2 Kings 1

Maori (Paipera Tapu 2012)

Jump to: Chapter 2 →

1Nā, i muri i te matenga o Āhapa ka whakakeke a Moapa ki a Īharaira.

2Nā, ka taka iho a Ahatia i te taiepa rīpekapeka i tōna rūma i runga, i Hamaria, ā, ka takoto mate. Nā, ka tono tāngata ia, ka mea ki a rātou, “Tīkina, uia ki a Paara-Hepupa atua o Ekerono, e ora rānei ahau i tēnei mate.”

3Otiia i mea te anahera a Ihowā ki a Irāia Tihipi, “Whakatika, haere ki runga, ki te whakatau i ngā tāngata a te kīngi o Hamaria, mea atu ki a rātou, ‘He kore Atua ianei nō Īharaira i haere ai koutou ki te ui ki a Paara-Hepupa atua o Ekerono?’

4Nō reira ko te kupu tēnei a Ihowā, ‘Ko te moenga i pikitia nā e koe, e kore koe e heke iho i reira, engari ko te mate kau mōu.’ ” Nā, haere ana a Irāia.

5Nā, i te hokinga atu o ngā tāngata ki a ia, ka mea ia ki a rātou, “He aha koutou i hoki mai ai?”

6Nā, ka mea rātou ki a ia, “I haere mai tētahi tangata ki te whakatau i a mātou, ā, ka mea ki a mātou, ‘Haere, hoki atu ki te kīngi i tonoa mai ai koutou, mea atu ki a ia: “Ko te kupu tēnei a Ihowā: He kore Atua nō Īharaira i tono tāngata ai koe ki te ui ki a Paara-Hepupa atua o Ekerono? Nā, ko te moenga i pikitia nā e koe, e kore koe e heke iho i reira; engari ko te mate kau mōu.” ’ ”

7Nā, ka mea ia ki a rātou, “Tēnā koa te āhua o taua tangata i haere mai nā ki te whakatau i a koutou i kōrero nā i aua kupu ki a koutou?”

8Nā, ka mea rātou ki a ia, “He tangata pūhuruhuru, he whītiki hiako te whītiki o tōna hope.” Nā, ka mea ia, “Ko Irāia Tihipi tēnā.”

9Kātahi ia ka unga i tētahi rangatira rima tekau me tāna rima tekau. Nā, haere ana ia ki a ia; nā, i te tihi tērā o te maunga e noho ana. Ā, ka mea ia ki a ia, “E te tangata a te Atua, i mea mai te kīngi, ‘Heke iho!’ ”

10Nā, ka whakahoki a Irāia, ka mea ki te rangatira rima tekau, “Ki te mea he tangata ahau nā te Atua, kia heke iho he ahi i te rangi hei kai i a koutou ko tāu rima tekau.” Nā, heke iho ana he ahi i te rangi, pau ake ia me tāna rima tekau.

11Nā, ka ungā anō e ia tētahi atu rangatira rima tekau me tāna rima tekau. Ā, ka oho tērā, ka mea atu ki a ia, “E te tangata a te Atua, ko te kupu tēnei a te kīngi, ‘Hohoro te heke iho!’ ”

12Nā, ka whakahoki a Irāia, ka mea ki a rātou, “Ki te mea he tangata ahau nā te Atua, kia heke iho he ahi i te rangi hei kai i a koutou ko tāu rima tekau.” Ko te hekenga iho o te ahi a te Atua i te rangi, pau ake ia me tāna rima tekau.

13Nā, ka ungā anō e ia, ka tuatorutia, he rangatira rima tekau me tāna rima tekau. Nā, haere ana te tuatoru o ngā rangatira rima tekau, ka tae, ka tuku i ngā turi ki raro, ki te aroaro o Irāia, ka tangi ki a ia, ka mea ki a ia, “E te tangata a te Atua, kia nui ki tōu whakaaro tōku wairua me ngā wairua o ēnei pononga e rima tekau āu.

14Nanā, i heke iho he ahi i te rangi, ā, pau ake ngā rangatira tokorua o ngā rima tekau ō mua ake nei me ā rāua rima tekau; nā, kia nui tōku wairua ki tōu whakaaro.”

15Nā, ka mea te anahera a Ihowā ki a Irāia, “Heke atu kōrua, kaua e wehi i a ia.” Nā, whakatika ana ia, heke tahi ana rāua ki te kīngi.

16Nā, ka mea tērā ki a ia, “Ko te kupu tēnei a Ihowā: Nā kua unga tāngata nā koe ki te ui ki a Paara-Hepupa atua o Ekerono, he kore Atua ianei nō Īharaira hei uinga māu i tāna kupu? Nā reira, e kore koe e heke iho i te moenga i pikitia nā e koe, engari ko te mate kau mōu.”

17Heoi mate iho ia, i rite tonu ki te kupu a Ihowā i kōrerotia e Irāia. Ā, ko Iehorama te kīngi i muri i a ia, i te rua o ngā tau o Iehorama tama a Iehohāpata kīngi o Hūrā; kāhore hoki āna tama.

18Nā, ko ērā atu mahi a Ahatia i mea ai ia, kāhore ianei i tuhituhia ki te Pukapuka o ngā meatanga o Ngā Rā o Ngā Kīngi o Īharaira?

Jump to: Chapter 2 →