Romans 9

Mizo Bible

← Chapter 8 Jump to: Chapter 10 →

1Kristaah chuan thu tak tak ka sawi a ni, ka daw lo e, Thlarau Thianghlim zarah chuan ka chhia leh tha hriatna pawh

2ka thinlungah hian hrehawmna nasa tak leh lungngaihna reh thei lo ka pai a sin;

3ka unaute, tisa lama ka chipuite aiah hian, kei hi Krista hnen ata tihhran khawp laiin anchhe dawngin awm hial i la ka ti si a;

4Israel mi an ni si a; fa nihna te, ropuina te, thuthlung zawng zawng te, Dan pekna te, Pathian rawngbawlna te, thutiam zawng zawng te an ta a ni a;

5pute chu an ta a ni bawk a, tisa lam thu-ah Krista chu anmahni zing ata lo chhuak a ni bawk a; ani chu thil zawng zawng chunga awm, chatuana fak tlak Pathian a ni. Amen.

6Nimahsela Pathian thu chu engmah lo anga awm ta a ni lo e. Israela thlahte chu Israel mi an ni vek lo e;

7Abrahama thlahte an nih avangin an zain a fate an ni vek hek lo; "Isaaka-ah hian i thlahte an ti ang," tih a ni zawk.

8Chu chu, tisa fate chu Pathian fate an ni lo a, thutiam fate chu Abrahama thlaha ruat an ni zawk tihna a ni.

9Thutiam chu hei hi a ni: "Tun ang hun hian ka lo kal ang a, Sari chuan fapa a hring ang," tih hi.

10Chu chang a ni lo e, Rebeki pawhin mi pakhat (kan pu Isaaka) laka phir a pai lai khan -

11naute chu an la pian hmaa, chhia leh tha an la tih hmain, thiltih vang ni loin, a kotu duh vang zawkin, thlan lam thu-ah Pathian thu ruat chu a ngheh theihna'n

12- a hnenah chuan, "A upa zawkin a naupang zawk rawng a bawl ang," Pathianin a tih kha,

13"Jakoba ka hmangaih a, Esauva erawh chu ka hua," tih ziak ang khan.

14Engnge kan sawi tak ang le? Pathianah chuan fel lohna a awm em ni? Hnai lo e.

15Ani chuan, "Ka khawngaih apiang chu ka khawngaih ang a, zah ka ngaihna chung apiangah chuan zah ka ngai ang," tiin Mosia hnena a sawi si kha.

16Chuvangin a duhtu avng a ni lo a, a tlantu avang a ni hek lo, a khawngaihtu Pathian avang a ni zawk e.

17Pathian Lehkha Thuin Pharaoa hnenah chuan, "He mi avang ngawt hian ka tungding chia, nangmahah chuan ka thiltihtheihna ka entir theihna tur leh, khawvel zawng zawnga ka hming a than theihna'n," a ti si a.

18Chutichuan Pathianin a duh apiang a khawngaih thin a, a duh apiang pawh a tiluhlul thin a ni.

19Nang chuan ka hnenah, "Engati nge a la dem cheu ni? A duhzawng tuin nge dodal ni?" i ti dawn a ni awm e.

20A ni, nimahsela aw mihring, Pathian hnial veitu chu tu nge maw i nih le? Thil siam chuan a siamtu hnenah, "Engati nge hetianga mi siam?" a ti ang em ni?

21Bellei tlang khat bel pakhat hlu tak, bel pakhat hlu lo taka siam turin belvawtu chuan bellei chungah thu a nei lo em ni?

22Khawngaihna bel, ropui tura a lo buatsaih lawkate chungah chuan a khawngaihna ngahzia a entir theihna'n,

23thinurna bel boral tlakte chungah chuan, Pathianin a thinur leh a thiltihtheihna lantir duh mah se la, a dawh hram hram chuan eng nge pawi ang?

24(Chu khawngaihna belte chu Judate zing ata chauh ni loin, Jentailte zing ata pawh kohte kan ni).

25Hosea lehkhabuah chuan, "Ka mite ni ngai lo chu, 'Ka mite,' ka ti ang; Tin, hmangaih ngai lohvi chu, 'Hmangaihi,' ka ti ang.

26Tin, heti hi a lo ni ang a, an hnenah, 'Ka mite in ni lo e,' a tihna hmunah ngei chuan Pathian nung fate vuahin an awm ang," tia ziak ang bawk khan.

27Isaia pawhin Israel mite thu aupuiin, "Israel mite chu tuifinriata tiau zatin tam mah se la, a hrem bak chauh chu chhandamin an awm ang.

28Lalpa chuan rang taka tizo diamin lei chungah a hrem tur thu a hlen dawn si a," a tih kha.

29Isaia vekin, "Mipuite Lalpa chuan chi thlahtu min lo zuahsak suh se la chu, Sodom khua angin kan lo awm tawh ang a, Gomorra khua anga siamin kan lo awm tawh bawk ang," tia a lo sawi lawk ang bawk khan.

30Engnge kan sawi tak ang le? Jentail, felna um lote chuan felna an lo phak tawh a ni, - rinna avanga felna chu.

31Israel, felna dan umte erawh chuan felna dan chu an phak zo ta lo.

32Eng vang nge ni? Rinnain an um lo a, thiltiha hmuh theih angin an um avang a ni. Tlukna lungah chuan an tlu si a;"Ngai teh, Zionah chuan tlukna lung leh dalna lungpui ka dah a, Tupawh amah ring apiang chu a mualpho lo ang," tih ziak ang khan.

33"Ngai teh, Zionah chuan tlukna lung leh dalna lungpui ka dah a, Tupawh amah ring apiang chu a mualpho lo ang," tih ziak ang khan.

← Chapter 8 Jump to: Chapter 10 →