Nehemiah 13

Mizo CL

← Chapter 12 Jump to:

1Mosia dân bu an han chhiar chuan Amon mite leh Moab mite chu Israel-ho zînga telh ve ngai loh tûr an nih thu a lo chuang reng mai a.

2Amon mite leh Moab mite hian, Israel-te Aigupta ram aṭanga an lo chhuah khân chaw leh tui in tûr takngial pawh an lo pe duh lovin

3Israel-te ânchhe lawh tûrin Balaama an ruai zâwk a nih kha; mahse, Pathianin ânchhia chu malsâwmnaah a chantîr ta hlauh zâwk pawh a ni. He dân hi Israel miten an hriat chuan an zîng aṭangin hnam dangte chu an thlauhthla ta a.

4Puithiam Eliasiba, Tempul kudâm enkawltu leh Tobia hi rei tak an lo inkâwmngeih tawh a.

5Pindan zau tâwk tak pakhat, buh leh rimtui te, Tempula bungbêl hman tûr te, puithiamte tâna thilpêk te, buh te, uain te leh oliv hriak, sâwma pakhat, Levia chiten Tempul zaipâwl te leh Tempul pulis te tâna an pêk dahkhâwmna tûrah chuan Tobia chu a thlentîr ṭhîn a.

6Chutianga a thlentîr ṭhin lai chuan kei chu Jerusalem-ah ka awm lo; Babulon-ah lal Artazerzia lal kum sawmthum leh pahnih kum chuan chanchin hrilh tûrin ka hâwng a ni. Nakin deuhvah chuan kîr leh min phalsak a.

7Jerusalem-ah chuan ka haw leh ta a. Eliasiban Tempul pindan pakhata Tobia a lo awmtîr ka hmuh chuan mak ka ti êm êm a.

8Ka thin a ur hle a, Tobia thawmhnaw zawng zawng chu ka theh chhuak a.

9Pindan chu thian thianghlim tûrin thu ka pe a, Tempul bungbêl te, buhbâl thilpêk te, rimtui hâl tûrte dah kîr leh tûrin thu ka pe bawk a.

10Mipuiin ei tûr tâwk an pêk ṭhat loh avângin Tempul zaipâwl te leh Levia chi te chu an awmna ṭhin an in leh lovah an lo haw deuh vek tawh tih ka hre bawk a.

11Tempul an ngaihsak loh avângin hotute chu ka hau va, Levia chite leh zaipâwlte chu Tempulah ka ko kîr a; an hna an thawk ṭan leh ta a.

12Israel mi zawng zawng chuan an buh te, an uain te, an oliv hriak sâwma pakhat te chu tempulah an rawn keng leh ta bawk a.

13Tempul kudâm enkawl tûr chuan hêng mite hi ka dah a: Puithiam Selemia te, Dân thiam Zadoka te, Levia chi Pedaia te hi. Anni puituah Zakura fapa Hanana, Matania tupa chu ka dah bawk a. Anni hi an thawhpuite hnênah dik taka thil sem tûra ka rinte an ni.

14Aw ka Pathian, i Tempul rawngbâwlna atâna ka thiltihte hi hre reng ang che.

15Chûng lai chuan Judai ramah mi ṭhenkhat chuan sabat niin grep an rap sâwr a, ṭhenkhatin sabengtungte chu Jerusalem-a zawrh tûrin buh te, uain te, oliv hriak te, sabat niah an phurhtîr a. Chuvângin, sabat nia thil hralh chu kan khap ta a.

16Tura khaw mi, Jerusalem-a awmte chuan, sanghate leh thil dang chi hrang hrang Jerusalem khuaah sabat nia hralh tûr an rawn la ṭhîn a.

17Juda hruaitute chu ka hau va, “Thil sual tak in ti alâwm, sabat ni in bawhchhiat hi!

18In thlahtuten hetianga sabat an bawhchhiat avângin alâwm a hrem che ua, khua hi a rawn tihchhiat kha! Sabat ni bawhchhiain Israel-te chungah Pathian thinurna tihthlen belh in tum tlat a nih hi!” ka ti a.

19Chuvângin, sabat ni a inṭan aṭangin khawpui kulh kawngkhâr chu ka khârtîr a, sabat ni a ral hma chu kawng hawng lo tûrin thu ka pe bawk a. Sabat niin khawpuiah tu man eng mah an lâk luh theih loh nân kawngkhâr zawng zawng chu keima mite ngei ka vêntîr a.

20Ṭum hnih khat chu thil tinrêng rawn zuar ṭhînte chu khawpui kulh pâwnah Zirtâwpni zân chu an riak a.

21“Khatah riak tawh suh u, a sâwt lo, khatianga in tih leh chuan in chungah kut ka rawn thlâk tawh ang,” ka ti a. Chuta chin chu sabat niin an lo kal leh tawh ngai lo.

22Levia chite chu inthian thianghlim tûrin ka hrilh a, sabat ni chu serh ngei a nih theih nân kawngkhârahte chuan ka chântîr a. Aw ka Pathian, hei vâng pawh hian min hre reng la, khawngaih takin min zuah ang che.

23Chutih lai chuan Juda pa tam tak chuan Asdod nula te, Amon nula te, Moab nula te nupuiah an nei tih ka hmu chhuak bawk a.

24An fa zâtve dâwn lai chuan Asdod-ho ṭawng emaw, ṭawng dang emaw an hmang a, kan ṭawngin an ṭawng hlei thei lo.

25Chûng mite chu ka hau va, ânchhia ka lawh a, a ṭhen phei chu ka vua a, an samte pawh ka pawhsak a. Hnam dangte nên, an fate chen pawhin, inneih pawlh loh tûrin Pathian hming chhâlin chhia ka chhamtîr a.

26“Hnam dang hmeichhiaten alâwm lal Solomona pawh kha thil sual tihtîr. Hnam dang lal zawng zawng aia ropui a ni a, Pathian pawhin a hmangaih a, Israel zawng zawng lalah a siam a; mahse, he thil sual hi a tih tâk kha.

27Pathian thu awih lovin hnam dang hmeichhia nangni angin kan nei ve mai dâwn em ni ang?” tiin ka chhâl a.

28Puithiam lalber Eliasiba fapa Joiada chuan Sanbalata fanu nupuiah a nei a, ani chu Beth-horon mi a ni. Jerusalem khua ata Joiada chu ka hnawt chhuak a.

29Aw ka Pathian, hêng mite hian puithiam hming an tichhia a, puithiamte leh Levia chite nêna in thuthlung an bawhchhiat dân hi hre reng ang che.

30Hnam dangte nêna inhnamhnawihna zawng zawng ata mipui chu ka thian thianghlim a, puithiam leh Levia chite chu mahni tih tûr an hriat ṭheuh theih nân dân ka siamsak thlap a.

31Hâlral thilhlan hâlna tûr thingte chu a hun taka rawn keuh ziah tûrin hna ka sem a, mipui pawh buh thar hmasa leh thei hmin hmasa rawn ken hun tûr ka hrilh bawk a. Aw ka Pathian, hêng zawng zawng hi hre reng la, ka thiltih ṭhatah min pawmsak ang che.

← Chapter 12 Jump to: