Revelation 8

Mizo OV

← Chapter 7 Jump to: Chapter 9 →

1Tin, chhinchhiahna pasarihna chu a han phelh veleh, dâr chanve lai vân chu a reh ta ṭhuap a.

2Tin, Pathian hmaa vântirhkoh pasarih ding ṭhînte chu ka hmu a; tin, an hnênah tawtawrâwt pasarih an pe a.

3Tin, vântirhkoh dang a lo kal a, rangkachak rimtui hâlna bâwm kengin maichâm kiangah chuan a ding ta a: tin, lalṭhutphah hmaa rangkachak maichâm chunga mi thianghlim zawng zawng ṭawngṭainate belhchhahna tûrin, englo rimtui tam tak a hnênah an pe a.

4Tin, englo rimtui khu chu vântirhkoh kut ata Pathian hmaah a chho ta a, mi thianghlimho ṭawngṭainate nên chuan.

5Tin, vântirhkoh chuan englo rimtui hâlna bâwm chu a la a, maichâma meiin a tikhat a, leiah a paih thla ta a; tichuan, khawpui ri te, aw te, kâwlphe te, lîrnghîng te a lo awm ve ta nghâl a.

6Tin, vântirhkoh pasarih, tawtawrâwt pasarih kengte chu hâm tûrin an inbuatsaih ta a.

7Tin, a hmasa ber chuan a han hâm a; tichuan, rial leh mei, thisen nêna inpawlh a lo awm ta nghâl a, chûng chu leiah paih thlâkin a awm ta a; tichuan, lei hmun thuma ṭhena hmun khat chu a kâng ral ta a, thingte pawh hmun thuma ṭhena hmun khat chu a kâng ral a, hlobet hring zawng zawng pawh a kâng ral ta bawk a.

8Tin, vântirhkoh pahnihna chuan a han hâm a; tichuan, tlâng lian pui, meia kâng lai ang hi tuifinriatah an paih thla a; tichuan, tuifinriat hmun thuma ṭhena hmun khat chu thisenah a lo chang ta a;

9tuifinriata thilsiam, nunna neite chu, hmun thuma ṭhena hmun khat chu an thi ta bawk a; lawngte pawh hmun thuma ṭhena hmun khat chu tihchhiat a ni ta bawk a.

10Tin, vântirhkoh pathumna chuan a han hâm a; tichuan, arsi lian pui, meichher anga alh hi vân aṭangin a lo tla a, lui hmun thuma ṭhena hmun khat leh tuikhurte chu a delh ta a;

11chu arsi hming chu sai a ni a; tui hmun thuma ṭhena hmun khat chu saiah a lo chang ta a; tichuan, chu tui chu an in a, mi tam tak an thi a, a lo khâk tâk avângin.

12Tin, vântirhkoh palina chuan a han hâm a; tichuan, ni hmun thuma ṭhena hmun khat, thla pawh hmun thuma ṭhena hmun khat, arsite pawh hmun thuma ṭhena hmun khat chu tihchhiat a ni ta a; chûngho hmun thuma ṭhena hmun khat chu a thimna tûr leh, chhûn chu hmun thuma ṭhena hmun khat a ên lohna tûrin; zân pawh chutiang bawkin a ni.

13Tin, ka han en a, mupui, vânlaizâwla thlâwkin aw ring takin, “Vântirhkoh pathum tawtawrâwt la hâm tûr, chumi ri lo la awm tûrte avâng chuan leia awmhote chung a pik e, a pik e, a pik e!” a tih ka hria a.

← Chapter 7 Jump to: Chapter 9 →