ເຫວີ່ຍ ຕສຸ ກີຕູ່ ໝຽດ ເດສ່ງ ໄຕ່ ເຍີຍ ທຈະ, ຢ່າ ຫລົ່ງ ຄູ້ ຝຽນ ປຸນ ມ່ຽນ ຮິ້ວ ຕຸ໊ ຢຽດ ລິ໌ວ ໄມ້ ໄຮ່ ໄຕ່ ເຍີຍ ແໝ່ງ.

11ທິນ-ຮູ່ງ ພ້າຍ ເຢຍ ໂຕສ໋ວ ຕສຸ້ນ ໂຕ໌ ມ່ຽນ, ໂຕສ໋ວ ກົງ-ໂຕສ້ ຢ່າ ໂຕສ໋ວ ຟິນ-ແຊງ ຕສຸ້ນ ນ້າຍ ຄູ້ ຝຽນ.

12ເຫວີ່ຍ ນ້າຍ ຄູ້ ຝຽນ ເຢຍ ອີ້ ຕສັ່ນ ຮນັ້ງ ນ້າຍ ນໍ ສ່ຽວ ໂຄ້ວ. ມປ່າ ເຢຍ ໄມ້ ໄຍ້, ເຫວີ່ຍ ຕສຸ ຮິ້ວ ຕຸ໊ ເຢຍ ສຽນ ເຍີຍ ເຊ ຫາຍ ເຕົ້າ ຢ່າ ຮິ້ວ ຕີ່ງ ເຢຍ ຈິວ ປຸນ ນິ່ນ ເຍີຍ, ນິ່ນ ໄຮ່ ເປວ ຈ໊ຽນ ເຖົາ ຊ້ຽມ ຕສຸ໌ຍ ວົ້ວ ນອມ ຮນອຍ.

13ອ໋ອຍ ຕສຸ ຫລົ່ງ ເມີ່ຍ ໄຮ໌ ເຢຍ ອຈ໋າວ ເຈ໋ຍ ເຍີຍ ຕສຽນ ຫວ່າ ໂຕສ໋ວ ຫຍູ່ງ ເຕສີ໊ຍ. ຢ່າ ອ໋ອຍ ຕສຸ ເຂົາ ກີຕູ່ ເຢຊູ ຕຸ໊ ຕ້າຍ ເຍີຍ ສຽນ ຟິມ ເຖສົາ ຮນ້ຳ ມ່ຽນ ເຍີຍ ໂຮຍ້ວ ເອີຍ ຈ໊ຽນ ໂຕສ໋ວ.

14ສີງ ລີ່ງ ຢຽມ ບົວ ກະຍົ໌ວ. ອ໋ອຍ ຕສຸ ເຂົາ ສີງ ລີ່ງ ໂກ໋ວ ຈ໊ຽນ ຈິວ ປຸນ ເມີ່ຍ ເຍີຍ ຕສຽນ ເລີ໌ຍ.

15ເມີ່ຍ ຮິ້ວ ຕຸ໊ ເອເຊຍ ແຊ້ງ ເຍີຍ ມ່ຽນ ຢຽດ ຕສູ໊ງ ກວັ່ງ ເຢຍ ເດສ່ງ, ລ່ຽມ ຟີເຈລັດ ເຖສົາ ເຮໂມເກເນດ ກວັ່ງ ເຢຍ.

16ເຢຍ ໂທ້ ຕສ໊ຽວ ຄໍ້-ລ່ຽນ ໂອເນສິໂຟລັດ ວົ້ວ ເປຢົ໊າ ມ່ຽນ ເຫວີ່ຍ ຕສຸ ໂອເນສິໂຟລັດ ນຸ໌ນ ເຢຍ ເຍີຍ ໂຮຍ້ວ ເຕສ໋ຍ ດສຸ່ນ. ເຢຍ ຕສຸ ຫລິ່ມ ໂດ້ ຈ໊ຽນ, ນິ່ນ ຢ່າ ໄມ້ ໄຍ້.

17ຢ໊ຽດ ເຖົາ ໂລມາ ຕສີ້ງ ນິ່ນ ຕສ່ຽວ ເອຈ່ຍ ທຈະ ຕສິ້ມ ລໍ໌ ເຢຍ, ຢ່າ ລໍ໌ ເຖົາ ປວັດ.

18ເມີ່ຍ ຢ່າ ຮິ້ວ ຕຸ໊ ຢຽມ ເອເຟໂຊ ຕສີ້ງ ວົ້ວ ຕສັ່ນ ນິ່ນ ເຖງ ເຢຍ ດົ່ງ ຫາຍ ທສ້ຳ! ເຢຍ ຕສ່ຽວ ໂທ້ ຕສ໊ຽວ, ເຖົາ ຊ້ຽມ ຕສຸ໌ຍ ວົ້ວ ຮນອຍ, ອ໋ອຍ ຕສຸ ຄໍ້-ລ່ຽນ ນິ່ນ.

Jump to: Chapter 2 →