1 Timothy 5

morisyen

← Chapter 4 Jump to: Chapter 6 →

1Pa fer brit ar enn vie dimoun, me koz ar li kouma to koz ar to papa.

2Tret bann ti zenes kouma to frer, bann vie madam kouma to mama, bann zennfi kouma to ser, avek respe.

3Pran swin bann vev, sirtou seki retrouv zot dan labandon.

4Si enn vev ena zanfan ou tizanfan, zot bizin montre li kouma met anpratik zot lafwa anver zot fami e rann zot paran ou gran paran seki zot dwa. Vremem, sa pou fer plezir Bondie.

5Bann vre vev, bann seki tousel, bizin met zot lesperans zis dan Bondie tousel ek priye, lanwit-lizour, priye e demann Bondie ed zot.

6Me seki nek pans zis lamizman li deza enn kadav ki pe viv.

7Tousala, to bizin dir afin ki zot san repros.

8Si kikenn pa pran swin so fami, li finn fini renie so lafwa, e sa li pir ki enn dimoun ki pa krwar.

9Pou ki enn vev inskrir li lor lalis ofisyel, fodre ki li ena plis ki swasant-an e ki li finn marye enn sel fwa.

10To bizin gete si li ena bon repitasion, si li finn bien elve so bann zanfan, si li finn konn akey dimoun, si li finn met limem oservis bann frer ek ser ki vini, si li finn aport sekour bann malere, si li finn fer dibien ek bann bonaksion.

11Parkont, pa met bann zenn vev lor lalis.

12Kan zot pa kapav tini ek ki zot le remarye, zot met Zezi Kris dekote e zot kas zot premie lalians.

13Anplis zot pena nanye afer, zot nek marse, al dan tou lakaz, fer palab, koz ninport.

14Preferab zot remarye, gagn zanfan e okip zot lakaz pouki bann adverser pa koz nou koze.

15Deza lamem, ena ki finn pran move sime e pe swiv Satan.

16Si enn madam krwayan ena vev dan so fami, li bizin pran li ansarz e pa fie lor legliz parski legliz bizin okip bann vev ki tousel.

17Bann ansien ki diriz bien legliz merit enn doub saler, sirtou bann ki bizin travay dir pou prese ek ansegne.

18Lekritir dir, “Pa met enn mizelier avek enn bef ki pe kraz dible,” e “Enn zouvrie merit so saler.”

19Napa les fer akizasion kont enn ansien si pena de ou trwa temwin.

20Si kikenn fer pese, repran li anpiblik koumsa lezot pou fer atansion.

21Mo sipliy twa, anprezans Bondie e Zezi Kris, devan tou bann anz beni, obzerv sa bann regleman la dan enn fason strik, san fer faver personn.

22Pa inpoz lame vit-vit lor personn, sinon to pou konplis pese lezot. Pran to distans, gard twa prop.

23Aret bwar zis dilo, pran inpe divin pou to lestoma, sa pou evit twa gagn febles.

24Ena dimoun zot pese deor letan get zot; ena lekontrer, aprekou ki dekouver zot pese.

25Mem zafer pou bann bonaksion, pou trouv zot klerman; mem seki pa tro vizib difisil pou kasiet.

← Chapter 4 Jump to: Chapter 6 →