1 Peter 2

kimiiru

← Chapter 1 Jump to: Chapter 3 →

1Tontû bûû, tiganeni na ûthûûku bunthe na kwaîîrania kunthe na kûrega gwîtîkania na rûriitho o na kwaragia nteto cia kûthûûkia antû bangî.

2Nyontagîreni îria rîrîega rîa kîroho ta ûrîa tûkenke tûnyoontagîra îria nîkenda bûgakûra na bwonoke.

3Tontû buî nî bûthirîtie kûmenya na gûcema kîaao kîa Mwathani.

4Njûni kîrî Mwathani, ûrîa ûrî iiga rîrîa rîrî mwoyo, rîrîa rîaregerwe nî aaki îndî Mûrungu nîrîo athuurîte rîrî rîa bata mono.

5Îjeni bûkari ta maiga jarîa jarî mwoyo nîkenda bûgatumîrwa gwaka kîûrû kîa kîroho arîa buî bûkaritaga ngûgî bûrî athînjîri-Mûrungu babatheru bûtue kûritaga igongwana bibitheru bia kûgwîria Mûrungu ndeene ya Jesû Kristû.

6Tontû Maandîko jariuga atîrî, “Nî ngwîka iiga Zaiûni, iiga rîa koona, rîrîa rîthuuri na rîa goro, muntû ûrîa ûkamwîtîkia, atîkorocokerwa nî nthao.”

7We nî gîntû kîa goro kîrî buî barîa bwîtîkîtie îndî kîrî barîa batîtîkîtie we nîwe, “Iiga rîongwa rîrîa aaki baaregere, nîrîo rîeete rîa bata rîa kona.”

8Kaîrî Maandîko jariuga, “Rîrî nîrîo iiga rîrîa rîgatûma antû bagiitara na nîrîo rîgatûma antû batua kûgûjaga.” Bagatua kûgûjaga nîûntû batîathîkagîra rûteto kûringana na ûrîa beeri nîu bakathithagia.

9Îndî buî bûrî rûrîîjo rûrîa rûthuuri na bûrî athînjîri-Mûrungu ba kuuma mûciî jwa ûnene na ningî bûrî mûgongo jûmûtheru na antû ba Mûrungu bongwa. Buî bûthuurîtwe nîkenda bûkeeranaga mantû jamanene ja Mûrungu ûrîa waabûritîre muunduune aarabûreta weerûûne bwaawe bwa kûrigaria.

10“Kûrî kagiita buî bûtaarî antû ba Mûrungu, îndî nandî bûrî antû ba Mûrungu; kûrî rîo bûtaarî bûgûkinyîrwa nî kîaao kîa Mûrungu, îndî nandî nî bûkinyîri nî kîaao kîaawe.”

11Ataana na aarî ba baaba, tontû buî bûrî mpinga na ageni nthîgûrûûne, rekaneni na mairîrîîria ja mwîrî jarîa jakaraga jakîrûjaga naabuî.

12Karageni na mîîtîre îmîega gatîgatîîne ka antû barîa batîtîkîtie. Nîkenda baaria mantû jeenu bakiugaga nî bûkûthithia mantû jamathûûku, bakoona mathithio jeenu jameega na bakumie Mûrungu Ntukû ya kwîja kwaawe yakinya.

13Athîkagîreeni athani bonthe nîûntû bwa Mwathani. Athîkagîreeni mûtongeeria ûrîa mûnene buru wa nthîgûrû,

14ningî bwathîkagîre arûngamîîri barîa eekîte ba gûkanûkagia barîa bathithagia ûthûûku na gûkathîrîria barîa bathithîtie bwega.

15Tontû ûrîa Mûrungu eendaga nî atî buî bûthithagie ûrîa kwagîrîte nîkenda bûtûme antû barîa baragia waa baage bwa kuuga.

16Tûûrageni ta antû barî na ûciathi, îndî bûgátumîra ûciathi bûû bûrî kaigwatîrie ga kûthithia ûthûûku. Buî tûûrageni bûrî nthûûmba cia Mûrungu.

17Tîîageni antû bonthe. Endageni antû bangî barîa betîkîtie. Kîrageni Mûrungu. Tîîageni mûtongeeria ûrîa mûnene wa thirikarî.

18Buî nthûûmba, inyiiagieni kîrî athani beenu na bûbatîîage. Beethîrwa nî barîa beega na bababoreru kana beethîrwa nî babaaî.

19Tontû Mûrungu nî agwîragua nî muntû ûrîa ûûmagîîria rwakaî rûrîa aigagua akîthangîka gûtî na gîtûmi nîûntû bwaawe.

20Nî umithio bûrîkû bwonaga tontû bwa kûûmîîria mpûûrwa irîa bûûragwa nîûntû bwa kûthithia mantû jamathûûku? Îndî rîrîa bwathithia ûntû bûbwega na bwomîîria gûkanûkua nîûntû bwaabu, Mûrungu nî agwîragua nî buî.

21Ûntû bûu nîbu bwatûmîre Mûrungu abwîta. Tontû kinya Kristû nî aathangîkîrue nîûntû bweenu, araa ngerekano kîrî buî nîkenda buî bûkathingata makinya jaawe.

22Gûtî meeyia we aathithia na ataaria ûrongo.

23Rîrîa aarumîrwe, we ataarumanîre, na rîrîa aathangîkîrue, we ataaciîtîrie akairîîria. We nî kwîrîgîîra eerîgîîrîre Mûrungu ûrîa ûtujanagîra îgamba na îota.

24We wengwa nîwe wakamatîre meeyia jeetû mwîrîîne jwaawe au mûtharabeene nîkenda tuî tûgakua ûntûûne bwa meeyia na tûtûûrage tûrî babaagîru. Buî nî bûthirîtie kworua kuumania na ngûma ciaawe.

25Tontû buî ka bwatarataraga o ta ng'ondu, îndî nandî nî bûthirîtie gûcokanîîrua ûrîîthine bwa ûmwe ûrîa ûrî Mûrîîthi na Mûkaria wa mîoyo yeenu.

← Chapter 1 Jump to: Chapter 3 →