Ephesians 1

Moba-Lok New Testament © Bible Society of Togo, 2007

Jump to: Chapter 2 →

1Min Pɔul wun nbɑ k Yennu gɑnn’n ɑ n tien Yiesu *Klistu *tuomi nɑ, fuont bin nbɑ tie Yennu yɑb k be Efes duo ni, k tien Yiesu Klistu yɑdɑ nɑ.

2T Bɑɑ Yennu nɑn Yonmdɑɑnɔ Yiesu Klistu ii mɔk ninkpɑbɑɔnŋ nɑn’i, k biɑ tul’i mɑnu.

3Ŋɑɑnt k tin dont wun nbɑ tie t Yonmdɑɑnɔ Yiesu Klistu Bɑɑ nɑn u Yennu. Ŋuɑ e tul’t yetŋɑnm kul nbɑ nyii sɑnpɑɑpo t sei ni tɑɑ be Klistu ni nɑ pɑɑk.

4Yennu nbɑ ponŋ dɑɑ din k nɑn tingbounŋ yuo nbɑ nɑ wɑɑ k u din gɑnn’t ɑ tii tie u yɑb Yiesu Klistu pɑɑk, kii tie niŋɑnm k dɑɑ mɔk biit u buol ni. Yennu nbɑ din luon’t nɑ pɑɑk,

5u din lol ɑ Yiesu Klistu ni e k u sɑɑ tien’t u wɑɑs. Lin nbɑ k u din luon k biɑ din senn e nɑ.

6Ŋɑɑnt k tin pɑk Yennu k mɑɑn u ninkpɑbɑɔnŋ nbɑ yɑb bonciɑnn, k u mɔk nɑn’t u Bilonkɑk ni nɑ pɑɑk.

7Yennu nyinn’t biit dɑɑbs ni u Bilonkɑk mɑnŋ sɔn pɑɑk e, k nyik cɑb t biit u ninkpɑbɑɔnŋ nbɑ yɑb nɑ pɑɑk.

8Ŋuɑ Yennu e tul’t yɑnŋɑnm nɑn bɑnnu bonciɑnn ɑ t fit gɑɑl ninbɑtinu mɑnŋ.

9K u din wɑnn’t wuol ni lolɑ nbɑ k u din senn nɑn wɑɑ luon bɑnnu nbɑ Klistu ni nɑ.

10Yuo mɑnŋ i tɑnŋ i jɑnŋ cib, u sɑɑ tun gbenn u lolɑ mɑnŋ, ɑ u nɑɑmi kul nbɑ be sɑnpɑɑpo nɑn tinŋ ni ii mɔk yudɑɑnɔ yenɔ kuɑ k ŋuɑ e tie Klistu.

11Yennu tun siɑl kul u dudukt nɑn u lolɑ ni e. Nnɑ e mun k u din lukt tinm, wɑɑ ponŋ din senn lin nbɑ nɑ pɑɑk nɑ.

12U din tun lin nbɑ nɑ ɑ tinm nbɑ din sint mɔk dindɑnn Klistu ni nɑ, n pɑk k dont Yennu e.

13I mun din kpɑnt tien Klistuyɑb yuo nbɑ k i din gbɑt lɑbɑmɑnn nbɑ tie bɑlmɔni k biɑ tien’i fielu nɑ. Yɑɑ din tien Klistu yɑdɑ nɑ, k Yennu din tul’i dɔuk nbɑ tie Foŋɑnm nɑn wɑɑ din senn mɔsonn biɑnŋ nbɑ nɑ.

14Foŋɑnm mɑnŋ e tie *siɑlɑ nɑn t sɑɑ lɑ yetŋɑnm nbɑ k Yennu sɑɑ tul u niib nɑn yuo nbɑ k u sɑɑ nyinn’b b dɑɑbs ni gbenn. Ŋɑɑnt mɑn k tin pɑk k dont Yennu.

15L pɑɑk, yuo nbɑ k n din gbɑt i yɑdɑ nɑn Yonmdɑɑnɔ Yiesu po nɑ, nɑn yɑɑ luon Yennu niib biɑnŋ nbɑ nɑ po mɔkmɔk nɑn dinnɑ,

16n tien Yennu niipuouk i pɑɑk k k nyik. N tiɑn i po e n miɑlu ni,

17k lek mei t Yonmdɑɑnɔ Yiesu Klistu Yennu, wun nbɑ tie Bɑɑ nbɑ ŋɑn nɑn dontl, ɑ wun tul’i Foŋɑnm nbɑ sɑɑ tul’i yɑn k fiit Yennu k tul’i, k yin bɑnn’ɔ fɑnu.

18N biɑ mei’ɔ mɑɑ wun yent i pɑlɑ ni ɑ yin bɑnn dindɑnn nbɑ pɑɑk k u yiin’i nɑ, k biɑ bɑnn nɑn bonɑ nbɑ k u tɑn sɑɑ tul u niib nɑ nbɑ yɑb k biɑ ŋɑn bonciɑnn biɑnŋ nbɑ,

19k yin bɑnn u yiikuo nbɑ k u tun nɑn’n k tul bin nbɑ tien yɑdɑ nɑ nɑn lɑɑ gbenŋ bonciɑnn bɑnnu nbɑ. Yiikuo mɑnŋ tie lin nbɑ k u din wɑnn

20yuo nbɑ k u din fiin Klistu kuun ni k kɑɑn’ɔ *Yendɔunŋ ni u niidiitu po nɑ e.

21Lenŋ e k Klistu kɑl k yen bin nbɑ kul nbɑ mɔk yɑɑk, nɑn yiikuo dɑnm kul nɑn yonmdɑnm kul ɑ. Ŋuɑ e mɔk sɑnn nbɑ gɑl yiikuo kul sɑnɑ nbɑ be mɔtɑɑnɑ nɑn yuo nbɑ bɑɑt.

22Yennu jii bonsiɑl kul ɑ yiikuo k tien Klistu nuu ni e. U jii ŋuɑ e ɑ wuu tie Klistu mɔtɑɑɔk niib kul ɑ Yonmdɑɑnɔ.

23Klistu mɔtɑɑɔk niib tie u gbɑnɑnt e k u be b ni cɑin, wɑɑ gbie Yennu nɑɑmi kul ni nɑ.

Jump to: Chapter 2 →