1 Peter 1

Maasai 2018 (BIBLIA SINYATI TE NKUTUK OO LMAASAI NATISIRAKI ENG'EJUK NAATA MBUKUI E DITROKANONI)

Jump to: Chapter 2 →

1Petero, olkipaaret le Yesu Kristo - enetii ilgelunot ooidapashakinote Ponto o Galatia o Kapodokia o Asia o Bitinia

2ootegeluaki apa neitaanya Enkai Papa te Nkiyang'et metoning'o Yesu Kristo te nkisuaakinoto o sarge lenye. Metoponari tiatua intae empiris o eseriani.

3Meisisi Enkai naa Papa lo Laitoriani lang Yesu Kristo! Ore te nkaraki olng'ur lenye sapuk eishoo iyiook metoini aaigil tiatua osiligi oishu te mpiunoto e Yesu Kristo aing'uaa lootuata,

4pee kitum enjung'ore nemerruoyo, nemeiduruk, nememusanu naiteng'elaki te keper te nkaraki intae.

5Kerripi ntae te ngolon e Nkai te nkaraki enkirukoto inyi, pee itumutumu enjeunoto nairragita ake pee eibalunyieki te nkolong e nkiting'oto.

6Entishipata te nkaraki ina, hoo ninye te naa aimeeta inchere pee mitumutumu intemat oo mpukunot kumok te nkiti kata,

7ore pee etiu inji, enkirukoto inyi eji pee etemi nenyorrarri aajo keeta tipat alang saabu narruoyo netetemaki te nkima nitumutumu enkisisa, o enkitoo o enkanyit te mbolunoto e Yesu Kristo.

8Oleitu idolidolo, ninyorrinyorro ninye, nirukuruku hoo nimidolitata ninye taata, nishipapa, enchipai nemeimakinoyu ebore enkisisa.

9Ning'amumu te nkiting'oto e nkirukoto inyi, enjeunoto oo ltauja linyi.

10Ena jeunoto apa eing'orutua, neikeni iloibonok le Nkai ooibonutuo empiris nalotu aaku eninyi.

11Eikilikuanutua aajo kalo tung'ani naa kaa kata etuutua Enkiyang'et e Kristo natii atua ninche, ina kata apa namurutoo aalimu inkisilisilot e Kristo o enkitoo nasuju.

12Etabolokoki ninche metayiolo, inchere imme ate eisiaayiaki te nena kake intae, nena baa naainosakaki intae taata lelo oolikioo ilomon supati te ngolon e Nkiyang'et Sinyati nairriwuaki eing'uaa keper naa imbaa naang'uar apa ilmalaika pee edol.

13Ore naa entorrip indamunot inyi, eririki mbaa nipikipiki osiligi linyi pooki shumata empiris nayakini intae te mbolunoto e Yesu Kristo.

14Anaa inkera naaning'isho, eminturubare ate inapa ng'uarrat niaatata enapa kata imodada.

15Kake ore anaa sinyati ilo oipoto intae, entaa sii intae sinyat to lkuaak linyi pooki.

16Amu etisiraki aajo, “Entaa intae sinyat, amu kara Nanu Sinyati.”

17Naa te naa aimpotipoto ninye aajo Papa, ilo oiguanare pooki tung'ani metii enyorrakinoto eng'ura ate entotoni te nkuretisho tena rishata nitii ene anaa nkisikat.

18Iyiololo aajo, etalakuaki intae too rrekiei linyi lemeeta tipat litujung'utuo too loo papaai linyi, mme too ntokitin naaruoyo anaa enkosholai o saabu

19kake to sarge ogol enkinyiang'a le Kristo, otiu anaa olkuoo lemeeta entiyoto anaa entibili.

20Oloitaanyitai apa eton eitu eitamanyuni enkop, kake keibalunyieki te nkiting'oto oo nkatitin te nkaraki intae,

21naa te ninye ing'idarere intae Enkai, ilo oitopiwuo Yesu aitung'uaa ilootuata, neisho ninye enkitoo paa ore enkirukoto o siligi linyi naa atua Enkai etii.

22Ore te nkaraki nindipa aaitukuo iltauja linyi te nkibung'ata oo sipat, niaatata enyorrata nemetii esunkuroisho too lalashera linyi o nkanashera inyi, entonyorrata intae maate aakurraki too ltauja.

23Etoiwuoki intae aaigil neme te mpeu narruoyo kake te nemerruoyo, eimu ororei le Nkai oishu nebik intarasi.

24Amu “Etiu iseseni anaa nkujit, netiu enkitoo enye pooki anaa ene ntapukai oo nkujit. Ketoyu inkujit, nedoiyio entapukai;

25kake kebik ororei lo Laitoriani intarasi.” Ore ilo rorei naa lelo omon supati ooinosakaki intae.

Jump to: Chapter 2 →