Daniel 12

Madurese Bible 1994 (ALKETAB E DHALEM BASA MADURA)

← Chapter 11 Jump to:

1Malaekat se arasogan linen jareya adhabu pole, “E bakto jareya malaekat agung Mikha'el se ajaga bangsana ba'na bakal dhatengnga. Saellana jareya pas bakal dhatengnga jaman malarat se tadha' bandhinganna sajjegga badha sa-bangsa. Tape oreng dhari bangsana ba'na se nyamana la etoles e dhalem ketabba Allah, bakal epasalamedda kabbi.

2Bannya' e antarana reng-oreng jareya se la mate bakal odhi'a pole; sabagiyan bakal taowa rassana ne'madda odhi' se langgeng, ban se sabagiyan pole bakal taowa rassana eya-seya saterrossa ban nanggung katako'an se langgeng.

3Para pamimpin se bicaksana bakal mancoronga kantha sonarra langnge'. Ban reng-oreng se la ngajari oreng sabannya'na sopaja ngalakone sabarang se becce' ban adil, bakal nyonara akantha tang-bintang salanjangnga.”

4Malaekat jareya laju adhabu pole ka sengko', “Daniyel, mara totop ketab jareya sateya, pas pobuwi segel sopaja pagguna tatotop sampe' ka aher jaman. Bannya' oreng se ngoddiya nalektegi terro taowa badha kadaddiyan apa. Tape ehteyarra jareya tadha' gunana, parcoma bai.”

5Saellana jareya sengko' nangale'e lalake' kadhuwa. Se settong ngadek e penggirra songay bagiyan dhinna' ban settonganna e penggir bagiyan dhissa'.

6Se settong atanya ka se ngadek asemma'an ka olona songay, “Bilaepon kadaddiyan-kadaddiyan se ajib ka'dhinto badhi lastareya?”

7Oreng settonganna rowa ngangka' astana dhu kalaja ka langnge'. Sengko' ngedhing oreng jareya asompa kalaban asmana Allah se langgeng, ca'na dhabuna, “Kadaddiyan-kadaddiyan reya bakal terrosa sampe' tello taon satengnga. Saellana ommadda Allah la mare se eseksa, kadaddiyan-kadaddiyan se ajib jareya bakal ambuwa keya.”

8Sengko' pajat ngedhing kabbi sabarang se edhabuwagi jareya, tape sengko' ta' ngarte. Sengko' laju atanya, “Guste, kadi ponapa sadajana ka'dhinto se ambuwa?”

9Saodda oreng jareya, “Kassa' le-mole, Daniyel, sabab ca'-oca' reya kodu eerrep ban eroseya'agi sampe' aherra jaman.

10Bannya' oreng se eojiya ban epamorneya. Oreng se jahat ta' kera ngarte ban bakal terrosa alako jahat; pera' oreng se bicaksana se ngarteya.

11Molae dhari bakto kurban ren-aren epaambu ban molae badhana barang se nako'e se esebbut Kajahadan se maancor rowa, abidda saebu dhu ratos sangang polo are.

12Bajjra onggu reng-oreng se teptep esto sampe' are se kapeng saebu tello ratos tello polo lema'.

13Ba'na Daniyel, paesto sampe' aher. Ba'na bakal mateya, tape bakal jaga'a pole kaangguy narema opana e are Keyamat.”

← Chapter 11 Jump to: