Galatians 6

Lao Bible (ฉบับอักษรลาว)

← Chapter 5 Jump to:

1ຕສວັ໋ງ ກໍ໋-ໂຢ໌ວ ອ່າ, ເຊ ກ໊ອງ ເຕສ໊າະ ຕຸ໊ ຫາຍ ເຕົ້າ ຕ່ອງ ຫາຍ ຫຍູ່ງ ຕສຸ໌ຍ, ເມີ່ຍ ບົວ ເອີຍ ສີງ ລີ່ງ ໂຕສ໋ວ ເຍີຍ ມ່ຽນ ອ໋ອຍ ຕສຸ ຫລົ່ງ ສ່ວນ ໂຮຍ້ວ ຕໍ້ ນິ່ນ ດສ໋ວນ ຕ້າຍ ໂຕສ໋ວ ຫອບ. ມປ່າ ເມີ່ຍ ບົວ ອ໋ອຍ ຕສຸ ໄຝ ຟິມ. ເດສ໋ຍ ກັ້ນ ຢ່າ ຕສຸ ດົ໊ວ ໂຕສ໋ວ ຕ່ອງ.

2ຫາຍ ເຕົ້າ ມ່າຍ ຫາຍ ຫຍູ່ງ ສີ່ ອ໋ອຍ ຕສຸ ລ່ານ ເຖງ ລ່ານ ດາມ. ຮນັ້ງ ໜ່າຍ ເມີ່ຍ ບົວ ຕສ່ຽວ ເອີຍ ຈ໊ຽນ ກີຕູ່ ເຍີຍ ຫລີ່ງ ໂຕສ໋ວ.

3ຫາຍ ເຕົ້າ ໄມ້ ເຕສີ໌ຍ ຫລົ່ງ ຈ໊ຽນ ເຍີຍ ມ່ຽນ ມປ່າ ທ່າຍ ກັ້ນ ໂຕສ໋ວ ຫລົ່ງ ຈ໊ຽນ ເຍີຍ ມ່ຽນ ນໍ, ວົ້ວ ເຕົ້າ ຂູງ ດົ໊ວ ກັ້ນ ຮນັ້ງ.

4ເກ໊າະ-ມ່ຽນ ອ໋ອຍ ຕສຸ ຕສ້າ ກັ້ນ ໂຕສ໋ວ ເຍີຍ ສີ່. ໂຕສ໋ວ ຕຸ໊ ຫລົງ, ນິ່ນ ຕສ່ຽວ ໄຮ່ ອະເຮນີ້ຍ ກັ້ນ ຢ່າ ໄມ້ ຕສຸ ຕໍ້ ມີ່ງ ເປີ໊ຍ ກັ້ນ ເຕົ້າ ໂຕສ໋ວ ເຍີຍ.

5ເຫວີ່ຍ ຕສຸ ເກ໊າະ-ມ່ຽນ ມ່າຍ ເກ໊າະ-ມ່ຽນ ເຍີຍ ປ່ວນ ອ໋ອຍ ຕສຸ ດາມ.

6ຫາຍ ເຕົ້າ ຕຸ໊ ມ່ຽນ ອຈ໋າວ ກີຕູ່ ເຍີຍ ໂຕ໌, ນິ່ນ ມ່າຍ ເຍີຍ ຫຍູ່ງໆ ຫລົງ ເຍີຍ ກະນ້າຍ ອ໋ອຍ ຕສຸ ປຸນ ອຈ໋າວ ນິ່ນ ວົ້ວ ເຕົ້າ ຕຸ໊ ຈວັ່ງ ຈ໊ຽນ ຫລົ່ງ.

7ໄມ້ ຕູ໋ງ ດົ໊ວ ກັ້ນ. ໄມ້ ມ່າຍ ຫາຍ ເຕົ້າ ໄຮ່ ດົ໊ວ ຕຸ໊ ທິນ-ຮູ່ງ. ມ່ຽນ ຕສວັ໋ງ ຫາຍ ຫຍູ່ງ ຕສ່ຽວ ຊຽວ ຕຸ໊ ວົ້ວ ຫຍູ່ງ.

8ເຊ ກ໊ອງ ມ່ຽນ ເຊວີ່ຍ ກັ້ນ ເຍີຍ ໂຮຍ້ວ ຫັ່ນ ໂຕສ໋ວ ເຊ ຮນັ້ງ ຕສວັ໋ງ ຍິມ ເອຈ່ຍ ເດົາ ນໍ, ຊຽວ ຕ້າຍ ເຍີຍ ເຊ ປຸນ ນິ່ນ ຕສຸ ໄຕ່. ມປ່າ ມ່ຽນ ເອີຍ ສີງ ລີ່ງ ຕສວັ໋ງ, ສີງ ລີ່ງ ຕສ່ຽວ ປຸນ ນິ່ນ ຊຽວ ຕ້າຍ ເຍີຍ ເຊ ຢຽດ ລິ໌ວ ເຍີຍ ແໝ່ງ.

9ໂຕສ໋ວ ຄູ້ ສີ່, ໄມ້ ຕູ໋ງ ໂຮຍ້ວ ໜຳ. ເຊ ກ໊ອງ ບົວ ໄມ້ ຖຸຍ ນໍ, ເຖົາ ຕສຢັ້ງ ໂຫ່ ບົວ ຕສ່ຽວ ມ່າຍ ຊຽວ-ເຊ່ງ.

10ຮນັ້ງ ໜ່າຍ, ຫາຍ ຕສັ່ນ ມ່າຍ ຖຈັງ, ບົວ ອ໋ອຍ ຕສຸ ໂຕສ໋ວ ຄູ້ ສີ່ ເຖງ ຕສວັ໋ງ ມ່ຽນ. ເຫລ່ງ ເຈີ໊ຍ ເຍີຍ ອ໋ອຍ ຕສຸ ເຖງ ເຫວີ່ຍ ສຽນ ເຢຊູ ເປ໋ນ ຢຽດ ເປຢົ໊າ ມ່ຽນ ວົ້ວ ເຕີ໋ຍ.

11ເມີ່ຍ ບົວ ໝັ່ງ ກ໋າ! ເຢຍ ຫລົ່ງ ເຢຍ ກັ້ນ ເຍີຍ ປົ໌ວ ເຟ້ຍ ດສັ່ງ ດົ່ງ ນ້າຍ ໂຮລ ປຸນ ເມີ່ຍ ບົວ.

12ຕົ້ງ ອ໋ອຍ ໂຕ້ວ ກັ້ນ ຕຸ໊ ຮມຽນ-ໝິ່ນ ວົ້ວ ເຕີ໋ຍ ອ໋ອຍ ອ໊າບ ເມີ່ຍ ບົວ ເຈ໋ຍ ກ໊າດ ເຍີຍ ເລີ໌ຍ. ນິ່ນ ບົວ ຮນັ້ງ ນ້າຍ ນໍ ໂຕສ໋ວ ເຊ ເຫວີ່ຍ ຕສຸ ໄມ້ ອ໋ອຍ ເຫວີ່ຍ ກີຕູ່ ເຍີຍ ຕສຽບ ດສັ່ງ ຈ໋າ ຕສຸ ມ່ຽນ ໂຕສ໋ວ ໂຕະ ນິ່ນ ບົວ.

13ໄມ້ ກຸ໊ນ ນິ່ນ ບົວ ກັ້ນ ເຈ໋ຍ ກ໊າດ ເຍີຍ ເລີ໌ຍ, ນິ່ນ ບົວ ຕສູ໊ງ ໄມ້ ເອີຍ ເລີ໌ຍ-ຫລັດ ໂຕສ໋ວ. ນິ່ນ ບົວ ຂູງ ອ໋ອຍ ເມີ່ຍ ບົວ ເຈ໋ຍ ກ໊າດ ເຍີຍ ເລີ໌ຍ ເຫວີ່ຍ ປູ໋ງ ຫວ່າ-ເໝົາ ກ໊ອງ ເມີ່ຍ ບົວ ເຈ໋ຍ ກ໊າດ ເຍີຍ ເລີ໌ຍ ໝີ່ ອ໊ະ ຮນັ້ງ.

14ມປ່າ ເຢຍ ກັ້ນ ຕສູ໊ງ ໄມ້ ອ໋ອຍ ປູ໋ງ ຫວ່າ-ເໝົາ, ທສວດ ລິ໌ວ ປູ໋ງ ຫວ່າ-ເໝົາ ກ໊ອງ ບົວ ເຍີຍ ຕສ໊ຽວ ເຢຊູ ກີຕູ່ ເຍີຍ ຕສຽບ ດສັ່ງ ຈ໋າ. ເຊ ຫລາຍ ຕສຽບ ດສັ່ງ ຈ໋າ ປ້າມ ເກນ ຕສຸ ຕີງ ໄຕ່, ປ້າມ ເກນ ເຍີຍ ຢຽດ ຕສູ໊ງ ຕສ່ຽວ ເກວນ ໄມ້ ຕສຸ ເຢຍ. ເຢຍ ຢ່າ ຕສຸ ຕີງ ໄຕ່ ຕສ່ຽວ ເກວນ ໄມ້ ຕສຸ ປ້າມ ເກນ.

15ເຈ໋ຍ ກ໊າດ ເຍີຍ ເລີ໌ຍ ໄຟ ໄມ້ ເຈ໋ຍ ເຊ ໄມ້ ຫລົ່ງ ຈ໊ຽນ. ຫລົ່ງ ຈ໊ຽນ ເຍີຍ ເຊ ໂຕສ໋ວ ຊຢັງ-ເຕສີ໋ຍ ຕ້າຍ ເຍີຍ ມ່ຽນ.

16ໂທ້ ທິນ-ຮູ່ງ ເຖສີຍ ແປ້ງ ອອນ ຢ່າ ຄໍ້-ລ່ຽນ ຢຽດ ຕສູ໊ງ ກັນ ນ້າຍ ຫຍູ່ງ ເລີ໌ຍ ເຍີຍ ມ່ຽນ, ແອ໋ງ ເຖສົາ ທິນ-ຮູ່ງ ເຍີຍ ຕສຽນ ອິສະລາເອນ ມ່ຽນ.

17ເຊດ ເມວີ໌ຍ ເຢຍ ອ໋ອຍ ກ໊ອງ, ຢັ້ງ ນ້າຍ ເຈ໋ຍ ໄມ້ ຕູ໋ງ ປຸນ ຫາຍ ເຕົ້າ ຫລະເຍົ້າ ເຢຍ, ເຫວີ່ຍ ຕສຸ ເຢຍ ເຍີຍ ຊິນ ມ່າຍ ໜານ ຮນັ້ງ ມ່າຍ ຢ໋ຽນ ປຸນ ທສີງ ເຢຍ ໂຕສ໋ວ ເຢຊູ ເຍີຍ ໂນ່ວ.

18ກໍ໋-ໂຢ໌ວ ອ່າ, ໂທ້ ບົວ ເຍີຍ ຕສ໊ຽວ ເຢຊູ ກີຕູ່ ເຖສີຍ ເອນ ປຸນ ເມີ່ຍ ບົວ ຕສວັ໋ງ ມ່ຽນ. ອາເມນ.

← Chapter 5 Jump to: