Ephesians 5

Lao Bible (ฉบับอักษรลาว)

← Chapter 4 Jump to: Chapter 6 →

1ເຫວີ່ຍ ຕສຸ ເມີ່ຍ ບົວ ໂຕສ໋ວ ທິນ-ຮູ່ງ ຮນ້ຳ ໄຫ່ ເຍີຍ ນ່າມ ໂຍ໌ວ ອ໋ອຍ ຕສຸ ຕສວດ ນິ່ນ ເຍີຍ ຫຍູ່ງ ໂຕສ໋ວ.

2ເມີ່ຍ ບົວ ໂຕສ໋ວ ຫຍູ່ງໆ ສີ່ ອ໋ອຍ ຕສຸ ຮນ້ຳ ມ່ຽນ ຮນັ້ງ ກີຕູ່ ຮນ້ຳ ບົວ, ເຫວີ່ຍ ບົວ ເຊ້ຍ ແໝ່ງ, ຮນັ້ງ ເຕສ໊າະ ດາງ ເຍີຍ ກະນ້າຍ ຝົ່ງ ຫໍ່ ເຕສ່ຍ ປຸນ ທິນ-ຮູ່ງ ນໍ.

3ເມີ່ຍ ບົວ ໂຕສ໋ວ ທິນ-ຮູ່ງ ເຍີຍ ມ່ຽນ ຕສ່ຽວ ຢຽມ ເມີ່ຍ ບົວ ບຸດົ໋ງ ໄມ້ ຕູ໋ງ ໂຕສ໋ວ, ລ່ຽມ ໄມ້ ຕູ໋ງ ກ໊ອງ ເຖົາ ປວັ້ງ ລ່ຽວ ເຍີຍ ສີ່, ໄຟ ໄມ້ ທສີງ-ເດສ່ງ ເຍີຍ ສີ່, ໄຟ ເມົ້າ ກະນ້າຍ ເຍີຍ ສີ່.

4ເມີ່ຍ ບົວ ຢ່າ ໄມ້ ຫອບ ຕສຸ ຄວັ້ນ ທຽນ ກ໊ອງ ຫວ່າ-ຕສ່ານ, ໄຟ ຫວ່າ-ໂທສວ ໄຟ ຫາຍ ຫຍູ່ງ ພະລີ ພະຫລາຍ ເຍີຍ ຫວ່າ. ຫອບ ຕສຸ ກ໊ອງ ຫວ່າ ແລ໌ງ ຕສີ້ງ ທິນ-ຮູ່ງ ເກົ້າ ຫລົງ.

5ເມີ່ຍ ບົວ ອ໋ອຍ ຕສຸ ຮິ້ວ ຕີ່ງ, ຫາຍ ເຕົ້າ ໂຕສ໋ວ ປວັ້ງ ລ່ຽວ ເຍີຍ ສີ່, ໄຟ ໂຕສ໋ວ ໄມ້ ທສີງ-ເດສ່ງ ເຍີຍ ສີ່, ໄຟ ເມົ້າ ກະນ້າຍ, (ເຫວີ່ຍ ຕສຸ ເມົ້າ ກະນ້າຍ ເຊ ຕ໋ອງ ປ໋າຍ ໝິ່ວ-ຝັງ,) ວົ້ວ ເຕົ້າ ຕສູ໊ງ ໄມ້ ມ່າຍ ປ່ວນ ຢຽມ ກີຕູ່ ເຖສົາ ທິນ-ຮູ່ງ ເຍີຍ ກົ໊ວະ.

6ໄມ້ ຕູ໋ງ ປຸນ ຫາຍ ເຕົ້າ ຫລົ່ງ ຂູງ-ຫວ່າ ດົ໊ວ ເມີ່ຍ ບົວ. ເຊ ຫລາຍ ນ້າຍ ຫຍູ່ງ ສີ່ ທິນ-ຮູ່ງ ໂນ໌ວ ໄຫ່, ໄມ້ ໝວັງ ນິ່ນ ເຍີຍ ຫວ່າ ວົ້ວ ເຕີ໋ຍ ມ່ຽນ.

7ເຫວີ່ຍ ນ້າຍ, ໄມ້ ຕູ໋ງ ເຖສົາ ນ້າຍ ຫຍູ່ງ ມ່ຽນ ໂຕສ໋ວ ຕ່ອຍ.

8ຕສິ້ນ ດ່າງ ເມີ່ຍ ບົວ ຢຽມ ຫຮມວັງ ມປ່າ ອີ້ ຕສັ່ນ ເມີ່ຍ ບົວ ສຽນ ຕສ໊ຽວ ເມີ່ຍ ບົວ ຕສ່ຽວ ຢຽມ ອຈັງ ກະຍົ໌ວ. ຮນັ້ງ ໜ່າຍ, ເມີ່ຍ ບົວ ອ໋ອຍ ຕສຸ ໂຕສ໋ວ ຜຸຍ ຢຽມ ອຈັງ ເຍີຍ ມ່ຽນ,

9ເຫວີ່ຍ ຕສຸ ຢຽມ ອຈັງ ທສວດ ເຍີຍ ເຊ ຫຍູ່ງໆ ຫລົງ ເຍີຍ, ຫອບ ເຍີຍ, ເຖສົາ ຕສຽນ ເຍີຍ ສີ່ ຮນັ້ງ.

10ເມີ່ຍ ບົວ ອ໋ອຍ ຕສຸ ສຳ ໝັ່ງ ກ໋າ ໄຮ່ ໂຕສ໋ວ ຫາຍ ຫຍູ່ງ ເຫວີ່ຍ ປຸນ ຕສ໊ຽວ ອະເຮນີ້ຍ.

11ໄມ້ ຕູ໋ງ ເຖສົາ ຢຽມ ຫຮມວັງ ເຍີຍ ມ່ຽນ ໂຕສ໋ວ ນິ່ນ ບົວ ໄມ້ ລ່ຳ ຫລົ່ງ ເຍີຍ ສີ່. ຕ໋າວ ດສ໋ວນ ອ໋ອຍ ຕສຸ ປຸນ ນ້າຍ ເຕີ໋ຍ ສີ່ ທສວດ ຢ້າງ ຕ້າຍ,

12ເຫວີ່ຍ ຕສຸ ລ່ຽມ ກ໊ອງ ເຖົາ ນິ່ນ ບົວ ປີ໋ງ ຈ໊ຽນ ໂຕສ໋ວ ເຍີຍ ສີ່ ຕສູ໊ງ ໄຍ້ ໄຫ່ ອ໊ະ.

13ອຈັງ ຕສິ໋ວ ຈ໊ຽນ ຫາຍ ຫຍູ່ງ, ວົ້ວ ຫຍູ່ງ ຕສ່ຽວ ປວັດ ຕຸ໊ ຕສຽນ,

14ເຫວີ່ຍ ຕສຸ ອຈັງ ຕສິ໋ວ ຫາຍ ຫຍູ່ງ, ວົ້ວ ຫຍູ່ງ ຕສ່ຽວ ອຈັງ ອ໊ະ. ເຫວີ່ຍ ນ້າຍ ມ່າຍ ໂຈ໋ວ ຫວ່າ ກ໊ອງ, “ມອຈ້ອມ ເຍີຍ ມ່ຽນ ອ້າ! ເຍຍ ຕ້າຍ ມ່າະ! ໄຕ່ ມີ່ງ ເຍີຍ ມ່ຽນ ນັ່ງ ຕ້າຍ ມ່າະ! ກີຕູ່ ຕສ່ຽວ ຕສິ໋ວ ຈ໊ຽນ ອຈັງ ເມີ່ຍ.”

15ຮນັ້ງ ໜ່າຍ, ເມີ່ຍ ບົວ ຢຽມ ເສີຍ ຕສັ່ງ ອ໋ອຍ ຕສຸ ໄຝ ຟິມ ເມີ່ຍ ບົວ ຮນັ້ງ ຫາຍ ນໍ ຢຽມ. ໄມ້ ຕູ໋ງ ຮນັ້ງ ມ່ຽນ ຫຮງົງ ມ່ຽນ, ອ໋ອຍ ຕສຸ ຮນັ້ງ ທສົງ-ເມ່ງ ເຍີຍ ມ່ຽນ ວົ້ວ ນໍ.

16ອ໋ອຍ ຕສຸ ຫລົ່ງ ຕຸ໊ ຫອບ ຕສຢັ້ງ ໂຫ່, ເຫວີ່ຍ ຕສຸ ອີ້ ຕສັ່ນ ເຍີຍ ຫຍຸດ ເຕສີ໊ຍ ເຊ ເອ໊າະ ໄຫ່.

17ໄມ້ ຕູ໋ງ ໂຕສ໋ວ ມ່ຽນ ຫຮງົງ ມ່ຽນ. ອ໋ອຍ ຕສຸ ເມ່ງ ແປະ ຕສ໊ຽວ ເຍີຍ ຕສະເອີ໋ຍ ຮນັ້ງ ຫາຍ ນໍ.

18ໄມ້ ຕູ໋ງ ຮົບ ຕິ໊ວ ອກວິນ. ຕິ໊ວ ເຊ ປຸນ ມ່ຽນ ໂຕສ໋ວ ຫວ່າຍ ສີ່. ຕ໋າວ ດສ໋ວນ ອ໋ອຍ ຕສຸ ປຸນ ສີງ ລີ່ງ ຢຽມ ປວັ໊ງ ໂຮຍ້ວ.

19ອ໋ອຍ ຕສຸ ຫລົ່ງ ສີງ ດສູງ, ເທສງ ທິນ-ຮູ່ງ ເຍີຍ ດສູງ, ເຖສົາ ສີງ ລີ່ງ ປຸນ ມ່ຽນ ເປ໋ນ ທສວດ ເຍີຍ ດສູງ, ລ່ານ ເຖສົາ ລ່ານ ກ໊ອງ. ຢ່າ ອ໋ອຍ ຕສຸ ຫລົ່ງ ໂຮຍ້ວ ປ໋າວ ດສູງ ເທສງ ຕສ໊ຽວ.

20ຢ່າ ອ໋ອຍ ຕສຸ ເຕ໊ງ ບົວ ຕສ໊ຽວ ເຢຊູ ກີຕູ່ ເຍີຍ ບົ໋ວ ຕສັ່ນໆ ເຫວີ່ຍ ໝ່ານ ສີ່ ແລ໌ງ ຕສີ້ງ ຕສັ່ງ ເຕ໋ຍ ທິນ-ຮູ່ງ.

21ເມີ່ຍ ບົວ ອ໋ອຍ ຕສຸ ລ່ານ ບົວະ ລ່ານ ເຫວີ່ຍ ຕສຸ ເມີ່ຍ ບົວ ລົ່ມ ດສ້ອຍ ທ່າຍ ກີຕູ່.

22ເມີ່ຍ ບົວ ໂຕສ໋ວ ເອົ໊າ ເຍີຍ ມ່ຽນ ອ້າ! ເມີ່ຍ ບົວ ອ໋ອຍ ຕສຸ ບົວະ ກັ້ນ ເຍີຍ ໂອກ໋ ຮນັ້ງ ເມີ່ຍ ບົວ ບົວະ ຕສ໊ຽວ ເຢຊູ ວົ້ວ ນໍ.

23ເຫວີ່ຍ ຕສຸ ໂອກ໋ ໂຕສ໋ວ ເອົ໊າ ເຍີຍ ມອກ໊ອງ ຮນັ້ງ ກີຕູ່ ໂຕສ໋ວ ຈິວ-ປາງ ເຍີຍ ມອກ໊ອງ ວົ້ວ ນໍ. ຈິວ-ປາງ ໂຕສ໋ວ ກີຕູ່ ເຍີຍ ຊິນ, ກີຕູ່ ຢ່າ ໂຕສ໋ວ ຈິວ-ປາງ ເຍີຍ ໂອຈ໋ວ ຕສ໊ຽວ.

24ຈິວ-ປາງ ຮນັ້ງ ຫາຍ ນໍ ບົວະ ກີຕູ່, ເອົ໊າ ຢ່າ ອ໋ອຍ ຕສຸ ຮນັ້ງ ວົ້ວ ນໍ ຢຽມ ໝ່ານ ສີ່ ບົວະ ນິ່ນ ເຍີຍ ໂອກ໋.

25ໂຕສ໋ວ ໂອກ໋ ເຍີຍ ມ່ຽນ ອ້າ! ອ໋ອຍ ຕສຸ ຮນ້ຳ ກັ້ນ ເຍີຍ ເອົ໊າ ຮນັ້ງ ກີຕູ່ ຮນ້ຳ ຈິວ-ປາງ, ຢ່າ ເຫວີ່ຍ ຈິວ-ປາງ ເຊ້ຍ ນິ່ນ ເຍີຍ ແໝ່ງ

26ເຫວີ່ຍ ປຸນ ຈິວ-ປາງ ທສີງ-ເດສ່ງ ຕ້າຍ. ນິ່ນ ຫລົ່ງ ວວມ ຢ່າ ຫລົ່ງ ນິ່ນ ເຍີຍ ໂຕ໌ ດສ໋າວ ຈິວ-ປາງ

27ເຫວີ່ຍ ເຕສ໊າະ ຈິວ-ປາງ ຝູງ ປຸນ ນິ່ນ ກັ້ນ, ເປ໋ນ ອຈັງ-ຫລ່າງ ເຍີຍ ຈິວ-ປາງ, ໄມ້ ໄລ່ ຮລົບ, ໄມ້ ເຫຍົ່າ, ໄມ້ ຫວ່າຍ ຝັງ, ມປ່າ ທສີງ-ເດສ່ງ ເຍີຍ, ໄມ້ ລ່ຳ ຕ້ານ ຕ໋ອງ ເຍີຍ ຈິວ-ປາງ.

28ຟີ່ ຮນັ້ງ ເຍີຍ, ໂອກ໋ ອ໋ອຍ ຕສຸ ຮນ້ຳ ກັ້ນ ເຍີຍ ເອົ໊າ ຮນັ້ງ ຮນ້ຳ ກັ້ນ ເຍີຍ ຊິນ ນໍ. ຫາຍ ເຕົ້າ ຮນ້ຳ ກັ້ນ ເຍີຍ ເອົ໊າ ຕສ່ຽວ ຮນ້ຳ ນິ່ນ ກັ້ນ ອ໊ະ.

29ໄມ້ ມ່າຍ ຫາຍ ເຕົ້າ ດສອງ ກັ້ນ ເຍີຍ ຊິນ, ຕສູ໊ງ ຫວຸຍ ຫລົງ ຢ່າ ໂກ໋ວ ຈ໊ຽນ ຮນັ້ງ ກີຕູ່ ໂກ໋ວ ຈິວ-ປາງ ວົ້ວ ນໍ.

30ເຫວີ່ຍ ຕສຸ ບົວ ເຕົ້າໆ ໂຕສ໋ວ ກີຕູ່ ເຍີຍ ຊິນ ເຍີຍ ຢຽດ ຫຍູ່ງ.

31ຮນັ້ງ ກີງ-ໂຊວ ເຟ້ຍ ຈ໊ຽນ ກ໊ອງ ນ້າຍ ໂຈ໋ວ ຫວ່າ, “ເຫວີ່ຍ ນ້າຍ ມຈັ່ງ ຕອນ ຕອງ ຈາ, ເລີ່ຍ ນິ່ນ ເຍີຍ ເຕ໋ຍ ໝ່າ, ເຖສົາ ຈ໊ຽນ ນິ່ນ ເຍີຍ ເອົ໊າ ເປ໋ນ ຢຽດ ເຕົ້າ ໝີ່ ອ໊ະ.”

32ຢຽມ ນ້າຍ ເຕີ໋ຍ ຫວ່າ ກະຍົ໌ວ ມ່າຍ ຕິ້ວ ໂຮລ ໄຫ່ ເຍີຍ ຕສຽນ ເລີ໌ຍ ອີ້ ຕສັ່ນ ບຢ໋າງ ຢ້າງ ທສວດ ຕ້າຍ ອ໊ະ. ເອີຍ ເຢຍ ກັ້ນ ເມ່ງ ແປະ ນໍ, ນ້າຍ ເຕີ໋ຍ ຫວ່າ ກ໊ອງ ຕສຸ ກີຕູ່ ເຖສົາ ຈິວ-ປາງ.

33ມປ່າ ນ້າຍ ເຕີ໋ຍ ຫວ່າ ຢ່າ ກ໊ອງ ຕສຸ ເມີ່ຍ ບົວ. ເມີ່ຍ ບົວ ເຕົ້າໆ ໂຕສ໋ວ ໂອກ໋ ເຍີຍ ມ່ຽນ ອ໋ອຍ ຕສຸ ຮນ້ຳ ກັ້ນ ເຍີຍ ເອົ໊າ ຮນັ້ງ ຮນ້ຳ ກັ້ນ ນໍ. ເອົ໊າ ຢ່າ ອ໋ອຍ ຕສຸ ທ່າຍ ກັ້ນ ເຍີຍ ໂອກ໋.

← Chapter 4 Jump to: Chapter 6 →