Esther 2

Mizo OV

← Chapter 1 Jump to: Chapter 3 →

1Chûng thil hnua Lal Ahasuera thinrim chu a lo daih hnu chuan, Vasti leh a thiltih leh a chungchânga thupêk chu a hre chhuak a.

2Chutichuan, lal chhiahhlawh, a rawngbâwltute chuan a hnênah, “Lal tân nula hmêl ṭha zawn ni sela;

3lal pindan enkawltu Hegaia, hmeichhe enkawltu hnuaiah, Susana lal hmeichhe dah khâwmna inah nula hmêl ṭha zawng zawng ko khâwm tûrin lalin a ram chhûnga ram ṭhen zawng zawngah hotu ruat sela; tin, an intihthianghlimna tûrte pêk ni ṭheuh sela;

4lal tilâwmtu ber nula chu Vasti aiah lalnu ni sela,” an ti a. Tichuan, chu chuan lal chu a tilâwm a, chutiang chuan a ti ta a.

5Lal khawpui Susan-ah chuan Juda mi, mi pakhat a awm a, a hming chu Mordekaia a ni a, Benjamin mi Kisa fa Simeia fapa Jaira fapa a ni;

6Babulon lal Nebukadnezzaran Juda lal Jekonia sala a hruai laia Jerusalem aṭanga hruai a ni.

7A pami fanu, Hadasi, Estheri an tih chu a enkawl seilian a; pa a nei lo va, nu a nei bawk si lo va. Nula chu a nalhin a hmêl a ṭha hle mai a; a nu leh a pa an thih hnuin Mordekaia chuan a fanu atân a awmpui ta a ni.

8Chutichuan, lal thupêk leh lal thuruat chu an lo hriata, nula tam tak, lal khawpui Susan-a Hegaia vênnaah an kal khâwm chiam lai chuan heti hi a ni a, Estheri chu lal inah hmeichhe vêngtu Hegaia vênnaah chuan an hruai lût a.

9Tin, nula chuan a tilâwm a, a duhsakna a chang a, lal in ata a chanvo leh a intihthianghlimna tûr chu a pe thuai mai a, nula pasarih pêk âwm deuh deuhte nên; amah leh a nulâtpuite chu hmeichhe awmna hmun ṭha berah a hruai ta a.

10Estheri chuan eng chi nge a nih leh tute nge a laichînte a hriattîr hauh lo va; Mordekaia chuan hriattîr lo tûrin thu a pe tlat a ni.

11Estheri chuan eng nge a tih ṭhina, engtin nge a awm tih hre tûrin Mordekaia chu ni tin hmeichhe awmna kawt hung chhûngah chuan a kal ṭhîn a.

12Tin, thla sâwm leh thla hnih hmeichhe tâna dân anga an chungchânga thiltih hnua Lal Ahasuera hnênah nulaho an kal hun a lo thlen chuan (chutiangah chuan an intihthianghlim hun a kim tawh ṭhîn a, hetiang hian an ti ṭhîn a ni, thla ruk chhûng murra hriakin an zût a, thla ruk dang leh chhûng rimtui leh hriak dangin an zût leh a),

13hetiang hian an kal ṭhîn a, lal ina luhpui tûrin hmeichhe awmna ata an duh apiang an pe ṭhîn a ni.

14Tlai lamah an kal a, a tûkah, hmei vêngtu, lal pindan vêngtu Saasgaza vên hmeichhe awmna pahnihnaah an lêt leh ṭhîn a; lalin a duha, an hming lama a kohte chauh lo chu lal hnênah an kal leh tawh ṭhîn lo.

15Chutichuan, Mordekaia pami Abihaila fanu, a fanu atâna a awmpui Estheri chu lal hnêna a kal hun a thlen chuan, hmeichhe vêngtu, lal pindan vêngtu Hegaia ruat chauh lo chu eng mah a duh lo va. Estheri chu a hmu apiangte duh zâwng mi nih a kai a.

16Chutichuan, Estheri chu Lal Ahasuera lal inah thla sâwmna, Tebeth thlaah kum sarih a lal kumah an hruai lût a.

17Lal chuan hmeichhe dang zawng zawng aiin a hmangaih a, nula dang zawng zawng aiin khawngaihna leh duhsakna a hlawh a; tichuan, lallukhum a khumtîr a, Vasti aiah lalnuah a siam ta a.

18Chutichuan, Estheri hmingin lal chuan a mi liante leh a mite tân ruai ropui tak a ṭheh a; a rama mite tân awm nî a khamsak a, lal tih âwm rêngin phal takin thilte a sem a.

19Tin, nulaho an inkhâwm leh lai chuan Mordekaia chu lal kawt hung kawngkaah a ṭhu a.

20Mordekaia thupêk avângin Estheri chuan tute nge a laichînte leh eng chi nge a nih a la hriattîr lo fo va; Estheri chuan Mordekaia thu chu a awmpui laia a zâwm ṭhîn ang khân a la zâwm reng a ni.

21Tin, lal kawt hung kawngkaa Mordekaia a ṭhut lai chuan lal pindan vêngtu zînga mi pahnih Bigthana leh Teresa, kawngka vêng ṭhîntute chu an thinur a, Lal Ahasuera chungah kutthlâkna remchâng an zawng a.

22Chu thil chu Mordekaian a lo hria a, Lalnu Estheri chu a hrilh a; tin, Estheri chuan Mordekaia hmingin lal a hrilh a.

23Tin, chumi thu chu an han chhui chiang a, chutiang chu a lo ni ngei tih an hriat chhuah chuan thingah an khai hlum ve ve a; chu chu lal kawl, lal chanchin ziakna buah an ziak a.

← Chapter 1 Jump to: Chapter 3 →