John 21

Malagasy MRV 2011 (La Bible en Malgache)

← Chapter 20 Jump to:

1Taorianan’izany, dia niseho tamin’ny mpianatra indray Jesosy teo amoron’ny ranomasin’i Tiberiasy. Toy izao no fomba nisehoany:

2Niaraka i Simona Petera sy i Tomasy, izay atao hoe Kambana, teo koa i Natanaela, ilay avy tany Kana any Galilia, sy ireo zanak’i Zebedio ary mpianatra roa lahy hafa koa.

3Hoy i Simona Petera: Handeha hanarato aho. Hoy ireo taminy: Handeha hiaraka aminao koa izahay. Dia nandeha izy ka niditra an-tsambokely, nefa tamin’iny alina iny dia tsy nahazo na inona na inona akory izy ireo.

4Nony efa nazava ratsy ny andro dia nitsangana teo amoron-drano Jesosy, kanefa tsy fantatry ny mpianatra ho Jesosy.

5Dia hoy Jesosy tamin’izy ireo: Anaka, manan-kanina va ianareo? Dia namaly Azy izy ireo hoe: Tsia.

6Ary hoy Izy taminy: Alatsaho eo amin’ny sisiny havanan’ny sambokely ny haratonareo dia hahazo ianareo. Dia nalatsany ny harato ka tsy zakany nakarina noho ny habetsahan’ny hazandrano.

7Ary hoy ilay mpianatra izay tian’i Jesosy tamin’i Petera: Ny Tompo irỳ. Vao ren’i Simona Petera fa ny Tompo iny dia nisikinany ny akanjo ivelany, fa tsy niakanjo izy, dia nirotsaka tao amin’ny rano izy.

8Fa ireo mpianatra sasany dia nandeha tamin’ny sambokely ihany ka nisarika ny harato feno hazandrano; satria tsy lavitra ny tany izy fa tokony ho roanjato hakiho* ihany.

9Rehefa niakatra teo an-tanety izy ireo dia nahita afon’arina teo sy hazandrano teo amboniny ary mofo.

10Hoy Jesosy taminy: Mitondrà hazandrano amin’ireo vao azonareo teo.

11Dia niakatra i Simona Petera ka nosarihany ho eo an-tanety ny harato feno hazandrano vaventy, telo amby dimampolo amby zato; ary na dia be tahaka izany aza ny hazandrano dia tsy triatra ny harato.

12Hoy Jesosy taminy: Avia hisakafo. Fa tsy nisy mpianatra sahy nanontany Azy hoe: Iza moa Ianao? Satria fantany ihany fa ny Tompo io.

13Ary tonga Jesosy dia nandray ny mofo ka natolony azy, avy eo dia ny hazandrano indray.

14Izany no fanintelony nisehoan’i Jesosy tamin’ny mpianatra, rehefa nitsangana tamin’ny maty Izy.

15Rehefa nisakafo izy ireo dia hoy Jesosy tamin’i Simona Petera: Ry Simona, zanak’i Jaona, moa ny fitiavanao Ahy mihoatra noho ny fitiavan’ireto? Hoy izy Taminy: Eny, Tompoko; Ianao mahalala fa tia Anao aho. Dia hoy Izy taminy: Fahano ary ny ondrikeliko.

16Hoy indray Izy taminy fanindroany: Ry Simona, zanak’i Jaona, moa tia Ahy va ianao? Dia hoy izy Taminy: Eny, Tompoko; Ianao mahalala fa tia Anao aho. Dia hoy Izy taminy: Andraso ary ny ondriko.

17Hoy Izy fanintelony: Ry Simona, zanak’i Jaona, moa tia Ahy va ianao? Dia nalahelo i Petera satria Izy niteny intelo taminy hoe: Moa tia Ahy va ianao? Ka hoy izy Taminy: Tompoko, Ianao mahalala ny zavatra rehetra; fantatrao fa tia Anao aho. Hoy Jesosy taminy: Fahano ary ny ondriko.

18Lazaiko aminao marina dia marina tokoa: Raha mbola tanora ianao dia nisikina ka nandeha tamin’izay tianao; fa rehefa antitra kosa ianao dia hanatsotra ny tananao ary olon-kafa no hanikina anao ka hitondra anao amin’izay tsy tianao.

19Ary izany no nolazainy mba hanambarana ny fomban’ny fahafatesana izay hankalazany an’Andriamanitra. Ary rehefa voalazany izany dia hoy Izy taminy: Manaraha Ahy.

20Dia nitodika i Petera ka hitany manaraka azy ilay mpianatra tian’i Jesosy, dia ilay niankina tamin’ny tratrany tamin’ny fisakafoanana ka niteny hoe: Tompoko, iza no hamadika Anao?

21Rehefa nahita azy i Petera dia hoy izy: Tompoko, inona no ho amin’ity lehilahy ity?

22Hoy Jesosy taminy: Raha tiako hitoetra izy mandra-piaviko, ahoanao izany? Fa ianao manaraha Ahy.

23Ary niely tamin’ny rahalahy ny resaka fa tsy ho faty izany mpianatra izany; nefa Jesosy tsy nilaza taminy fa tsy ho faty izy, fa: Raha tiako haharitra izy mandra-piaviko, ahoanao izany?

24Izy no ilay mpianatra izay vavolombelon’izany sy nanoratra izany; ary fantatsika fa marina ny fanambaràny.

25Misy zavatra maro hafa koa izay nataon’i Jesosy, koa raha voasoratra tsirairay avokoa izany rehetra izany, ataoko fa izao tontolo izao aza tsy omby ny boky voasoratra.

← Chapter 20 Jump to: