Psalms 71

Mizo OV

← Chapter 70 Jump to: Chapter 72 →

1Aw Lalpa, nangmahah chuan ka rinna ka nghat ṭhîn a; Eng tikah mah mualphovin mi awmtîr suh ang che.

2I felna avânga mi chhanhimin, mi chhan chhuak la; Ka lamah hian i beng rawn dawhin, mi chhandam ang che.

3Ka tân awmna lungpui, ka kal fo theihna tûr lo ni ang che; Nangin mi chhandam tûrin thu i pe a; Ka lungpui leh ka kulhpui i ni si a.

4Aw ka Pathian, mi suaksual kut ata mi chhan chhuak ang che, Mi fel lo leh nun chhe tak kut ata chu.

5Aw Lalpa Pathian, nang chu ka beiseia chu i ni si a; Ka naupan têt ata ka rina chu i ni.

6Ka nu pum aṭang rêngin nangma kaihin ka awm ṭhîn; Ka nu rîl ata mi la chhuaktu i ni a; Nangmah a ni ka fak fo dâwn che ni.

7Mi tam tak ngaihin thilmak ang ka ni a; Nimahsela, nang chu ka inhumhimna nghet tak i ni.

8Ka kâ hi i faknain a khat ang a, Nilêngin nangmah chawimawinain a khat bawk ang.

9Ka tar hunin mi paih thla suh la; Ka tha a ṭhum hunin mi kalsan suh ang che.

10Mi dotute chuan ka chungchâng thu an sawi si a; Ka nunna chângtute an inrâwn bawk a,

11“Pathianin a kalsan ta; ûm ula, man rawh u; Chhanhimtu tûr rêng an awm si lo,” tiin.

12Aw Pathian, mi hlat lul suh la; Aw ka Pathian, mi ṭanpui tûrin hmanhmawh ang che.

13Ka nunna dotute chu mualpho leh boralin awm sela; Ka chhiatna tûr zawngtute chu sawichhiatna leh zahnaa khuhin awm rawh se.

14Nimahsela, kei zawngin ka beisei fo vang a, Ka la fak zual deuh deuh vang che.

15Ka kâ hian i felna thu a hril ang a, Nilêngin i chhandamna thu a hril bawk ang; A tam chin ka hre si lo.

16Lalpa Pathian thiltih ropui takte nên ka lo kal a; I felna, nangma felna thu chauh ka sawi ang.

17Aw Pathian, ka naupan têt ata nangin mi zirtîr a; Tûn thlengin i thilmak tihte chu ka hriattîr ṭhîn.

18A ni, aw Pathian, ka tara ka lû ṭuak hun pawhin mi kalsan lul suh ang che; I chakna hi ṭhangthar lehte hnênah leh, I thiltihtheihna hi lo la awm tûr apiangte hnêna ka hriattîr hma loh zawng.

19Aw Pathian, i felna pawh a sâng êm êm a ni; Aw Pathian, nang thil ropui takte titu, Nangmah ang hi tu nge awm?

20Nang, manganna tam tak leh nasa tak mi hmuhtîrtu chuan, Mi tinung leh ang a, Lei thûk tak ata mi hruai chhuak leh ang.

21Nangin ka ropuina mi tihpunsak la, Lo hawi lehin mi thlamuan ang che.

22Perhkhuangin ka fak bawk ang che, Aw ka Pathian, i thutak ngei chu ka fak ang. Aw nang Israel-ho Mi Thianghlim, ṭingṭang nên nangmah fakin ka zai ang.

23Nangmah faka ka zai hunin ka hmui hi a hlim êm êm ang a; Ka nunna i tlan pawh hi a hlim êm êm ang.

24Ka lei pawh hian nilêngin i felna thu a sawi ang; Ka chhiatna tûr zawngtute chu an mualphovin an zak ta si a.

← Chapter 70 Jump to: Chapter 72 →