3 John 1

morisyen

Jump to:

1Mwa Ansien, mo pe ekrir Gais ki mo vremem kontan.

2Kamarad, mo souete ki tou pas bien pou twa e ki lasante to lekor li osi bon ki lasante to lespri.

3Mo ti bien kontan kan enn bann frer ti vini, e ti rakont mwa to fidelite e kouma to pe mars dan laverite.

4Pena nanye ki fer mwa pli kontan ki tann dir ki mo bann zanfan pe mars dan laverite.

5Kamarad, to azir dapre to lafwa vizavi to bann frer ek ser, mem si zot bann etranze.

6Zot finn donn temwagnaz lor to lamour dan legliz. To pou azir bien si to ed zot dan zot vwayaz dan enn fason ki pou fer plezir Bondie;

7parski sa vwayaz la, zot finn fer sa lor so Nom e zot pa finn gagn okenn led avek bann non-krwayan.

8Alors, bann dimoun koumsa, nou bizin soutenir zot pouki nou kapav vinn bann kolaborater laverite.

9Mo finn ekrir enn ti mo legliz; me Diotref, ki kontan touzour met li anavan, pa finn aksepte nou lotorite.

10Ler mo pou vini, mo pou denons so move manier. Li pe malparl nou e fer enn bann palab lor nou. Limem li refiz akeyir bann frer e bann ser, li anpes bann lezot ki anvi akeyir zot e met zot deor dan legliz.

11Kamarad, pa bizin imit saki mal me imit saki bien. Dimoun ki pratik lebien li avek Bondie; dimoun ki pratik lemal li pa konn Bondie.

12Tou dimoun ti rann bon temwagnaz lor Dimitris. Laverite osi ti rann temwagnaz dan so faver. Nou osi, nou rann temwagnaz dan so faver, e to kone ki sa temwagnaz la li vre.

13Mo ena boukou kiksoz ankor pou ekrir twa, me mo prefer pa fer li avek plim ek lank.

14Mo espere trouv twa biento e nou va koz ansam fasafas.

15Mo souet twa lape. To bann kamarad avoy twa zot soue. Fer salam bann kamarad laba enn par enn.

Jump to: