bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Mende
/
mende
/
John 4
John 4
mende
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 5 →
1
Farisi ondo li misiri Jisas man fak or tolofaleshirik ma musha orin tiyandari mak nari lir. Uhu ma musha mendek li naha Jonin tiyandari man tikriri lir.
2
Hako Jisas mbeek man fak tolofaleri ambu ri, wahau. Ol orin tiyandari ma ondo nom man fak tolofaleri lira.
3
Urik Jisas or misiri, Farisi ondo lerawu os or larin angop li mistakori sir. Karem uri osik provins Judian or halaha indik yanga Galilik or ikmbaha ormu ira.
4
Or ihi Samariak fehe ondo misambi lihi nindik ormu ira.
5
Or ihi yanga Sikarik ormu talara. Sikar oso Samariak fehenda ma ondohi yanga las osira. Misambi os Jekop jikisi orhi Josepin or halahandari mishi oso nga pasir nandari sira.
6
Ukwa las Jekop maskop or korondari oso yanga orok nandari sira. Am takondik si narik Jisas or taha nor krehe ukmashi orok ormu limasira. Ol orin tiyandari ma ondo angop akwan li frungawukmbaha li ishirik Jisas nendekop orok liri ria. Urik Samariak fehenda nokove las ukun si tarmukurik orok simu tara. Urik Jisas ormu silira, “Uksembe kas anin hanak a aka.”
9
Urik simu mbara, “Mir Judama mir, an Samariak fehe nir. Mberem ushiwak uksemben a hanak mi akmbaha mi mbandu? Jir Judama mbeek nir Samariak fehenda nga nakrem ni anda ambu nir.”
10
Urik ormu mbara, “Nyir mbeek yariwa ambu nyir, lawe or uksembenjik nyirin silindu. Uhu nyir mbeek mbele jivi las os Avui Wasilaka nyirin hakwak or mbawan hishiyariwa ambu nyir. Os nyi yariwakop am nyi mba, “Wa, uksembe ermba ermbak linda oso kas anin hanak a aka.” Karem mbawa nyir.”
11
Urik simu mbara, “Wasilaka, uksembe oson mbeyok mi laku? Mir baket nga nawa ambu mir. Ukwa toso kasalkop nanda sir.
12
Misumu nihi Jekop maskop or korondari ukwa tosira. Or nga jikisi orhi nga bulmakau, sipsip orhi nga li uksem andari mishi tosira. Hako mir am orin tikrindahik nanda om? Karem mimu hishindu?”
13
Karem si mbarik ormu mbara, “Ma ol uksembe toson awa ondo jekapnashi lihi hatlayinak indik uksem akwak mbakwa ola.
14
Hako ma ol uksembe os an hanak akwak a mbawa ma ondo mbeek indik uksem akunak mbakwa ambu lir, wahau. Uksembe os a hawa oso avak sungu lihik ukwa hom si nanak ermba ermbak linda oso avak lihik nakwa sir.”
15
Urik simu mbara, “Wasilaka, uksembe oson anin hanak a aka. Uhundanak indik torok ukun a tarmukmbaha a rakwa ambu nir.”
16
Urik Jisas mu mbara, “I hula nyihin sawe laha torok shi raka.”
17
Urik simu mbara, “An mbeek hula ngashi ambu nir.”
18
Urik ormu mbara, “Ome sira, nyir hula nyihi tostava hom nandari lir. Hako ma or ter nyi liwa oto mbeek hula nyihi ambu ri.”
19
Urik simu mbara, “Wasilaka, ter amu heyenduwa. Mir profet lar mira.
20
Hako anin sawenak a misi, mberem ushiwak jir Judama karem ji mbandu, os ma lal Avui Wasilakan li lotu uku nahi, wa Jerusalemkop li tirsaha li lotu uka, karem ji mbandu? Hako nir Samariak fehenda neloko walanga nihik sishi raha ter nga os Avui Wasilakan ni lotu ukwa wolo telemba Gerisim orokop ni tirsaha ni lotu unda nir. Hako mir mberem mi hishindu?”
21
Urik ormu mbara, “Omendingak nyirin amu sawenduwa, kumak os Avui Wasilakan ji lotu ukmbaha ji hishi nahi, yanga yanga os ji liwa mishi orokop orin lotu ukwa jira, telemba orok nembes, Jerusalemik nembes.
22
Avui Wasilaka or Masikome ria. Karem uwosik ma ol orin lotu ukmbaha hishiwa ma ondo Masikome orhi nga mbele mbele omekop nanda nga orin omendingak li lotu uka, yanga yanga os li liwa mishi orok. Ma ol or mbawa nombo orok orin lotu uwa ma ondon rupshinda ri. Hako jir Samariak fehenda mbeek ma or ji lotu undan heyenda ambu jir, wahau. Men lotu unda jir. Hako nir Judama God or ni lotu undan angop ni heyenda ri. Angop maskop Avui Wasilaka mashi las nir Judaman karem or mbari osa, “Kumak Judahi krahak fehe ma lar avak a kamashinak hulaima nokopman jivinakwa ria.” Erem or mbahanda mashi ter osmu omendingak nanduwa.”
25
Urik simu mbara, “He, Mesaia, Krais karem li ushanda ma or hulaima nokopman jivinakwa ma oto or takuri mashi oson angop a misiri sir. Os or tawa wolo mbele mbele amber kormbak or sawenak ni mistakokwa lir.”
26
Urik Jisas mu mbara, “Ma orto anira. An mu ter nyir nga shimu maimbanduwa.”
27
Jisas karem or mbarik ol orin tiyandari ma ondo indik limu rara. Li raha li heyeri Jisas nokove oso nga frimu maimbara. Urik wavu musha mushak limu hishira. Hako lir mbeek sirin siliri ambu lir, “Mbele nyi lakmbaha nyi taw?” Uhu Jisasin er nga siliri ambu lir, “Mberem ushiwak nokove toso nga mi maimbandu?” Karem siliri ambu lir.
28
Urik nokove oso baket sihin orok si hala tirnaha indik yanga sihik si ihi ma ondon simu sawera,
29
“Jir kolomalok ji raha ma lar ji heyeka! Ma oto mbele mbele maskop a undarin or heyehe kormbak sawewa ri. Ma oto Krais Avui Wasilaka kamahanda marmbe?”
30
Karem si sawerik ma amber Jisasin li heyekmbaha limu tara.
31
Nokove oso si ishirik Jisasin tiyandari ma ondo limu mbara, “Tisa, mir kolok ta akwa lal aka!”
32
Urik ormu mbara, “An akwa ngashi nir. Hako jir mbeek akwa anhin heyewa ambu jir.”
33
Karem or mbarik lihi ambek limu mbara, “Mbel akwan or mbandu? Ma lal am akwan orin hawa ol?”
34
Urik ormu mbara, “Avui anhi or mbashirik a raha lerawu orhin amu landuwa. Mbele mbele or mbawa hom a landa nir. Lerawu os a lawa oso akwa anhi hom nanda sir.
35
Jir karem mbanda jir, niyaka tovro kavro li iwak akwan sanda wolok nanda sir. Hako jirin amu sawenduwa, nowe ondon armek ji heyeka! Akwa amber olmu ukrunduwa.
36
Ma or akwan sanda ma oto akwan or saha safal akak or ewehe avak os or lahanda wasa orhin lakwa ri. Akwa os or sanda oso hulaima nokopma wavu lihin tormblehe ermba ermbak linda oson li lakundan osmu heimanduwa. Uwosik ma or kumbanda nga ma or sanda nga fri rupshi mendekwa vria.
37
Lar or kumbawak, lar ormu sanduwa. Karem nanda sir.
38
Jir avak a mbashinak ikwa jir, ma anandi kumbanda mishi orok. Jir men sakwa jir. Akwa angop maskop li kumbari sir.”
39
Samariak fehe nokove oso yanga sihik fehendan simu sawera, mbele mbele ol mas si undarin Jisas kormbak or sawerin. Ushirik mashi sihin li misihi limu mbara. “Ome sira, ma oto Avui Wasilaka kamahanda ma ria.”
40
Uhu Jisasik li raha or lir nga orok li likmbaha limu mbara. Urik Jisas niri frijip kuyanga orok ormu lira.
41
Urik ma mushak mashi orhin li misihi limu mbara, “Avui Wasilaka kamahanda ma toria.”
42
Uhu nokove oson limu sawera, “Nir mbeek mashi nyihi nom ni misiwa ambu nir, wahau. Nihinjik mashi os or mbawan am ni heyehe nimu hishinduwa, ma roto nom ma misambik fehendan jivinakwa ma ria.”
43
Jisas niri frijip Samariak or wahandarik or usaha kotontlo orhi Galilik ormu ira.
44
Maskop orhinjik karem or mbari sir, “Profet lar mbeek kotontlo orhik hi nga nanda ambu ri, wahau.”
45
Hako yanga orhi Galilik indik or irik orok fehe ma ondo orin li rupshihi limu flehava kwara. Mberem ushirik? Hiyawu Pasovan li undari wolo Jerusalemik mbele lal ma undahi ambu ondon or urik angop li heyeri osik orin limu rupshira.
46
Urik Jisas yanga Kanak ormu ira. Yanga oso mas uksemben or urik wain ukuk nari mishi sira. Urik malakamanjik lerawun landari ma lar Jisas yanga Kana orok or tarin or misihi orhik ormu tara. Ma oto jikisi orhi yanga Kaperneamik wasilaka mendek kavamisihi hakurik nari ri. Uri osik Jisashik or taha ormu tlara, “Wasilaka, jikisi anhi am hakwak naw te! Avak yanga Kaperneamik mi taha mi mbanak jivik or nawa.”
48
Karem or mbarik ormu mbara, “Os mbele las ma undahi ambun a una ambu nahi, mbeek anin hishiowekwa ambu jir.”
49
Karem or mbarik ma oto indik ormu tlara, “Wasilaka, kolok tawa. Nambek mi na nahi, jikisi anhi avak hakwa ri!”
50
Karem or mbarik ormu mbara, “Mir ika. Jikisi mihi mbeek hakwa ambu ri.” Karem or mbarik avoko ma oto Jisas mbari mashi oson or misihi ormu hishira, “Mashi os Jisas mbari oso avak omek nakwa sir.” Karem or mbaha indik yanga orhi Kaperneamik ormu ira.
51
Or ihi nombok or sirik ma ol ornjik lerawun landari ma lal li taha limu sawera, “Awasayi, jikisi mihi hari ambu, angop jivik nari ri.”
52
Karem li mbarik ormu mbara, “Mbele wolo mendek jivik or nar?” Urik limu mbara, “Hinyer ta am or andorik jivik ormu nara.”
53
Karem li mbarik avoko ma oto ormu hishira, Jisas hinyer oro wolo mendek ormu mbara, “Jikisi mihi hakwa ambu ri.” Karem or hishihi or nga jikisnokopji orhi nga ol ornjik lerawun landa ma ondo nga Jisasin wavu lihik li ewehe orin limu tiyara.
54
Jisas os provins Judian or halaha Galilik or tari wolo mbele las ma undahi ambu oson yanga Galilik nindisik or uri kasira.
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 5 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21