Judges 15

Madurese Bible 1994 (ALKETAB E DHALEM BASA MADURA)

← Chapter 14 Jump to: Chapter 16 →

1Ta' saapa abidda dhari jareya, e bakto mosemma oreng anye gandum, Simson meyos ka rajina, abakta le-olle embi' se gi' ngodha. Dhabuna Simson ka mattowa lake'na, “Kaula terro apanggiya sareng bine kaula e kamar.” Tape ban mattowa lake'na ta' eparengngagi.

2Dhabuna ka Simson, “Ca'na sengko' ba'na me' la baji' onggu ka binena, daddi, bi' sengko' binena ba'na jareya la ebagi ka kancana ba'na. Tape ba'na olle ngala' gante ale'na, araddinan robana.”

3Dhabuna Simson, “Ponapa se ejalannagiya kaula ka oreng Filistin samangken paneka, banne sala kaula!”

4Simson pas mega' pate' alasan tello ratos meggi'. Pate' alasan jareya ekanthe' gan wa'-dhuwa', esambung bunto'na. E sambunganna bunto' jareya epobuwi colok.

5Colok jareya eodhi'i kabbi; pate' alasanna pas eocol ka gal-teggalla oreng Filistin. Daddi se katonon banne pera' gandum se gi' buru eanye; gandum se gi' badha e teggal ban bun-kebbun jaitun noro' taobbar keya.

6Reng-oreng Filistin nalektegi sapa se andhi' lako jareya. Reng-oreng Filistin pas tao ja' jareya lalakonna Simson, sabab bi' mattowa lake'na se badha e Timna rajina eparengngagi ka kancana Simson. Daddi bi' reng-oreng Filistin rajina Simson ban saessena compo'na eppa'na eobbar.

7Dhabuna Simson ka reng-oreng Filistin, “Daddi, kantha reya carana ba'na? Sengko' asompa'a ta' ambuwa sabellunna males kadaddiyan reya ka ba'na kabbi!”

8Simson pas nyerrang oreng Filistin epakejjem; bannya' oreng Filistin se epate'e. Saellana jareya, Simson pas alenggi e dhalem guwa e gumo' bato e Etam.

9Reng-oreng Filistin entar ka dhaera Yehuda pas akemah e jadhiya, sarta pas nyerrang kottha Lehi.

10Reng-oreng Yehuda atanya, “Arapa ba'na me' nyerrang tang bangsa?” Saodda reng-oreng jareya, “Sengko' dha' enna' mega'a Simson sopaja tang bangsa bisa'a males apa se elakowagi Simson ka tang bangsa.”

11Ngedhing oca'na oreng Filistin jareya, reng-oreng Yehuda tello ebu oreng bannya'na entar ka gumo' bato e Etam. Ca'na reng-oreng jareya ka Simson, “Simson, ponapa panjennengngan ta' ngagali samangken bangsa Yehuda ekobasae oreng Filistin? Aponapa panjennengngan me' sapaneka ka bangsa abdina?” Saodda Simson, “Sengko' pera' males se elakonnagi oreng Filistin ka sengko'.”

12Ca'na reng-oreng jareya, “Abdina ka'dhinto mega'a panjennengngan epassra'agiya ka oreng Filistin.” Dhabuna Simson, “Mara ba'na ajanji gallu ja' sengko' ta' epateyana bi' ba'na.”

13“Enggi, sae,” ca'na reng-oreng Yehuda jareya. “Panjennengngan namong etaleyana, pas epassra'agiya ka oreng Filistin. Abdina ta' mateyana panjennengngan.” Daddi Simson pas etale'e ngangguy tale se anyar dhadhuwa', pas egiba kalowar dhari guwa jareya.

14E bakto Simson napa' ka Lehi, reng-oreng Filistin nyander ka'-berka' sambi rak-soragan. O-tao pas daddi kowat dhari kobasana PANGERAN. Talena astana epapegga' akantha se mapegga' tale se potthon.

15Saellana jareya Simson pas manggi tolangnga cangkemma hemar se gi' buru mate. Tolang jareya epondhut, eagem mate'e oreng Filistin, bannya'na saebu oreng.

16Simson pas anyanye, “Ngangguy tolangnga cangkemma hemar, sengko' mate'e oreng saebu, ngangguy tolangnga cangkemma hemar, sengko' nombuk mayyidda reng-oreng jareya.”

17Saellana jareya, tolangnga cangkemma hemar jareya pas ebuwang. Daddi kennengngan jareya enyamae Ramat-Lehi.

18Simson pas arassa ce' pelka'na, daddi pas aserro ka PANGERAN, dhabuna, “Guste, Junandalem buru apareng kamennangan ka abdidalem. Ponapa samangken ka'dhinto abdidalem kodu mate kapelka'en, pas epega' sareng oreng Filistin se ta' oneng ka Junandalem?”

19Allah laju mokka' lobang e gumo' bato e Lehi jareya, pas kalowar aeng. Simson ngenom aeng jareya, pas arassa segger pole. Daddi somberra aeng jareya enyamae Somberra Aeng Hakor. Somber jareya gi' badha e Lehi.

20Dhu polo taon abidda Simson mimpin ommat Isra'il e bakto ekobasae bangsa Filistin.

← Chapter 14 Jump to: Chapter 16 →