Exodus 35

Tshiluba Bible 1996 (MUKANDA WA MYIDI MUKULU)

← Chapter 34 Jump to: Chapter 36 →

1Moshe kubikila bena Izrayele bonsu, kubambila ne: — Telejayi mikenji idi Maweja-Nangila mutume bua nuenu kukumbaja:

2“Nuenze mudimu matuku asambombu. Kadi dituku dia muanda mutekete ndia Dikisha, bualu ndituku dia tshijila dia Maweja-Nangila. Muntu yonsu udi wenza mudimu dituku adi nebamushipe.

3Kabidi kanuena mua kutemesha nansha kapia mu nzubu wenu nansha umue dituku adi to.”

4Moshe uvua utungunuka ne dimanyisha bena Izrayele mikenji ya kudi Maweja-Nangila ne:

5— Muntu yonsu afile mulambu bu mudiye musue. Milambu inudi mua kulambula Maweja-Nangila ikale ya mishindu mishilangane: ya tshiamu tshia mpawungi, ya tshiamu tshitoke tshia mushinga mukole, ne ya tshiamu tshikunze,

6bilamba bia boya bua nyama bifikuluke, bikunzubile, ne bikunze kunzuu; bilamba bia ndanda, ne bia boya bua mbuji;

7biseba bia mikoku ya bimpanga bilaba kakula, ne biseba bia nyama ya nkonga; mitshi ya ndunga;

8mafuta a kuela mu muendu, manananshi a kusambakaja ne mafuta a kulaba, ne manananshi a mupuya mukole a kuosha;

9mabue a onikse, ne mabue makuabu a mushinga mukole a kuteka mu tshilamba tshia mutuangaji munene tshia efode ne mu tshilamba tshiende tshia pa tshiadi.

10Nanku bantu ba kunudi benji ba midimu ya bianza, bafike bua kuenzela Maweja-Nangila mudimu uvuaye muambe.

11Benze nzubu wa tshijila ne ntenta, tshilamba tshia kubuikila pa mutu pa ntenta, nkanu, mabaya, mitshi, makunji ne bitaku.

12Benze mushete wa ndondu ne mitshi ya kuelaku, ne tshibuikidiji tshiawu. Benze tshilamba tshidi tshijika mushete awu.

13Benze mesa ne mitshi ya kuelaku, kabidi ne bintu bionsu bidi pa mesa too ne mampa a kulambula Mvidi Mukulu.

14Benze tshitekelu tshia muendu ne bintu bionsu bidiku: miendu, ne mafuta a kutemesha nawu.

15Benze tshilambuilu tshia manananshi, ne mitshi ya kuelaku; mafuta a kuela pa mutu, ne manananshi a kuosha; tshilamba tshia mu mushiku wa mbelu wa nzubu wa tshijila;

16tshilambuilu tshia milambu ne tukanu tua tshiamu tshikunze, mitshi ya kuelaku, ne bintu bionsu bivua ku tshilambuilu; dilongu dinene ne tshitaku tshiadi.

17Benze bilamba bia ku lupangu, ne makunji alu, ne bitaku biawu; tshilamba tshia mu mushiku wa mbelu wa lupangu;

18milonda ya bitupa ya mu nzubu wa tshijila, ne ya ku lupangu, too ne mionji ya kuelaku.

19Benze bilamba bia lumu bia kuenza nabi mudimu muaba wa tshijila; bilamba bia tshijila bia mutuangaji munene Arone, ne bia bana bende ba balume.

20Bena Izrayele kushiyangana ne Moshe.

21Bantu ba muoyi muimpe kufila milambu yabu kudi Maweja-Nangila bua kuasa ntenta wa kusambakena, bua midimu ya kutendelela, ne bua kutela bilamba bia tshijila.

22Bantu bonsu ba muoyi muimpe balume ne bakaji, kufila bilengejilu bia tshiamu tshia mpawungi bia mishindu mishilangane: tukanu tua pa bilamba, tua ku matshi, tua ku minu ne tua mu nshingu. Kadi muntu yonsu uvua wela bintu abi mulu, ubinyukule bua kubilambula Maweja-Nangila.

23Bantu bakuabu kulambula Maweja-Nangila milambu mikuabu: bilamba bia miosa ya nyama bifikuluke, bikunzubile, bikunze kunzuu, bia ndanda muine ne bia miosa ya mbuji, biseba bia mikoku ya tshimpanga bilaba kakula, ne bikuabu bia nyama ya nkonga ya mu mayi.

24Bantu bakuabu kulambula Maweja-Nangila biamu: bitoke bia mushinga mukole ne bikunze. Badipu kulambula mitshi ya ndunga ivuabu mua kuenza nayi mudimu awu.

25Bakaji bonsu bavua bamanye mua kutela ku bianza, kulambulabu bilamba bitela bimpe bia mishindu mishilangane: bia ndanda, bia miosa ya nyama bifikuluke, bikunzubile, nansha bikunze kunzuu.

26Bakaji bakuabu batalame kulambulabu bilamba bia boya bua mbuji.

27Bamfumu ba meku kulambula mabue a mushinga mukole a onikse ne mabue makuabu a kuteka mu tshilamba tshia efode tshia mutuangaji munene, ne mu tshilamba tshiende tshia pa tshiadi.

28Kulambulabu kabidi bintu bia mupuya mukole, mafuta a kuela mu miendu, a kuela mu mutu, ne a kusambakaja ne manananshi a kuosha.

29Bena Izrayele bonsu balume ne bakaji ba muoyi muimpe, kulambulabu bintu bia kuenza nabi mudimu uvua Maweja-Nangila muambile Moshe.

30Moshe kuambila bena Izrayele ne: — Maweja-Nangila mmusungule Beshalele, muana wa Uri, udi kabidi muikulu wa Ure, wa mu tshisamba tshia Yuda.

31Mueyelu wa Mvidi Mukulu udi nende, bua ikale muntu wa lungenyi ne meji, mumanye mua kuenza midimu ya bianza mishilangane:

32mmumanye mua kulongolola midimu, kusonga bintu bia tshiamu tshia mpawungi, bia tshiamu tshitoke tshia mushinga mukole, ne bia tshiamu tshikunze;

33kusonga mabue a mushinga mukole, kuteka mu masosu; kusonga kabidi ne mitshi ya kuenza nayi midimu. Mu tshikosu, mmumanye mua kuenza midimu yonsu.

34Maweja-Nangila mmumupeshe kabidi yeye ne Okoliyabe, muana wa Akisamaka, wa mu tshisamba tshia Dane, lungenyi lua kulongesha bakuabu midimu ayi.

35Mmubapeshe bipedi bia kusonga mabue a mushinga mukole, kuzola bilamba bia miosa ya nyama, bifikuluke, bikunzubile, bikunze kunzuu, ne bia ndanda. Bobu aba ke bamanyi ba kalanda-musenga ba midimu yonsu ya bianza.

← Chapter 34 Jump to: Chapter 36 →