Matthew 14

Mizo CL

← Chapter 13 Jump to: Chapter 15 →

1Chumi lai vêl chuan lal Heroda chuan Isua chanchin a lo hria a,

2a chhiahhlawhte hnênah, “Chu mi chu Baptistu Johana kha a nih chu; mitthi zîng ata a tho leh ta zuk nia; chuvângin, chûng thiltihtheihna chuan amahah a thawk a nih chu,” a ti a.

3Heroda chuan a unaupa Filipa nupui Herodi avângin Johana chu a man a, a phuar a, tân inah a lo khung reng tawh a;

4Johanan a hnênah “Ani i neih hi a thiang lo ve,” a tihsak avâng khân.

5Ani chu tihhlum a duh a, zâwlneia an ruat avângin mipui a hlau si a.

6Amaherawhchu, Heroda pian champhaphâk ni-ah Herodi fanu chu a laiah a lâm a, Heroda chu a tilâwm ta a.

7Chuvâng chuan a dîl apiang pêk a tiam ta a.

8Ani chuan, a nu fuih angin, “Thlêngah tûnah Baptistu Johana lu mi pe rawh,” a ti a.

9Lal chuan pawi a ti hle a; mahse, a thutiam avâng leh a chaw kîlpuite avâng chuan pêk tûr thu a pe ta a.

10Tichuan, mi a tîr a, tân ina awm Johana lu chu a tantîr a.

11A lu chu thlêngin an rawn la a, nula chu an pe a, ani chuan a nu hnênah a kalpui ta a.

12Tin, Johana zirtîrte chuan a ruang chu an va hlâwm a, an phûm a; Isua pawh an rawn hrilh a.

13Isuan a lo hriatin chuta ta chu lawngin hmun thlalêr lam panin a kal hrang ta a. Mipuiten an hriatin khua aṭangte chuan kea kalin an zui a.

14Lawng ata vaukama a chhuah chuan mipui nasa tak a hmu a, a khawngaih ta êm êm a, damlo an rawn hruaite chu a tihdamsak a.

15Tlai lam a lo nihin, zirtîrte chu a hnênah an lo kal a, “Hei hi hmun thlalêr a ni a, khua a tlai ta hle si a, khuaahte kalin an ei tûr an dap theih nân mipui hi kaltîr ta che,” an ti a.

16Isua erawh chuan, “An kal a ngai lo ve, nangmahnin ei tûr pe rawh u,” a ti a.

17Anni chuan, “Hetah hian chhang panga leh sangha pahnih chauh lo chu eng mah dang kan nei lo,” an ti a.

18Ani chuan, “Ka hnênah han la teh u,” a ti a.

19Hlobet chunga ṭhu tûrin mipui chu thu a pe a, chhang panga leh sangha pahnih chu a la a, vân lam enin mal a sâwm a, a phel a, chhang chu zirtîrte a pe a, zirtîrte chuan mipuite chu an pe a.

20An za chuan an ei a, an tlai ta a. An sem bâng chu an la khâwm a, bâwm sâwm leh pahnih khat a ni.

21A eitute chu hmeichhia leh naupang tiam lovin patling hlîr pawh sângnga lai an ni.

22Mipui chu a ṭîntîr vêl chhûngin râl lehlama lo va kai hmasa tûrin zirtîrte chu lawngah a chuan luihtîr a.

23Mipui a ṭîntîr hnu chuan ṭawngṭai tûrin tlângah a kal hrang a; tin, khua a lo thimin chutah chuan amah chauhvin a awm ta a.

24Lawng erawh chu dîlah, vaukam aṭanga hla takah a awm tawh a, thliin a ni lo zâwngin a nem a, tuifâwnin a vawrh a vawrh a.

25Khawfîng chah dâwn laiin dîl chungah an lam panin a lo kal a.

26Zirtîrten dîl chunga a kal an han hmuh chuan, “Hmuithla a nih saw,” tiin an thlaphâng a, hlauvin an au ta chûl a.

27Mahse, Isuan anni chu a be thuai a, “Thlamuang takin awm rawh u, keimah ka ni e, hlau suh u,” a ti a.

28Petera chuan a chhâng a, “Lalpa, nang i nih chuan tui chunga i hnêna kal thu mi pe rawh,” a ti a.

29Ani chuan, “Lo kal ta che,” a ti a. Petera chu lawng ata a chhuak a, Isua lam panin tui chungah chuan kein a kal a.

30Nimahsela, thli tleh chu a hmuhin a hlau va, a pil dâwn a, “Lalpa, mi chhanhim rawh,” tiin a au ta a.

31Isuan a ban ta nghâl a, amah chu a va chelh a, a hnênah, “Nang rin tlêm, engah nge i rinhlelh le?” a ti a.

32Lawnga an luh chuan thli chu a bâng ta mai a.

33Lawnga awmte chuan, “Pathian Fapa a lo nih takzet hi,” tiin, amah chu kûnin chibai an bûk a.

34Dîl an kân a, Genesaret ramah chuan an kai a.

35Chumi hmuna mite chuan ani chu an lo hria a, an kiang vêl ram zawng zawngah chuan mi an tîr a, damlo zawng zawng a hnênah an rawn hruai a;

36a puan fêm tal deh an ngên chiam a; tin, a dek apiang chu an dam ta zêl a.

← Chapter 13 Jump to: Chapter 15 →