1 Samuel 25

Maasai 2020 (BIBLIA SINYATI)

← Chapter 24 Jump to: Chapter 26 →

1Neye apa Samuel, neiturrurro Israel pooki aaishiraki ninye, nenukaa ninche ninye te nkaji enye te Rama. Nedumunye Daudi nedoyio alo ong'ata e Paran.

2Netii apa oltung'ani otii Maon, otii esiaai enye Karmel. Eikarsis apa ilo tung'ani oleng; eeta apa ninye nkerra nkalifuni uni o nkineji enkalifu nabo. Nebarnu apa ninye ilpapit loo nkerra enyena te Karmel.

3Ore apa enkarna e ilo tung'ani naa Nabal, ore enkarna e nkitok enye naa Abigail. Naa ng'en apa ina kitok neikishiaan kake kemoda apa olee naa torrono olkuaak; naa ole ntipat e Kaleb apa.

4Nening Daudi ti ong'ata nchere ebarnita Nabal nkerra enyena.

5Neaku eirriwayie Daudi ilbarnot tomon; nejoki Daudi lelo barnot, “Elepa enchom Karmel, nipuopuo enetii Nabal, nirorokiki ninye te nkarna ai.

6Naa nji enkuna te nirorokiki ninye: ‘Metaa enino eseriani, metaa eseriani ene nkaji ino, metaa eseriani ene lelo pooki liata iyie.

7Aning nanu nchere iata iyie ilabarnok; etii oshi ilchekuti linono te nebo iyiook, neitu iyiook kintaas ninche entorrono, neitu ninche elau toki, ina kata pooki etii Karmel.

8Nkilikuana ilbarnot linono, amu eikiliki ninche. Metaa nchoo ilbarnot laainei etum omom too nkonyek inono; amu kipuonu iyiook te nkolong o sirua. Kitoomono iyie, nchoo pooki toki niaata isinkan linono o olayioni lino Daudi.’ ”

9Ore ake pee epuonu ilbarnot le Daudi, nejoki ninche nena pooki Nabal te nkarna e Daudi; netoni aanyisho.

10Newaliki Nabal isinkan le Daudi nejo, “Kaing'ae Daudi? Kaing'ae olayioni le Yese? Etii oshi taata kuna olong'i isinkan kumok oopuo aaing'uaa ilkituaak lenye.

11Kaitayu nanu endaa ai o enkare ai o enkiring'o ai nateyieng'uo te nkaraki ilabarnok laainei, aisho iltung'ana ooing'uaa ewueji nemayiolo nanu ajo kaji eing'uaa?”

12Neaku eibelekenyate lelo barnot le Daudi aapuo, neshuko neliki ninye ina.

13Nejoki Daudi iltung'ana lenyena, “Teena pooki ng'ae olalem lenye!” Ore pooki ng'ae te ninche neen olalem lenye; neen sii ninye Daudi olalem lenye; nepuo iltung'ana oobaya iip ong'uan aasujaa Daudi, netoni iltung'ana iip are aarrip ilolan.

14Kake etiaaka obo loo lbarnot Abigail, enkitok e Nabal, “Ng'ura, Eirriwua Daudi ilkiliku ooing'uaa ong'ata meetu aairoroki olkitok lang, kake etamoro ninche.

15Ore eyia, eisupati apa lelo tung'ana te iyiook, neitu iyiook kitum entorroni, neitu iyiook kilau toki apa kitii ong'ota, te nkata naba anaa enikishomo te nebo ninche;

16esuntai apa ninche te iyiook te nkewarie o te ndama, te ina kata pooki apa nikitii iyiook te nebo ninche king'orita nkerra.

17Ore naa taata tayiolo ena nidamu eniaas; amu eitobirakitia olkitok lang entorroni o enkaji enye pooki, naa kegogong ninye oleng meetae oltung'ani oidim airorie ninye.”

18Kaae neisarrisar Abigail, neya imukateni iip are, o lbenia oare loo lonito le naisho oo sabibu o nkerra imiet naayieng'a, o ntemat imiet enkurma napejo o rridat iip loo sabibu, o mukateni iip are oo lng'abolo, neirragie ninche te nchumata oo sirkon.

19Nejoki ninye lelo barnot lenye, “Enchom enturuko te dukuya nanu; ng'ura, kalotu nanu asuju intae.” Kake eitu ninye eliki olpayian lenye Nabal.

20Ore eloito ninye ekedito osikiria nedou alotu abori olmelil lo ldoinyo, ng'ura, nelotu Daudi, o ltung'ana lenyena aadou aanang'are ninye; nenang'are ninye ninche.

21Netejo apa Daudi, “Esipa pesho apa nanu atorripo nena pooki naata ele tung'ani ti ong'ata neaku meetae entoki natalaki te nena pooki naara nkunenyena; naatushukoko ninye nanu entorroni te sidano.

22Metaasa Enkai ena te Daudi, neitulusoo sii, te natung'uayie nanu tadekenya obo lee le lelo pooki oora ilenyena.”

23Ore ake pee edol Abigail Daudi, neisarrisar ninye, nedou to sikiria, nebatata ninye te dukuya Daudi te nkomom enye, neirrugo abaiki enkop.

24Nebatata ninye too nkejek enyena nejo, “Shumata nanu ake, olkitok lai, nchoo elotu entorroni; aatoomono nchoo esinka ino eiro too nkiyiaa inono, nining irorei le sinka ino.

25Mincho olkitok lai eshilaa ele tung'ani le ntorroni, Nabal; amu ore anaa enatiu enkarna enye, neijia etiu ninye, Nabal enkarna enye, netii emodai te nebo ninye; kake ore nanu esinka ino eitu adol lelo barnot lo lkitok lai, laa ninche iyie irriwua,

26ore naa taata, olkitok lai, anaa enaishu Olaitoriani, o anaa enaishu oltau lino, idolita ajo kimbooyie iyie Olaitoriani aitung'uaa enkibukoroto o sarge, o enkitalakunoto e lap te nkaina ino makewan, ore naa taata nchoo ilmang'ati linono o lelo ooing'oru aaitaas entorroni olkitok lai etiu anaa Nabal.

27Ore taata ena kishoroto naa ninye eyaka esinka ino olkitok lai inchoo meishori lelo barnot oosuj olkitok lai.

28Aatoomono tapalakaki engolong'akinoto e sinka ino; amu esipa keitaa Olaitoriani olkitok lai enkaji nauno, amu ilarrabali lo Laitoriani etii olkitok lai; nemetumi entorroni te iyie anaa ninchu.

29Te nedumunye iltung'ana pee kisujaa iyie pee eing'oru enkishui ino, ore enkishui o lkitok lai naa keenari to rridata loo looishu te nking'urata o Laitoriani Enkai ino; ore enkishui oo lmang'ati linono nenang'aa ninye anaa osoit onang'ari te nkopito.

30Ore ake pee eidip Olaitoriani aitaasa olkitok lai te risioroto e nena pooki sidain naairoro ninye ti alo iyie, nikitegelua ninye taa olkitok te shumata Israel,

31metum olkitok lai enaitagor arashu enyamali o ltau, te nkibukoroto o sarge metii emporeet, arashu to lkitok lai eitalaku elap makewan. Ore ake pee kindip Olaitoriani aitaasa olkitok lai esidai, nidamu naa esinka ino.”

32Nejoki Daudi Abigail, “Meisisi Olaitoriani, Enkai e Israel, laa ninye nikirriua iyie ena olong pee kinang'are nanu!

33Metamayiani eng'eno ino, naa mikitamayiani iyie, aa iyie nikimbooyie nanu ena olong te nkibukoroto o sarge o te nkitalakunoto elap te nkaina ai makewan!

34Amu ore te sipata anaa enaishu Olaitoriani Enkai e Israel, laa ninye laaibooyie nanu eitu aaitame iyie, te neme eisarisarua iyie nikilotu anang'are nanu, esipa ore tadekenya anaata eitu ninye elekakini Nabal hoo ninye olee obo.”

35Neng'amu Daudi too nkaik eina kitok ina nayaka ninye ninye; nejoki ninye, “Ilepa shomo te seriani enkaji ino; ing'ura, atoning'o nanu oltoilo lino, naishorua nanu ina omonunoto ino.”

36Nelotu Abigail enetii Nabal; naa, ng'ura eeta apa ninye osirua ti atua enkaji enye, anaa osirua lo laiguanani. Neng'ida apa oltau le Nabal ti atua ninye, amu etemere apa oleng; neaku eitu eliki ninye toki tukul o metaba anaa nekenyu awang'u.

37Ore te nkakenya eishunye emerai te Nabal, neliki ninye enkitok enye kuna baa, neye oltau lenye ti atua ninye, netiu ninye anaa osoit.

38Ore too nkolong'i naabaya tomon te siadi neosh Olaitoriani Nabal; neye ninye.

39Ore pee ening Daudi nchere etua Nabal, nejo ninye, “Metamayiani Olaitoriani laa ninye oitalakua ina moroto apa natang'amua nanu te nkaina e Nabal, neibooyie ninye osinka lenye aitung'uaa entorroni; etushukoko Olaitoriani ina kiaas torrono enchumata endukuya enye makewan.” Neirriwaa Daudi iltung'ana pee esir Abigail aitaa ninye enkitok enye.

40Ore ake pee epuonu isinkan le Daudi enetii Abigail te Karmel, nejoki ninche ninye, “Eirriua Daudi iyiook enitii pee kintaa iyie te ninye anaa enkitok enye.”

41Nedumunye ninye neirrugo te nkomom enye o metabaiki enkop, nejo, “Ng'ura, ore esinka ino naa enkaisaayiani naituku nkejek oo sinkan lo lkitok lai.”

42Neisarrisar Abigail, nedumunye neked osikiria, neisiaai ninye nkaisiaayiak enyena imiet; nesujaa ninye lelo kiliku le Daudi, neaku enkitok enye.

43Neitoki sii Daudi aya Ahinoam e Yesreel; neaku ninche pokira are nkituaak enyena.

44Neishoo apa Saul Mikal, entito enye, ina kitok e Daudi, Palti olayioni le Laish, laa olayioni le Galim apa ninye.

← Chapter 24 Jump to: Chapter 26 →