Galatians 6

morisyen

← Chapter 5 Jump to:

1Mo bann frer, mo bann ser, si kikenn arive tom dan pese, zot ki ena Lespri Bondie, avek douser zot bizin ramenn li dan bon sime. Pran bien kont zotmem pou zot pa tom dan tantasion.

2Sakenn bizin ed so kamarad, lerla zot pou met anpratik lalwa Lekris,

3parski si kikenn panse ki li enn gran dimoun alor ki li nanye ditou, li pe anbet limem.

4Sakenn bizin examinn so prop travay, e si li bizin fer vantar, fode pa li fer li ankonparezon avek so prosin me par rapor avek limem.

5Sakenn pou bizin sarye so prop fardo.

6Dimoun ki resevwar lansegnman, bizin vinn enn partner avek seki finn donn li lansegnman.

7Fodre pa fer erer, nou pa kapav mok Bondie. Enn dimoun li rekolte seki li finn seme.

8Si li sem dapre so natir imin, li pou rekolte koripsion; si li sem dapre Lespri, li pou rekolte lavi eternel.

9Anou pa dekouraze fer dibien, parski ler peryod larekolt arive nou pou rekolte si nou pa bes lebra.

10Alor, tanki nou ena letan, anou travay pou bien tou dimoun spesialman pou bann ki pros avek nou dan lafwa.

11Zot trouve, mo pe ekrir zot sa bann gro-gro let la avek mo prop lame.

12Sa bann dimoun ki anvi zot fer sirkonsizion la, zot oule zis fer remark zot dan bann zafer laser. Zot fer sa pouki zot pa persekite akoz lakrwa Lekris.

13Parski mem bann ki resevwar sirkonsizion pa obeir lalwa; sa bann dimoun la anvi ki zot sirkonsi pou zot fer vantar ki zot finn kapav inpoz sa sign la lor zot.

14Abe mwa, mo pou fer vantar akoz lakrwa nou Segner Zezi Kris; par sa lakrwa la lemonn finn fini krisifie pou mwa e mo finn fini krisifie pou lemonn.

15Ki enn dimoun sirkonsi ou pa, sa pena okenn linportans; seki inportan se enn nouvo kreasion.

16Tou dimoun ki mars dapre sa prinsip la, lape ek mizerikord pou ar zot ek Izrael pep Bondie osi.

17Finalman, ki personn pa fatig mwa parski mo sarye mark Zezi lor mo lekor.

18Mo bann frer, mo bann ser, ki lagras nou Segner Zezi Kris li ar zot lespri. Amen.

← Chapter 5 Jump to:

Recommended Reading

Commentary Galatians Commentaries → Devotional Galatians Devotional Guide → Get This Bible morisyen Study Bible →