Jude 1

Luo (Acoli Baibul) 1985

Jump to:

1Waraga man oa ki bot Juda ma latic pa Yecu Kricito, ma omin Yakobo. Bot jo ma Lubaŋa olwoŋogi ma gibedo i mar pa Lubaŋa Won, ma Yecu Kricito tye ka gwokogi.

2Kica, kuc ki mar myero omedde botwu.

3Lurema, onoŋo atemo ki tekka ducu me coyo botwu waraga pi lok i kom larre ma wan ducu waribbe iye, ci aneno ni myero aco acuk kwede cwinywu wek wulweny matek pi niye ma yam doŋ gimiyo bot jo pa Lubaŋa kicel ma doŋ otyeko lok ducu.

4Pien jo mogo ma pe gilworo Lubaŋa gilibbe aliba me donyo i kinwa, gin jo ma kop ma yam giŋolo i komgi doŋ ginyuto woko con i coc ma yam gicoyo. Gin guloko kica ma Lubaŋa omiyowa odoko tim me coco, gukwero Laditwa acel keken-ni ma en aye Rwotwa Yecu Kricito.

5Wun jo ma yam doŋ gimiyo wuŋeyo lok man con, koŋ amito dok apo wiwu ni, Rwot ma yam olaro jo Icrael ki i lobo Ejipt, lacenne en dok otyeko jo ma pe guye en woko.

6Lumalaika ma yam pe gigwoko ka locgi ma gimiyo botgi, ento guweko kabedogi woko, en ogwokogi ka macol ki nyor ma ri nakanaka, nio wa i kare me ŋolo kop i nino madit;

7kit macalo yam jo Codom ki Gomora ki gaŋi madoŋo ma i ŋetgi, gudonyo i tim me coco ki par maraco ma pe obedo me anywalli, macalo gin, ci giŋolo botgi can me mac ma pe to, gin mubedo macalo lanen bot jo ducu.

8Nen kadi kit meno, jo-nu bene i kit acel-lu, i lek ma gin leko, gubalo komgi woko, gukwero ker pa Lubaŋa woko, dok guyeto wegi deyo-gu bene ayeta.

9Ento i kare ma Mikael, lamalaika madit, yam olwenyo ki Catan kun pyem kwede pi kom Moses, en yam pe oŋwette pi ŋolo kop mo me yet, ento oloko ni, “Rwot myero ojuki.”

10Ento jo magi giyeto gin ma pe giniaŋ iye, ento gin ma giŋeyo pi lubo kit ma giketogi kwede, macalo lee ma pe ryek, tye ka tyekogi woko.

11Gibineno can ma rom man! Pien gilubo kit pa Kain, giketo tek mada i tam mogo ma pe atir pi mito lim kit macalo yam Balaam otimo, dok bene gito woko pi pyem kit macalo yam Kora ojemo kwede,

12Gikelo lewic i karamawu me mar ka gicamo matek mukato kare laboŋo lworo, kun giparo pi komgi keken. Gubedo calo pol ma pii pe iye ma yamo kolo; girom ki yadi ma nyiggi pe nen i kare me cekgi, ma giputo lwitgi woko, yam guto kiryo.

13Gical bene ki nam ma twagge mager ki bwoyo me lewicgi; gin lakalatwe ma wirre atata ma Lubaŋa otyeko yubo kakagi woko i kabedo macol licuc pi kare ma pe gik.

14Magi gin aye gin ma yam Enoka, ma obedo dano me abiro nia i kom Adam, yam otito pire macalo lanebi ni, “Wunen, Rwot bibino ki lwak jone maleŋ mapol ata,

15ka ŋolo kop i kom jo ducu, ki ka miyo kop wek olo jo ducu ma pe gilworo Lubaŋa pi timgi ma pe gilworo kwede Lubaŋa, ki pi lok ducu me gero ma lubalo ma pe gilworo Lubaŋa guloko i kome.”

16Meno gin jo ma bedo kar ŋur aŋura, ma gipyem apyema, kun gilubo mitgi keken, doggi opoŋ ki loko lok me wakke keken, gidworo dano wek ginoŋ gin ma cwinygi mito.

17Ento wun lurema ma amaro, myero wupo i lok ma yam lukwena pa Rwotwa Yecu Kricito gutito pire con.

18Gin yam gutito botwu ni, “I kare me agikki luŋala bibedo tye, ma gibilubo mitigi keken, ma pe gilworo Lubaŋa.”

19Jo ma kit meno gin aye lukel apokapoka, gin jo me lobo man, Cwiny pa Lubaŋa pe botgi.

20Ento wun luwota, wudoŋ matek i niyewu maleŋ twatwal-li, kun wulego Lubaŋa i Cwiny Maleŋ.

21Wugwokke kenwu i mar pa Lubaŋa, wukur kica pa Rwotwa Yecu Kricito nio wa i kwo ma pe tum.

22Wubed ki kica i kom jo mogo ma gitye ka cabbe acaba,

23wular jo mogo ma kit meno kun wuceyogi woko ki i mac. Wubed ki kica i kom jo mogo kun wulworo bene, dok wukwer bene ruk ma bal me kom tye iye.

24Deyo obed bot Ŋat ma twero gwokowu miyo pe wupoto, dok ma twero miyo wucuŋ laboŋo roc mo i nyim deyone ki yomcwiny.

25Deyo, dit, loc ki twer ducu obed bot Lubaŋa acel keken, ma Lalarwa, pi Yecu Kricito Rwotwa, cakke ma peya giketo lobo, nio koni, ki kare ma pe gik. Amen.

Jump to: