Madurese Bible 1994 (ALKETAB E DHALEM BASA MADURA)
Saneyap kalowarga andhi' kebbun anggur ban kebbun ara. Saomorra Sulaiman ra'yat sa Yehuda ban sa Isra'il dhari Dan sampe' ka Bersyeba odhi'na aman ban taremtem. Sabab, to-rato e bara'na Efrat padha atellok kabbi ka salerana, ban sa-bangsa dhari ra-nagara e sabingkerra karaja'anna akanca ban salerana. Tana e bara'anna Songay Efrat dhari Tifsah e penggirra Songay Efrat terros ka bara' ka kottha Gaza e Filistin sampe' ka batessa Messer, ekobasae Sulaiman kabbi. Sa-bangsa e nagara jareya atellok ka salerana ban majar pesse opet. Han-bahan kakanan se ekaparlo Sulaiman sabban arena iya areya teppong alos lema ebu liter, teppong kasar sapolo ebu liter, sape kandhang sapolo meggi', sape teggal dhu polo meggi', ban dumba saratos meggi'. Laen dhari jareya gi' kodu esadhiya'agi keya manjangan, keddang ban sabangsana ajam etek.