Ecclesiastes 9

Maori (Paipera Tapu 2012)

← Chapter 8 Jump to: Chapter 10 →

1Nā, ko tēnei katoa he mea whakaaro nā tōku ngākau, arā kia āta tirotirohia tēnei katoa; ko te hunga tika, ko te hunga whakaaro nui, me ā rātou mahi, kei roto i te ringa o te Atua. E kore te tangata e mōhio he aroha rānei, he kino rānei; kei tō rātou aroaro ngā mea katoa.

2He rite tonu te pānga mai o ngā mea katoa ki ngā tāngata katoa; kotahi tonu te mea e pā ana ki te tangata tika, ki te tangata kino; ki te pai, ki te mā, ki te poke; ki te tangata i te patunga tapu, ki te tangata kāhore nei āna patunga tapu. Ko te tangata pai rite tonu ki te tangata hara, ko te tangata e oati ana, ki te tangata e wehi ana i te oati.

3He hē tēnei i roto i ngā mea katoa e meatia ana i raro i te rā, kotahi tonu te mea e pā ana ki te katoa. Ko te ngākau anō hoki o ngā tama a te tangata kī tonu i te kino; kei roto hoki te haurangi i ō rātou ngākau i a rātou e ora ana; ā muri iho ka riro rātou ki ngā tūpāpaku.

4Ko te tangata hoki e tūhono ana ki te hunga ora katoa ka whai tūmanakohanga; pai atu hoki te kurī ora i te raiona mate.

5E mōhio ana hoki te hunga ora tērā rātou e mate; ko ngā tūpāpaku ia, kāhore ō rātou mōhio ki tētahi mea, kāhore ake hoki he utu i a rātou; ka warewaretia hoki te mahara ki a rātou.

6Ko tō rātou aroha hoki, ko tō rātou riri, ko tō rātou hae, kua kore noa ake; kāhore hoki he wāhi i a rātou ā ake ake, o ngā mea katoa e meatia ana i raro i te rā.

7Haere, kainga tāu kai i runga i te hari, inumia hoki tāu wāina i runga i te ngākau hari; nō te mea kua manako noa kē te Atua ki āu mahi.

8I ngā wā katoa kia mā ōu kākahu; kaua hoki e whakakāhoretia te hinu mō tōu māhunga.

9Kia ora tōu ngākau i tōu hoa wahine e aroha nā koe i ngā rā katoa o tōu oranga horihori, i hōmai nei ki a koe i raro i te rā, i ngā rā katoa o tōu horihori. Ko te wāhi hoki tēnā mōu i tēnei ao, i tōu māuiui anō hoki e māuiui nā koe i raro i te rā.

10Ko ngā mea katoa e kitea e tōu ringa kia mahia, kia puta tōu uaua ki te mahi; kāhore hoki he mahi, kāhore he tikanga, kāhore he mātauranga, kāhore he whakaaro nui i te rēinga, i te wāhi ka haere atu nā koe ki reira.

11I hoki ahau, ā, i kite ahau i raro i te rā, ehara i te mea ko te hunga tere e puta i te oma, ko te hunga mārohirohi rānei e toa i te pakanga, ko te hunga whakaaro nui rānei e whiwhi i te taro, ko te hunga mōhio rānei e whiwhi i te taonga, ko te hunga tohunga rānei e manakohia, engari nā te wā, nā te tūpono noa, i hōmai ki a rātou katoa.

12Kāhore hoki te tangata e mōhio ki te wā mōna; he rite ki ngā ika e haoa ana ki te kupenga nanakia, ki ngā manu hoki e mau ana i te māhanga, he pērā anō hoki ngā tama a te tangata, e māhangatia ana i te wā whakarihariha, ina puta whakarere mai ki a rātou.

13I kitea anō e ahau te whakaaro nui pēnei i raro i te rā, ā, he mea nui ki ahau.

14Tērā tētahi pā iti, me ōna tāngata torutoru i roto. Nā, ka haere mai tētahi kīngi nui ki te tū i reira, whakapaea ana e ia, hangā ana e ia ētahi pourewa nunui hei tatau atu ki reira.

15Nā, i kitea tētahi tangata rawakore, whakaaro nui, i roto, ā, nāna, nā tōna whakaaro nui, ka ora te pā. Otiia, kīhai tētahi tangata i mahara ki taua tangata rawakore.

16Nā, ko tāku kīanga ake, “Engari rawa te whakaaro nui i te kaha; heoi whakahāweatia iho ngā whakaaro nui o te rawakore, kīhai hoki āna kupu i whakarangona.”

17Ko ngā kupu a te hunga whakaaro nui, he mea āta kōrero, e rangona nuitia ake ana i te hāmama a te rangatira o ngā wairangi.

18Pai ake te whakaaro nui i ngā rākau o te riri; otiia kotahi noa te tangata hara, he nui tāna pai e takakino ai.

← Chapter 8 Jump to: Chapter 10 →

Recommended Reading

Commentary Ecclesiastes Commentaries → Devotional Ecclesiastes Devotional Guide → Get This Bible Maori (Paipera Tapu ) Study Bible →