2 Kings 4

Mizo OV

← Chapter 3 Jump to: Chapter 5 →

1Zâwlneite fapaho nupuite zînga hmeichhe pakhat hian Elisa hnênah, “I chhiahhlawh, ka pasal chu a lo thi ta a; tin, i chhiahhlawh khân Lalpa chu a ṭih ṭhîn tih i hria a. Hei a leibatna chu ka fate pahnih bâwih atâna hruai tûrin a lo kal a ni,” tiin a mangan thu a sawi a.

2Tin, Elisa chuan a hnênah, “Eng nge ka tihsak ang che? Mi hrilh teh, inah eng nge i neih?” a ti a. Tin, ani chuan, “I bâwihnu hian sahriak ûm khat chauh lo chu inah eng mah ka nei lo,” a ti a.

3Tichuan, ani chuan, “Va kal ta la, i ṭhenawmteho zawng zawng bêl, bêl ruak va hawh khâwm tawh khai; tlêm tê mai zawng hawh suh.

4Tin, lût la, nang leh i fate nên kawng inkhâr khum ula; chûng bêl zawng zawngah chuan thun langin, a khat chu dah hrang zêl ang che,” a ti a.

5Chutichuan, a hnên ata chu a kal ta a, amah leh a fapate nên chuan kawng an inkhâr khum a; anni chuan bêlte chu an rawn la a, ani chuan a lo thun zêl a.

6Tin, bêlte chu a khah hnu chuan, heti hi a ni a, a fapaa hnênah, “Bêl mi han lâk leh rawh,” a ti a. Tin, ani chuan a hnênah, “Bêl a awm tawh lo,” a ti a. Tin, sahriak chu a kang ta a.

7Tichuan, Pathian mi chu a va hrilh a. Tin, ani chuan, “Va kal la, sahriak chu va zuar ta la, i leiba chu va rûl langin, a bâk chuan i fapate nên va khawsa tawh u,” a ti a.

8Tin, ni khat chu Elisa chu Sunem khuaah a va zin a, chutah chuan hmeichhe neinung tak a awm a; ani chuan chaw ei tûrin a lo kai lût a. Chutichuan, a kal apiangin chutah chuan chaw ei tûrin a lût ṭhîn a.

9Tin, ani chuan a pasala hnênah, “Ngai teh hei, he mi, mi rawn pal fo ṭhîntu hi Pathian mi thianghlim a ni tih ka hria e.

10Hawh teh, in chhâwng tê i siamsak ang khai; khum te, dawhkân te, ṭhutphah te, khâwnvâr dahna te i dahsak ang; tichuan, kan hnêna a lo kal apiang hian a lût ṭhîn dâwn nia,” a ti a.

11Tin, ni khat chu a va kal leh a, chumi in chhâwngah chuan a va lût a, a mu a.

12Tin, a chhiahhlawh Gehazia hnênah, “He Sunam nu hi han ko teh,” a ti a. Tin, a va koh hnu chuan a hmaah a lo ding a.

13Tin, ani chuan a hnênah, “ ‘Ngai teh, nangin hei theihtâwpin min duat a, eng nge kan tihsak ve ang che? Lal emaw, sipai hotu emaw biaksak che i duh em?’ tiin a hnênah hian sawi teh,” a ti a. Tin, ani chuan a chhâng a, “Mahni chipuite zînga chêng ka ni alâwm,” a ti a.

14Tin, ani chuan, “Eng emaw chu kan tihsak tâk ang?” a ti a. Tin, Gehazia chuan a chhâng a, “Fapa chu a nei hauh lo mai a le, a pasal lah chu a tar tawh si a,” a ti a.

15Tin, ani chuan, “Va ko teh,” a ti a. Tin, a va koh hnu chuan kawngkaah a lo ding a.

16Tin, ani chuan, “Tûn ang hun a lo thlen leh tikah chuan fapa i pawm tawh ang,” a ti a. Tin, ani chuan, “A, ka pu, nang Pathian mi, i bâwihnu lakah hian daw ma ta che,” a ti a.

17Tin, hmeichhia chu a rai a, Elisan a hnêna a sawi ang ngei khân chumi hun a lo thlen leh chuan fapa a hring ta a.

18Tin, nausên chu a lo sei lian a, ni khat chu a pa hnênah buh latute hnênan a kal ve a.

19Tin, a pa hnênah chuan, “Ka lu, ka lu,” a ti a. Tin, ani chuan a chhiahhlawh hnênah, “A nu hnênah pawm tawh,” a ti a.

20Tin, a hruai a, a nu hnên a thlen chuan a mal chungah chhûnlai thlengin a ṭhu a; tichuan, a thi ta a.

21Tin, a chho va, Pathian mi khumah chuan a han mut a, kawng a khâr khum a, a chhuak ta a.

22Tin, a pasal chu a au va, “Chhiahhlawh tu emaw leh sabengtung pakhat emaw mi han ngaihtuahsak teh, Pathian mi hnênah ka va tlân ang a, ka lo kîr leh ang e,” a ti a.

23Tin, ani chuan, “Eng atân nge vawiin khera a hnêna kal i tum? Thla thar pawh a la ni lo va, Chawlhni pawh a la ni si lo va,” a ti a. Tin, ani chuan, “A rem mai ang,” a ti a.

24Tichuan, sabengtung a thuam a, a chhiahhlawh hnênah, “Tlântîr la, kal zêl rawh khai; thu ka pêk loh che chuan mi timuang hauh suh,” a ti a.

25Chutichuan, a kal ta a, Pathian mi hnênah chuan Karmel tlângah a va kal a. Tîn, Pathian mi chuan hla tak aṭanga a lo hmuh chuan, heti hi a ni a, a chhiahhlawh Gehazia hnênah, “En teh, sawta saw Sunem nu kha a ni;

26amah hmuak tûrin va tlân la, a hnênah, ‘I dam em le? I pasal a dam em? Naupang kha a dam em?’ lo va ti tawh khai,” a ti a. Tin, ani chuan a lo chhâng a, “Dam e,” a lo ti a.

27Tin, tlânga Pathian mi hnên a han thlen chuan a ke a han vuan ta tlat a. Tin, amah chu rawn nam kian tumin Gehazia chuan a va pan a; nimahsela, Pathian mi chuan, “Eng mah tih suh, a rilru a mangang a nih hi; Lalpan ka lakah a la thup rih a, mi la hrilh rih lo ve,” a ti a.

28Tichuan, ani chuan, “Ka pu hi fapa ka dîl che em kha? ‘Mi tihder suh ang che,’ ka ti lâwm ni kha?” a ti a.

29Tichuan, Gehazia hnênah, “I puan veng la, ka tiang hi kengin va kal tawh khai. Tu pawh va hmu la, chibai bûk suh ang che; tin, tu pawhin chibai an bûk che chuan bûk ve kher suh ang che; tin, ka tiang hi naupang hmaiah nghat ang che,” a ti a.

30Tin, naupang nu chuan, “ Lalpa nunna leh i nunna chhâlin ka sawi e, ka thlah dâwn tawp lo che a ni,” a ti a. Tin, a tho va, a zui ta a.

31Tin, Gehazia chuan anni chu a lo hmakhalh a, tiang chu naupang hmaiah chuan a han nghat a; nimahsela, awkâ leh hriat theihna rêng rêng a nei lo va. Chutichuan, a be tûrin a kîr leh a. “Naupang chu a meng hauh lo mai,” tiin a hrilh a.

32Tin, Elisa chu ina a va luh chuan ngai teh, naupang chu a lo thi tawh reng a, a khumah chuan an lo la mut a.

33Chutichuan, a va lût a, an pahnih chuan kawng a khâr hnan a, Lalpa hnênah a ṭawngṭai a.

34Tin, a han lâwn a, naupang chu a bawhkhuh a, a hmui leh a hmui, a mit leh a mit, a kut leh a kut a chuktuah a; tin, a chungah chuan a kaikûn a; tichuan, naupang taksa chu a lo lum ta tial tial a.

35Chutichuan, a zuk chhuk leh a, in chhûngah chuan a han vei a; tin, a han lâwn a, a chungah chuan a han kaikûn leh a; tichuan, naupang chu vawi sarih a han hahchhiau va, naupang chu a lo meng ta a.

36Tin, Gehazia a ko va, “He Sunem nu hi han ko teh,” a ti a. Chutichuan, a va ko va. Tin, a hnêna a va luh chuan, “I fapa hi pawm rawh,” a ti a.

37Tichuan, a va lût a, a ke bulah a bawkkhup a, a hmaia lei siin chibai a bûk a; tin, a fapa chu a pawm a, a chhuak ta a.

38Tin, Elisa chu Gilgal-ah a kal leh a, chumi ramah chuan ṭam a tla a. Tin, zâwlneiho fapate chu a hmaah an ṭhu khâwm a; a chhiahhlawh hnênah, “Bêl lian tak kha chhuang langin, zâwlneiho fapate hi thil chhumkawi chhumsak rawh khai,” a ti a.

39Tin, mi pakhat ram lamah chawhmeh zawng tûrin a va kal a, ram hrui hi a va hmu a, chuta mi ram âwmpâwng chu a puan tlin tâwkin a rawn fûn a, a zai sawm a, bêla thil chhumkawiah chuan a thlâk ta a; eng tih an hre hauh lo mai a.

40Chutichuan, chu miteho ei atân chuan an han suak chhuak a. Tin, thil chhumkawi chu an han ei chuan, heti hi a ni a, “E khai, Pathian mi, bêl chhûngah hian thihna a awm alâwm le,” an ti ta chûl mai a. Tichuan, an ei thei ta lo va.

41Tin, ani chuan, “Chhangphut han la teh u,” a ti a. Tin, chu chu bêlah a han thlâk a, “He mite eiah hian han suak chhuak teh u,” a ti a. Tichuan, bêlah chuan hlauhawm eng mah a awm ta lo va.

42Tin, Baal-salisa aṭangin mi pakhat a lo kal a, Pathian mi chu buh thar hmasa bera siam buhsanghar chhangpêr sawmhnih leh buh thar vui a ipin a rawn kensak a. Ani chuan, “He miteho ei atân hian pe ta che,” a ti a.

43Tin, a chhiahhlawh chuan, “Eng â ni? Hei hi mi za zet ka hlui ang maw?” a ti a. Ani erawh chuan, “He miteho ei atân hian pe rawh; Lalpan heti hian a ti: ‘An ei ang a, an ei bâng bawk ang,’ tiin,” a ti a.

44Chutichuan, a han hlui a, an ei a, Lalpa tih ang ngeiin an ei bâng bawk a.

← Chapter 3 Jump to: Chapter 5 →