Leviticus 21

Madurese Bible 1994 (ALKETAB E DHALEM BASA MADURA)

← Chapter 20 Jump to: Chapter 22 →

1Dhabuna PANGERAN ka Mosa, “Kabala ka mam-imam toronanna Harun: Oreng se daddi imam ta' olle manajjis aba'na lantaran noro' entar ka opacarana ngoburragi oreng mate mon se mate jareya balana,

2kajabana mon se mate jareya ebuna, eppa'na, ana'na, taretan lake'na,

3otabana taretan bine'na se gi' ta' alake se apolong e bengkona.

4Imam ta' olle manajjis aba'na lantaran entar ka opacarana ngoburragi oreng mate, mon se mate jareya la-balana binena.

5Imam ta' olle agundhul sabagiyan dhari cethagga ban ta' olle nyokor janggu'na otaba alokae badanna ngangguy barang se tajem kaangguy noduwagi ja' aba'na sossa.

6Imam jareya Tang andhi' malolo, ban ta' olle majuba' Tang nyama. Imam ngatorragi kurban kakanan ka Sengko', molana kodu socce.

7Imam ta' olle abine babine' bekkas sondel, otabana babine' se ta' paraban otaba babine' se atellak ban lakena, sabab imam reya Tang andhi'.

8Bangsa Isra'il kodu ngakone ja' imam reya oreng se kaangguy Sengko' malolo, sabab imam jareya ngatorragi kurban kakanan ka Sengko'. Sengko' reya PANGERAN; Sengko' socce ban Sengko' masocce Tang ommat.

9Mon ana' babine'na imam badha se daddi sondel, babine' jareya ngapessagi eppa'na ban kodu eobbar sampe' mate.

10Imam Agung reya la etahbissagi kalaban eselene mennya' opacara ka attassa cethagga sarta kalaban epangangguy kalambina Imam Agung, daddi obu'na ta' olle salsal polana ta' esoroy, ban ta' olle nyebbit kalambina polana noduwagiya ja' atena sossa.

11Imam reya la eatorragi ka Sengko', epadaddi andhi'na Sengko', daddi ta' olle manajjis aba'na, ta' olle keya manajjis Tang Kemah lantaran kalowar dhari jadhiya entara maso' ka bengko se badha jinazana, maske jareya jinazana eppa'na dibi' otaba ebuna dibi'.

13Imam reya pera' olle abine ban paraban dhari sukuna dibi'. Ta' olle akabin ban randha otaba babine' se etellak bi' lakena, otabana babine' bekkas sondel.

15Mon atoran reya ta' etoro', na'-ana'na se koduna socce, bakal najjissa. Sengko' reya PANGERAN, ban imam jareya bi' Sengko' la epadaddi Imam Agung malolo.”

16Dhabuna PANGERAN ka Mosa,

17“Kabala kantha reya ka Harun: Toronanna ba'na se ena badanna ta' olle ngeba kurban kakanan ka Sengko'. Atoran reya kodu eangguy salanjangnga.

18Oreng se ngatorragi kurban ta' olle ena badanna; se emaksod iya areya se buta otaba dippang, se rosak mowana otaba bagiyanna badanna,

19se dhingkol otaba se dippang sokona,

20se bungko' ban se cabul, se sake' mata otaba andhi' panyaket kole'; otaba se ekobiri.

21Saneyap toronanna Imam Harun se ena badanna ta' olle ngatorragi kurban kakanan ka Sengko'.

22Tape olle ngakan kakanan se ekurbannagi, iya areya kurban kakanan se socce otaba se talebat soccena.

23Lantaran oreng jareya ena badanna, ta' olle entar ka seddi'anna bir-tabir se mesa Rowangan Se Socce otabana mezba. Bariya keya ta' olle manajjis rang-barang se la eteptebbagi kaangguy Sengko' malolo, sabab Sengko' reya PANGERAN, ban Sengko' se nantowagi rang-barang jareya kaangguy Sengko' malolo.”

24Jareya atoran-atoran se epanapa' Mosa ka Harun ban tra-pottrana, ban ka saneyap bangsa Isra'il.

← Chapter 20 Jump to: Chapter 22 →