Exodus 4

Luo (Acoli Baibul) 1985

← Chapter 3 Jump to: Chapter 5 →

1Moses ogamo ni, “Ento nen, pe gibiye lokka, pe gibiwinyo doga bene, pien gibiwacci, “Rwot gire pe onen boti.”

2Rwot owacce ni, “Meno gin aŋo ma i ciŋi-nu?” Ogamo ni, “Odoo.’

3Ci owacce ni, “Bol piny i ŋom.” Ci ka obolo piny i ŋom, olokke odoko twol; Moses oriŋo woko cen.

4Ento Rwot owaco bot Moses ni, “Rye ciŋi imak ki tuŋ yibe.” Oryeyo ciŋe, omako; ci olokke odoko odoo ki i ciŋe,

5Rwot owaco ni, “Man bimiyo giye ni Rwot, Lubaŋa pa kwarogi, Lubaŋa pa Abraim, pa Icaka, ki pa Yakobo, otyeko nen boti.”

6Ci Rwot owacce ni, “Rwak ciŋi i kori.” Orwako ciŋe i kore; ka okwanyo woko, ci nen, ciŋe orugo matar macalo pee.

7Rwot dok owacce ni, “Rwak ciŋi i kori.” Ci dok orwako ciŋe i kore; ka okwanyo woko, nen, ciŋe odok kakare macalo kome mukene ducu.

8Lubaŋa dok owaco ni, “Ka pe gibiye lokki, nyo pe gibiparo bene pi lanyut mukwoŋo-ni, ci gibiye lanyut malacen.

9Ka bene pe gibiye lanyut man aryo-ni ducu, ki kwero winyo dogi, ci ibitwomo pii ki i kulu Nail, ionyo i lobo ka ma otwo; ci pii ma itwomo ki i Nail bidoko remo ki i lobo ma otwo-ni.”

10Ento Moses owaco bot Rwot ni, “Ai Rwoda, an ladwal nia wa con, kadi wa i kare ma ibedo ka lok kweda. Onoŋo atye ma aywayo lok mot, leba dwalle woko.”

11Rwot dok owacce ni, “Aŋa ma oketo dog dano? Aŋa ma miyo dano bedo Iato-dog, nyo ladiŋ-it, ma neno piny nyo lawaŋe-oto? Pe an aye atiyo, ma a Rwot-ti?

12Pi meno doŋ iciti, abibedo ki dogi, abipwonyi ki gin ma ibiloko.”

13Ento en dok ogamo ni, “Ai, Rwoda, alegi ni icwal ŋat mukene.”

14Ci kiniga: pa Rwot otugge i kom Moses kun wacci, “Aron pe tye kunnu, ma omeru-ni, ma Lalevi? An aŋeyo en lebe loko atir, ci nen, en obebino ka rwatte kwedi; ka en bineni, ci cwinye bibedo yom.

15In ibilok kwede, ki keto lok i doge, an abibedo ki dogi, ki doge bene, ci abipwonyowu ki gin ma wubitiyo.

16En aye bilok ki lwak maka in; en bibedo maka dogi, dok in ibibedo macalo Lubaŋa bote.

17Ibicito ki odoo man i ciŋi, ma ibitiyo ki lanyut magi.”

18Moses ka odok bot Yecero, ma won dakone, ci owacce ni, “Alegi wek koŋ adok bot omega ma i Ejipt, wek anen ka pud gitye makwo.” Ci Yecero ogamo dog Moses ni, “Cit ki kuc.”

19Rwot owaco bot Moses i Midian ni, “Dok cen wa i Ejipt; pien jo ma yam mito neki doŋ guto woko ducu.”

20Kit meno Moses okwanyo dakone ki awobene, oketogi i wi kana, ci owoto, odok cen i lobo Ejipt, kun omako odoo pa Lubaŋa i ciŋe.

21Rwot oloko bot Moses ni, “Ka doŋ ityeko dok cen i Ejipt, nen ni itiyo i nyim Parao taŋo ducu ma atyeko keto i ciŋi-ni; ento abijiŋo cwinye doko nwaŋ, ma pe biye dano woto.

22In ibiwaco bot Parao ni, ‘Rwot owaco kit man ni, Icrael aye latin kayona,

23ci awacci ni, Wek latinna ocit ka tic bota; ka ikwero kome ni pe ociti, nen, abineko latin kayoni woko.’ ”

24I kabutogi i yo en aye Rwot oromo ki Moses kun mito neke woko.

25Ci Jipola okwanyo got mabit, oliro ki kom latin awobine, ogudo ki tyen Moses kun wacce ni, “Ada, in i cwa remo!”

26Ci Rwot oweke gire. Oloko ni, “In i cwara pi remo,” me lirre-nu.

27Rwot owaco bot Aron ni, " cit i tim, wek icirom ki Moses.” Ci oromo kwede wa i te got pa lubaŋa ka onoto leme.

28Ci Moses otito bot Aron lok ducu ma Rwot owacce, ma ocwalle kwede, ki lanyut ducu ma ociko ni oti kwede.

29Ci Moses ki Aron gucito, gucoko ludoŋo pa jo Icrael ducu

30Ci Aron oloko lok ducu ma Rwot oloko bot Moses, ci onyuto lanyut ducu i nyim dano.

31Dano guye; ka guwinyo ni Rwot otyeko limo jo Icrael dok otyeko neno atwomgi ci gukulo wigi piny, guworo Lubaŋa

← Chapter 3 Jump to: Chapter 5 →