1 Corinthians 14

Mizo OV

← Chapter 13 Jump to: Chapter 15 →

1Hmangaihna hi ûm zêl ula; thlarau lam thilpêkte pawh châk cheu rawh u; amaherawhchu, thu in hril theihna tûr lek phei chu châk bîk rawh u.

2Ṭawnghriatlohva thu sawi chuan mihring hnêna sawi ni lovin, Pathian hnêna sawi a ni zâwk si a, tu mân a thusawi chu an hre si lo; nimahsela, thlarauvah chuan thurûk a sawi a ni.

3Thuhriltu erawh chuan mihring hnênah siamṭhatna thûte, fuihna thûte, thlamuanna thûte a sawi zâwk ṭhîn.

4Ṭawnghriatlohva thu sawi chuan mahni chauh a insiam ṭha ṭhîn, thuhriltu erawh chuan kohhranho a siam ṭha zâwk ṭhîn.

5Tin, in zain ṭawnghriatlohtea thu in sawi ka duhsak che u a; nimahsela, thu in hril ka duhsak lehzual che u a ni; kohhranhovin insiamṭhatna an hmuh theihna tûrin, a hrilhfiah leh nghâl loh chuan, thuhriltu chu ṭawnghriatlohtea thusawitu ai chuan a ropui zâwk rêng rêng a ni.

6Tûnah hian unaute u, ṭawnghriatlohtea thu sawiin in hnênah lo kal ang ila, hriattîrna lam emaw, hriatna lam emaw, thuhrilna lam emaw, zirtîrna lam emaw in hnêna ka sawi si loh chuan, eng nge ka tihsâwtna che u awm ang?

7Thil nung lo ri theite pawh, phênglâwng emaw, ṭingṭang emaw hi mumal neia a rîk loh chuan, eng hla nge an tuma an kaih, engtin nge a hriat theih ang?

8Tawtawrâwt hi mumal nei lova a rîk chuan tu nge râl kâp tûrin inbuatsaih ang?

9Chutiang bawkin nangni pawhin lei hian ṭawng hriat awla in sawi loh chuan, eng thu nge in sawi engtin nge a hriat theih ang? Boruaka ṭawng mai in ni ang asin.

10Khawvêlah hian ṭawng chi hrang tam tak a awm a ni ang e; nimahsela, awmze nei lo rêng rêng a awm si lo.

11Amaherawhchu, a ṭawng awmzia chu ka hriat si loh chuan kei hi a sawitu tân awze mi ka ni ang a; a sawitu pawh chu ka tân awze mi a ni bawk ang.

12Chutichuan, nangni pawhin thlarau lam thilpêkte chunga ṭhahnem in ngaih avâng hian, kohhran siamṭhatna tûra in ngah theih nân zawng rawh u.

13Chuvângin, ṭawnghriatlohva thu sawi chuan a hrilhfiah theih nân ṭawngṭai rawh se.

14Ṭawnghriatlohva ka ṭawngṭai chuan, ka thlarau zawng a ṭawngṭai ngei a, ka hriatna erawh chu a hlâwk chuang lo.

15Engtin nge ni ta ang le? Thlarauvin ka ṭawngṭai ang a, hriat theih pawhin ka ṭawngṭai bawk ang; thlarauvin hla ka sa ang a, hriat theih pawhin ka sa bawk ang.

16Chuti lo chuan, thlarauvin malsâwmsak mah la, la hre lote awmnaa awm chuan i lâwmthu sawiah chuan engtin nge “Amen” a tih theih ang, i thusawi chu hre thei lo puiin?

17Nang zawngin lâwmthu i sawi ṭha zet tak a, mi dang erawh chu a siam ṭha chuang si lo.

18Nangmahni zawng zawng aiin ṭawnghriatlohtea thu ka sawi hnem zâwk avângin Pathian hnênah lâwmthu ka sawi a;

19nimahsela, kohhranho inkhâwmnaah chuan ṭawnghriatlohva thu sîngkhat sawi aiin, mi dangte ka zirtîr theih nân ka hriat theihnain thu panga chauh sawi ka duh zâwk a ni.

20Unaute u, rilru lamah naupang suh u; amaherawhchu, sual kawngah zawng nausên ula, rilru lamah erawh chuan puitling rawh u.

21Dân Lehkhabuah chuan, “ ‘Awze mite ka leh ram danga mite hmuiin hêng mite hnênah hian thu ka sawi ang a; chuti pawhin mi ngaithla chuang lo vang,’ Lalpan a ti,” tih ziak a ni.

22Chuvângin, ṭawng hriat lohte hi ringtute tân chhinchhiahna a ni lo va, ringlote tân a ni zâwk; thuhril erawh hi chu ringlote tân chhinchhiahna a ni lo va, ringtute tân a ni zâwk.

23Chuvângin, kohhranho zawng zawng in inkhâwmin, in zaa ṭawnghriatlohtea thu in sawi chuan la hre lote emaw, ringlote emaw lo lût sela, â an ti dâwn lo che u em ni?

24In zaa thu in hril erawh chuan ringlo emaw, la hre lo emaw lo lût sela, a thiam lohzia in zaa tihlan a ni tawh ang a, in zaa chhuahchhalh a ni tawh ang;

25a thinlunga thurûkte chu tihlanin a awm tawh ang; chutichuan, bawkkhupin Pathian chibai a bûk ang a, Pathian in zîngah a awm tak zet tih a puang ang.

26Unaute u, engtin nge ni ta ang le? In rawn inkhâwmin fakna hla emaw, thu zirtîr emaw, hriattîrna thu emaw, ṭawng hriat loh emaw, hrilhfiahna emaw in nei ṭheuh ṭhîn a. Engkim siamṭhatna tûrin tih ni rawh se.

27Tu pawhin ṭawnghriatlohva thu an sawi chuan pahnihin emaw, a tam berah pathumin emaw ni sela, inchhâwk zêlin ni bawk rawh se; tin, mi pakhatin hrilhfiah rawh se;

28hrilhfiahtu an awm loh erawh chuan kohhran inkhâwmah chuan ngawi rengin awm sela, mahni leh Pathian hnênah sawi rawh se.

29Thuhriltute pawhin pahnihin emaw, pathumin emaw sawi sela, mi dangte chuan ngun takin ngaihtuah rawh se.

30Amaherawhchu, a kianga ṭhu mi dang hnênah hriattîrna thu pêkin a lo awm chuan, a hmasa chu ngawi mai rawh se.

31Mi zawng zawngin an zir theihna tûr leh, mi zawng zawng thlamuanga an awm theihna tûrin, in zain pakhat zêlin thu in hril thei si a.

32Thuhriltute thlaraute chu thuhriltute thû thûin an awm a ni.

33Pathian chu buaina Pathian a ni lo va, remna Pathian a ni zâwk si a, mi thianghlim kohhranho zawng zawnga a awm ang hian.

34Kohhranho inkhâwmnaah chuan hmeichheho chu ngawi rengin awm rawh se; anni zawng thu an sawi phal a ni si lo; Dân Lehkhabuin a sawi ang bawk khân, thu zâwmin awm zâwk rawh se.

35Tin, eng pawh zir an duh chuan in lamah mahni pasal zâwt rawh se; kohhran inkhâwmnaa hmeichhe thusawi hi a zahthlâk si a.

36Pathian thu hi nangmahni laka chhuak a ni maw? A nih loh leh nangmahni hnên chauhvah a lo thleng a ni maw?

37Tu pawh thuhriltuah emaw, thlarau miah emaw a inngaih chuan, in hnêna thu ka ziak hi Lalpa thupêk a ni tih lo hre rawh se.

38Nimahsela, tu pawhin a hriat loh chuan hre lovin awm mai rawh se.

39Chutichuan, ka unaute u, thuhril hi châk hle ula, ṭawnghriatlohtea thusawi pawh hi khap suh u;

40nimahsela, engkim mawi tak leh fel taka tih ni rawh se.

← Chapter 13 Jump to: Chapter 15 →