Ruth 1

kimiiru

Jump to: Chapter 2 →

1Îgiita rîrîa agambi baathanaga, nî kwagîîre mpara nthî ya Israeli. Tontû bûu muntû ûmwe wa kuuma Bethlehemu ya Juda areeta nthîgûrû ya Moabu gûtûûra ku arî na mwekûrû waawe na ataana baawe baîrî.

2Muntû ûu eetagwa Elimeleki na mwekûrû waawe eetagwa Naomi. Ataana baawe beetagwa Mahaloni na Kilioni. Aarî wa mwîrîga jwa Efiratha kuuma Bethlehemu ya Juda. Nî beetîre nthîgûrû ya Moabu na baratûûra ku.

3Elimeleki, mûkûrû wa Naomi, nî aakuîre na Naomi aratigwa na ataana baawe bobaîrî.

4Nabo baragûra aka Amoabu, ûmwe weetagwa Oripa na ûngî Ruthu, baratûûra ku îgiita ta rîa mîaka îkûmi.

5Ningî Mahaloni na Kilioni barakua. Tontû bûu Naomi aratigwa atî na mûkûrû kana ataana.

6Rîu Naomi araigua arî kûu Moabu atî MWATHANI nî atharimîte antû baawe na biakûrîa. Tontû bûu aragwata rûgendo amwe na aka ba ataana baawe nîkenda acoka kwaao kuuma bûûrîîne ya Moabu.

7Nawe arauma gûntû kûu aatûûraga, arî amwe na aka ba ataana, baragwata njîra bacokeete nthîgûrû ya Juda.

8Naomi areera aka bau ba ataana atîrî, “Cokeeni, o muntû eete kwa ng'ina. MWATHANI arobûthithîria bwega o ta ûrîa bûthithîrîtie barîa bathirîtie gûkua na kinya ûûni.

9MWATHANI arobûtharima na atûme o ûmwe weenu oone ntomûrûme wa kûmûgûra na agîe na nja yaawe.” Aracoka arabacûnca, nabo bararîra na tûjû tûtûnene.

10Baramwîra atîrî, “Arî tuî! Ga tûgaacokania naagwe kîrî antû beenu.”

11Îndî Naomi arabeera atîrî, “Cokeeni, aarî baakwa. Nîmbi bûkanthingatîra? Ntîûmba kwona aana bangî ba kwîja kwaa akûrû beenu.

12Cokeeni itû aarî baakwa bûciîtîre, nîûntû ndî ntindiri na ntîûmba kûgûrwa. Îndî kinya gûkoombîka nkagûrwa naarua na ngaciara tûîjî rî,

13bwoomba gûtweteera mwanka rîrîa tûgaakûra? Kana rî, bwoomba kwirigîîria kûgûrwa nîûntû bwaao? Arî, aana baakwa, nî nkwigua ûrûrû mono nîûntû bweenu nî ûrîa MWATHANI ambutatîrîte.”

14Nabo barauga mbu na bararîra kaîrî. Oripa aracûnca ng'ina wa nthaka aracoka kwaao, îndî Ruthu ararega gûtiga Naomi.

15Naomi aramwîra, “Tega, mûka wa mûtaana wa nyakwe aagûcoka kwa antû baao na kwa mîrungu yaao. Coka kinya gwe ûmûthingate.”

16Îndî Ruthu aramûcokeria atîrî, “Tiga kûmberenca ncoka ntiga gûkûthingata; o kûrîa gwe ûgeeta nî ku ngeeta, o arîa ûgaatûûra nîo naani ngaatûûra; antû baaku bakaa antû baakwa, Mûrungu waaku ae Mûrungu waakwa.

17Kûrîa ûgaakuîra nî ku ngaakuîra, na kûu nîo ku nkaathikwa. MWATHANI arombona këethîra gîntû kîngî gîgaantigithania naagwe tiga gîkuû.”

18Rîrîa Naomi oonere atî Ruthu nî agiitîte gwîtania nawe araikirîra.

19Nabo bareetania bobaîrî mwanka barakinya Bethlehemu. Rîrîa baakûrûkaga ku, antû bonthe bararigara nîûntû bwaao. Nabo eekûrû baroorania atîrî, “A ûûjû nî Naomi?”

20Nawe arabacokeria arabeera atîrî, “Tigeeni kûmbîta Naomi, mbîteeni ‘Mara,’ tontû Mweneinya nî anthithîrîtie mantû ja kûmbigithia ûrûrû bûbwingî.

21Ndeetîre ndî na bionthe, îndî MWATHANI aagûncokia ntî na gaantû; nîmbi bûkûmbîtîra Naomi o rîrîa MWATHANI Mweneinya ambîrûkîrîte ndîa thîîna?”

22Ûu nîu Naomi aacokîre kwaao barî na Ruthu, Mûmoabu ûrîa waarî mûka wa mûtaana waawe. Baumîre nthî ya Moabu barakinya Bethlehemu kîambîrîîria kîa maketha ja mûnyaki.

Jump to: Chapter 2 →