Deuteronomy 28 — Luo (Acoli Baibul) 1985

7“Rwot biloyo lumerokwu ducu ma bibino ka lweny i komwu, miyo wubinekogi woko ki i nyimwu. Gibimol ka lweny i komwu ki i yo acel, giriŋo giket woko i yo abiro.

8“Rwot Lubaŋawu biciko gum poto i kom derowu ducu, ki i kom gin ducu ma wubitiyo; bimiyowu gum i lobo ma en bimiyo botwu-ni.

9“Rwot bimokowu me bedo lwakke maleŋ kit ma yam okwoŋo kwede botwu’, ka ce wumako cik pa Rwot Lubaŋawu, kun wulubo yone ducu.

10“Jo ma i wi lobo ducu gibineno ka gilwoŋowu ki nyiŋ Rwot, ci gibilworowu.

11Rwot bimiyo wulony ki lwak jami mapol; bimiyo wunywalo litino mapol bimiyo limwu makwo nya madwoŋ ma pottiwu bene ceko cam mabup.

12Rwot biyabo polo piwu, ma en ot kano limme maber, ci miyo kot cwer i lobowu i karene, ci miyo gum i kom tic ducu ma wutiyo. Jo me rok mapol gibimako banya botwu ento wun pe wubimako banya mo.”

13Rwot bimiyo wubedo jo ma telo nyim, pe jo ma coko ter; wubibedo ka cito anyim ma pe doŋ wudok cen, tekke wubedo ka lubo cik pa Rwot Lubaŋawu ma acikowu kwede tin-ni kun wugwokke ka cobogi maber,

14ma pe wulokke wukwero lubo lok ducu ma acikowu kwede tin ci wuŋak wudok yo tuŋ acuc nyo tuŋ acam pi lubo kor lubaŋa mukene ki pi worogi.

15“Ka ce pe wuworo dog Rwot Lubaŋawu nyo pe wugwokke ka lubo lok ma en ociko ducu ki cikke ma acikowu kwede tin-ni, ci lwak cen magi ducu bipoto i komwu ci moko i komwu.

16Cen bibedo i komwu i gaŋiwu dok cen bibedo i komwu i pottiwu.

17Cen bibedo i kom adukuwu ma wuyeyo ki cam i kare me kac, cen bibedo i kom otakowu me myeno kwon.

18Cen bibedo i kom litino ma wubinywalogi, ki i kom cam ma bicek i pottiwu, i kom litino dyaŋiwu ki i kom litino romiwu ki dyegiwu.

19Cen bibedo i komwu ka wudonyo i ot, ci cen bibedo i komwu ka wukato woko.

20“Ka ce wubwoto Rwot, ma wubedo ka tiyo gin marac, ci Rwot bicwalo cen i komwu bibaŋowu woko ci bijukowu i gin ducu ma wutemo tiyone nio ka wuto wutum woko oyotoyot.

21Rwot bimiyo two gemo marac poto i komwu nio ka bityekowu woko ki i lobo ma wubicito iye ka camone.

22Rwot bipwodowu ki two aona opiyo, ki aburu ki two akwota, ki lyeto madwoŋ; bicwalo oro malyet mada, ci miyowu kal mubwarre ki mupur woko.

23Polo ma tye ka wiwu bibedo macalo mola, ki piny ma ka tyenwu bibedo tek macalo nyonyo.

24Rwot bimiyo apulu ki apwa aye cwer ma ka kot i lobowu kun a ki malo duny i komwu nio ka otyekowu woko.

25“Rwot bimiyo lumerokwu giloyowu woko. Wubilubo yo acel ka wucito ka lweny i komgi, ka wuriŋo wuket i yo abiro ki i nyimgi. Lworo bimako ker ducu ma wi lobo pi gin ma bitimme i komwu.

26Komwu muto-ni bibedo cam pa winyo ducu me polo, ki pa lee timgu; pe bibedo dano mo ma ryemogi.

27Rwot bipwodowu ki odeke kit ma yam otimo i kom jo Ejipt, ki bur adola ki nyac ki gwenyo, ma caŋone biloyowu:

28Rwot bipwodowu ki two apoya ki to-waŋ-gu, dok bibaŋo tamwu woko.

29Wubipanne apana i dyeceŋ macalo lawaŋoto paŋŋe i colpiny, pe wubilimo gum mo i wot mewu ducu; gibibedo ka unowu ki yako jamiwu jwijwi, dano ma bikonyowu bibedo pe,

30“Ibitoŋo keny i kom nyako, ci ŋat mukene aye bibuto kwede; ibigero ot ci pe ibibedo iye; ibipito poto olok ci pe ibicamo nyige.

31Gibineko twonni i nyimi ma ineno ci pe ibibilo riŋone; gibimayo kanani ki i nyimi gitero woko ki tek, pe gibidwokone boti, gibimiyo romini bot lumerokki, ŋat mo ma konyi bibedo pe,

32Awobeni ki anyirani gibimiyogi bot jo me rok mukene ma kun waŋi nenogi ci piny loyi i komgi matal, pe ibibedo ki twero me geŋogi wot.

33Rok mo ma yam pe iŋeyo aye bicamo gin ma ocek i potoni pi tic matek ducu ma iyelle iye. Gibiuni auna keken, gibidiyi piny jwijwi,

34miyo ibibaŋŋe woko pi gin ma ineno ki waŋi.

35Rwot bipwodi ki odeke mudet i coŋi ki i tyeni ma caŋone biloyo dano; odeke bimwono komi woko liweŋ cakke i tyeni o kwede wa i wii.

36“Rwot biterowu kacel ki kabakawu ma wuketo me loyowu i rok mukene ma yam peya wuŋeyo kadi wa kwarowu bene pe guŋeyo; wubiworo lwak lubaŋa mukene kunnu ma gipayo calgi ki bao nyo ki got.

37Wubidoko gin ma kelo lworo i kin rok ducu ka ma Rwot biterowu iye, ci gibitiyo ki nyiŋwu macalo carolok ki lok aboka:

38“Ibitiŋo lwak kodi madwoŋ itero i poto, ento ibicoko iye cam matidi mo, pien bonyo bicamo, tyeko woko.

39Ibipito potti olok, iyubo maber, ento pe ibimato kono vinone, dok pe ibicoko nyige, pien kwidi bicamogi woko ducu.

40Ibibedo ki yadi jeituni i dye loboni ducu, ento pe ibiwirre ki moone, pien nyige bio woko piny.

41Ibinywalo awobe ki anyira, ento pe gibibedo joni, pien gibiterogi woko i opii.

42Yadini ducu ki gin ma ocek i potoni bonyo aye bicamone woko.

43Lubedo ma gibedo i kinwu gibidoko dito giloyowu, dok wigi bibedo doŋo i komwu, ento wun wubimedde ki doko jo matitino mogo.

44Gin aye dok bimiyo wumako banya botgi, wun pe wubimiyo gimako banya ki botwu. Gin aye gibibedo jo ma telo nyim, wun wubicoko ter.

45“Lwak cen man ducu bipoto i komwu kun lubo korwu, makowu, nio ka bityekowu woko, pien onoŋo wukwero winyo dog Rwot Lubaŋawu, pe wulubo cikke ki gin ma yam ocikowu kwede ducu,

46Can magi gibibedo lanyut ki taŋo botwu ki bot likwayowu matwal,

47pien yam pe wutiyo bot Rwot Lubaŋawu ki yomcwiny pi lwak jami ma en omiyowu-ni.

48Pienno wubitic ki lumerokwu ma Rwot bicwalo ka lweny i komwu. Kec ki orwo pii binekowu, wubibedo munero ma can jami ducu omakowu, ci Rwot biriyo okol nyonyo i ŋutwu nio ka otyekowu woko ducu.

49Rwot bikelo rok mo i komwu mua ki ka mabor, nia wa ki i agikki lobo, ma gidwir macalo ocur ma tuk, en aye rok mo ma pe wuŋeyo lebgi.

50Gin rok ma waŋgi tek ma pe biparo pi woro jo, muti, kadi wa timo kica i kom jo matino.

51Gibicamo litino dyaŋiwu woko, ki cam mucek i potowu nio ka gityekowu woko; pe kalwu mo doŋ, nyo koŋo vino nyo moo, gibiweko kadi wa litino dyaŋiwu ki litino romi ki dyegiwu, miyo wubito woko liweŋ,

52Gibirumowu woko i gaŋiwu ducu nio ka cel maboco ki gogo ma wugenoni gupoto woko piny ki i lobowu ducu; monygi birumowu woko i gaŋiwu ducu ma oromo dye lobowu ducu ma yam Rwot Lubaŋawu omiyowu.

53“Wubicamo riŋo kom litinowu, en aye riŋo kom awobewu ki anyirawu ma Rwot Lubaŋawu omiyo botwu, i kare ma girumo gaŋwu woko, i kare me can madwoŋ ma lumerokwu gibiketo i komwu.

54Laco ma yam kome okwe mot ki kuc waŋe bicido woko i kom camme miyo twono ominne woko, ki dakone ma en maro, ki litinone mogo ma pud gudoŋ;

55pe biye ni ŋat mo i kingi onywak camo kwede riŋo kom litinone ma en tye ka camone, pien pe tye ‘gin mo mudoŋ bote, i kare me rumo gaŋ ki i kare me can madwoŋ ma lumerokwu gibiketo i komwu i gaŋiwu ‘ducu.

56Dako bene ma yam kome okwe mot ki kuc, ma yam lworo keto tyene piny i ŋom pien yam gigwoke mada, waŋe bicido woko i kom cware ma en maro, ki i kom wode ki nyare,

57bitwonogi byero ma okatti ki i kin tyene ki riŋo kom litino ma en onywalo, pien bicamogi ki i muŋ pi can jami ducu, i kare me rumo gaŋ ki i kare me can madwoŋ ma lumerokwu gibiketo i komwu i gaŋ mewu ducu.

58“Ka pe wugwokke ka lubo lok ducu ma i cik man ma gicoyo i buk man wek wubed ka lworo nyiŋ me deyo ki mapek pa Rwot, Lubaŋawu,

59ci Rwot dok bikelo atwom madit i komwu ki i kom likwayowu, en atwom malik ma bedo nakanaka, ki two magwa ma ri nakanaka.

60En bikelo i komwu kit two ducu pa jo Ejipt ma yam wubedo ka lworogi; twone biniaŋ i komwu matek,

61Dok kit two ducu ki kit atwom ducu ma pe gicoyogi i buk man me cik Rwot aye bikelogi i komwu, nio ka otyekowu woko liweŋ.

62Kadi onoŋo yam wunya mapol macalo lwak lakalatwe me polo, gibiweko welwu doŋ manok mo, pien pe wubedo ka woro dog Rwot Lubaŋawu.

63Kit ma yam cwiny Rwot obedo yom i komwu omiyo otimowu maber-ri dok omiyo wunya mapol, kit meno bene cwiny Rwot dok bibedo yom pi kelowu topiny ma bityekowu woko liweŋ; ci bikwanyowu woko ki i lobo ma doŋ wucok donyo iye ka camone.

64“Rwot bikeyowu woko ata i kin rok ducu, cakke i agikki lobo tuŋ cel o kwede i agikkine mukene tuŋ cel. Wubiworo lwak lubaŋa mukene kunnu ma gipayo calgi ki bao nyo ki got, ma yam pe wuŋeyo kadi wa kwarowu bene pe guŋeyo.

65I kin lurok magi pe wubinoŋo iye kuc mo, dok pe wubinoŋo iye ka yweyo tyenwu, ento Rwot bimiyo cwinywu myel kunnu, wanwu bimyeno, tipo komwu bito woko lirut.

66Cwinywu biŋabbe aŋaba pi kwowu me anyim; wubibedo ki lworo madwoŋ dyewor ki dyeceŋ, ma pe wutye ki gen mo i kwowu.

67Odiko wubiwacci, ‘Kono nene obedo otyeno!’ dok otyeno wubiwacci, ‘Kono nene obedo odiko!’ pi lworo madwoŋ i cwinywu pi gin ma tye anyim ma waŋwu bineno.

68Dok Rwot bidwokowu cen i Ejipt kun giterowu i mel, wubidok i wot ma yam aciko ni pe dok wubinwoyone-ni. Wubimine kekenwu kunnu bot lumerokwu kun wucatte ni giwilwu wubed opiigi ki anecagi, ento dano mo pe ma biwilowu.”