Lamentations 5

Malagasy 2004 (DIEM PROTESTANTA)

← Chapter 4 Jump to:

1TOMPO ô, tsarovy izay nanjo anay, diniho sy jereo ny fandatsana anay.

2Lasan’ny hafa ny tanindrazanay, lasan’ny vahiny ny tranonay.

3Efa tsy eo intsony ny rainay ka tonga kamboty izahay, ary mpitondratena ny reninay.

4Na dia ny lavaka fantsakanay aza dia tsy maintsy andoavanay vola vao azonay isotroana rano; ary vidînay koa ny kitainay vao azonay ampidirina.

5Avy eo an-damosina ny mpanenjika anay ka trotraka izahay fa tsy manam-pitsaharana.

6Nanolo-tanana tamin’i Ejipta sy i Asiria izahay mba ho voky hanina.

7Nanota ny razanay kanefa tsy eo intsony izy; fa izahay no mivesatra ny helony.

8Mpanompo no manapaka anay nefa tsy misy manafaka anay amin’ny fahefàny.

9Manao vy very ny ainay izahay hahazoan-kanina noho ireo dahalo mirongo fiadiana any an-taniefitra.

10Mahamay toy ny lafaoro ny hoditray satria ampijalijalian’ny mosary izahay.

11Misy manolana ireo vehivavy ao Tsiôna mbamin’ireo virijiny any an-tanànan’i Joda.

12Nahantona tamin’ny tanany ireo mpitondra; ary tsy mba nohajaina ny zokiolona.

13Ny zatovo mitondra ny vato fikosoham-bary; ary ny ankizy mivembena mivesatra ny hazo.

14Ny loholona nitsaha-nanao antenimiera; ary ny zatovo nitsaha-nitendry valiha.

15Nitsahatra ny hafalian’ny fonay; niova ho fisaonana ny dihin-karavoanay.

16Nianjera ny satroboninahitra teny an-dohanay; idiran-doza izahay satria efa nanota!

17Matoa rera-po izahay matoa jembin-dranomaso ny masonay,

18dia noho ny tendrombohitr’i Tsiôna efa lao ka nanjary fonenan’ny amboadia.

19Ianao kosa, TOMPO ô, dia mipetraka mandrakizay eo amin’ny sezafiandriananao; ary ny fanjakanao no maharitra amin’ny taonjato mifandimby.

20Koa ahoana no anadinoanao anay hatrany sy andaozanao anay mandritra ny andro-piainanay?

21TOMPO ô, ampivereno aminao izahay mba hiverenanay aminao tokoa; havaozy ny fiainanay ho toy ny fahiny.

22Sa holavinao tanteraka ve izahay na hiharan’ny hatezeranao mihoa-pampana?

← Chapter 4 Jump to: