1 Samuel 3

Maori (Paipera Tapu 2012)

← Chapter 2 Jump to: Chapter 4 →

1Nā, i te minita te tamaiti, a Hamuera, ki a Ihowā i te aroaro o Eri. Ā, he taonga mōmōhanga te kupu a Ihowā i aua rā; kāhore he whakakitenga nui.

2Nā, i taua wā kei te takoto a Eri i tōna wāhi, kua tīmata hoki ōna kanohi te atarua, kāhore hoki i āta kite.

3Nā, kāhore anō te rama a te Atua kia pirau noa, ā, i te takoto a Hamuera, he moe, i roto i te temepara o Ihowā, i te wāhi i tū ai te āka a te Atua.

4Nā, ka karanga a Ihowā ki a Hamuera. Ka mea tērā, “Tēnei ahau.”

5Nā, ka rere ia ki a Eri, ka mea, “Tēnei ahau; i karanga ake nā hoki koe ki ahau.” Nā, ka mea tērā, “Kīhai ahau i karanga; hoki atu ki te takoto.” Nā, haere ana ia, takoto ana.

6Nā, ka karanga anō hoki a Ihowā, “E Hamuera.” Ā, ka whakatika a Hamuera, haere ana ki a Eri, ka mea, “Tēnei ahau; i karanga ake nā hoki koe ki ahau.” Nā, ka mea tērā, “Kīhai ahau i karanga, e tāku tamaiti; hoki atu ki te takoto.”

7Nā, kāhore a Hamuera i mōhio noa ki a Ihowā, kāhore anō hoki te kupu a Ihowā i whakapuakina noatia ki a ia.

8Nā, ka karanga anō a Ihowā i a Hamuera, ko te tuatoru o ngā karangatanga. Ā, ka whakatika ia, ka haere ki a Eri, ka mea, “Tēnei ahau; i karanga ake nā hoki koe ki ahau.” Nā, ka mōhio a Eri ko Ihowā tērā i karanga rā ki te tamaiti.

9Nā, ka mea a Eri ki a Hamuera, “Haere ki te takoto; ā, ki te karanga ia ki a koe, ka mea ake koe, ‘Kōrero e Ihowā; e whakarongo ana hoki tāu pononga.’ ” Heoi, haere ana a Hamuera, ā, takoto ana i tōna wāhi.

10Nā, ka haere mai a Ihowā, ka tū, ka karanga, ka pērā me ērā karangatanga, “E Hamuera, e Hamuera.” Kātahi ka mea a Hamuera, “Kōrero; e whakarongo ana hoki tāu pononga.”

11Nā, ka mea a Ihowā ki a Hamuera: “Nanā, ka mahia e ahau he mahi i roto i a Īharaira, e pāorooro ai ngā taringa e rua o te hunga katoa e rangona ai.

12Ko te rangi tēnā e puta ake ai i ahau mō Eri ngā mea katoa i kōrerotia e ahau mō tōna whare; i te tīmatanga ā ki te mutunga.

13Kua mea atu nā hoki ahau ki a ia, ka whakawākia tōna whare e ahau ā ake ake, mō te kino i mōhiotia nā e ia; mō tā āna tama i mea ai, i tau ai he kanga ki a rāua, ā, kīhai ia i pēhi i a rāua.

14Nā reira kua oati ahau mō te whare o Eri, ‘E kore e tau te patunga tapu, te whakahere totokore rānei, hei pure mō te kino o te whare o Eri ā ake ake.’ ”

15Nā, takoto tonu a Hamuera ā tae noa ki te ata, nā, uakina ana e ia ngā tatau o te whare o Ihowā. Ā, i wehi a Hamuera ki te whakaatu ki a Eri i te mea i whakakitea mai ki a ia.

16Nā, ka karanga a Eri ki a Hamuera, ka mea, “E Hamuera, e tāku tamaiti.” Ā, ka mea tērā, “Tēnei ahau.”

17Nā, ka mea ia, “Tēnā koa te kupu i kōrerotia e Ihowā ki a koe? Kaua rā e hunā ki ahau; kia meatia tēnei e te Atua ki a koe, ētahi atu mea anō hoki, ki te hunā e koe i ahau tētahi o ngā kupu katoa i kōrerotia e ia ki a koe.”

18Nā, ka kōrerotia ngā kupu katoa e Hamuera ki a ia, kīhai hoki i hunā tētahi mea i a ia. Nā, ka mea tērā, “Nā Ihowā rā hoki; māna e mea tā tōna whakaaro i pai ai.”

19Nāwai ā, ka kaumātua a Hamuera, ā, noho ana a Ihowā ki a ia, kīhai hoki tētahi o āna kupu i tukua e ia kia taka ki te whenua.

20Ā, i mōhio a Īharaira katoa, o Rāna ā tae noa ki Peerehepa, kua whakapūmautia a Hamuera hei poropiti mā Ihowā.

21Ā, i puta mai anō a Ihowā i Hiro; i whakaatu anō hoki a Ihowā i a ia ki a Hamuera i Hiro, he mea kōrero mai nā Ihowā.

← Chapter 2 Jump to: Chapter 4 →