Zechariah 7

Madurese Bible 1994 (ALKETAB E DHALEM BASA MADURA)

← Chapter 6 Jump to: Chapter 8 →

1E tanggal empa' bulan Kislew, iya reya bulan sanga', e taon se kapeng empa' pamarenta'anna Darius, PANGERAN apareng dhabu pole ka sengko'.

2Oreng Betel la ngotos Sarezer ban Regem-Melekh sarta reng-orengnga ka Padalemmanna PANGERAN Se Mahakobasa, nyo'ona berkadda.

3Reng-oreng jareya esoro keya atanya ka mam-imam ban bi-nabbi kantha reya, “Ponapa gi' parlo kaula sadaja nangese ancorra Padalemman Socce kalaban cara apowasa sabban bulan se kapeng lema' akadi se ampon kalakon ataonan abidda?”

4Reya' pessen se edhabuwagi PANGERAN ka sengko'.

5Dhabuna, “Kabala ka reng-oreng sanagara reya ban ka para imam, ja' powasa ban tanges se elakone reng-oreng jareya e bulan se kapeng lema' ban kapeng petto' sampe' pettong polo taon abidda rowa banne pangormadan ka Sengko'.

6Bariya keya e bakto reng-oreng jareya ngakan ban ngenom, pera' kaangguy makobassa aba'na dibi'.”

7Jareya se edhabuwagi PANGERAN kalaban parantara'anna bi-nabbi e jaman lamba' e bakto Yerusalim gi' ekennengnge oreng ban ma'mor pandhudhu'na; e bakto oreng banne pera' enneng e sa-disa e sabingkerra kottha tape la'-mala' enneng e bagiyan lao'na ban e babana mo'-gumo' e bagiyan bara'.

8PANGERAN Se Mahakobasa apareng dhabu reya ka sengko',

9“Pan-barampan taon se kapongkor Sengko' makalowar ta-parenta reya ka Tang ommat, ‘Ba'na kodu adil, bellas ase ban becce' atena ka sasamana.

10Ja' nyecce' para randha, na'-kana' jatim, reng-oreng manca se neptep e nga'-tengnga'anna ba'na, otabana sapa'a bai se teppa'na kasossa'an. Ban ja' andhi' sajja se jahat ka sasamana.’

11Tape Tang ommat cengkal ban ta' endha' ngedhingngagi; pekkeran ban kopengnga epatopo sampe' ta' ngedhing.

12Atena epagali sampe' akantha bato. Sengko' ce' peggella polana reng-oreng jareya ta' endha' atoro' ka sabarang se eajarragi Sengko' ka reng-oreng jareya kalaban parantara'anna bi-nabbi jaman lamba'.

13Sengko' ta' nyaodi du'ana, sabab reng-oreng jareya ta' ngedhingngagi keya e bakto Sengko' acaca.

14Sengko' padha ban kaleng busbus, nyapowe reng-oreng jareya kabbi sampe' padha tapaksa odhi' e ra-nagara manca. Tana se landhu reya la daddi seppe tadha' orengnga sarta kajal.”

← Chapter 6 Jump to: Chapter 8 →