Jonah 2

Maori (Paipera Tapu 2012)

← Chapter 1 Jump to: Chapter 3 →

1Kātahi a Hona ka īnoi ki a Ihowā, ki tōna Atua, i roto i te kōpū o te ika.

2I mea ia: “I karanga ahau, he ngākau mamae nōku, ki a Ihowā; ā, whakahoki mai ana ia ki ahau; i tangi atu ahau i roto i te kōpū o te rēinga, ā, whakarongo ana koe ki tōku reo.

3I makā hoki ahau e koe ki te rire, ki waenga moana, ā, karapotia ana ahau e ngā roma; tika ana āu tūātea katoa me āu ngaru i runga i ahau.

4Nā, ka mea ahau, ‘Kua oti ahau te pei i mua i ōu kanohi; otiia tērā ahau e titiro atu anō ki tōu temepara tapu.’

5Karapotia ana ahau e te wai, tae tonu iho ki te wairua; i ōku taha katoa te rire ā taka noa; he rimu ngā tākai o tōku māhunga.

6I haere ahau ki raro ki ngā take o ngā maunga; kopia ana ahau e te whenua me ōna tūtaki ake ake; heoi whakaputaina ake ana e koe tōku ora i roto i te poka, e Ihowā, e tōku Atua.

7“I te hemonga o tōku wairua i roto i ahau, i mahara ahau ki a Ihowā; i tae atu anō tāku īnoi ki a koe ki tōu temepara tapu.

8“Ko te hunga e pupuri ana i ngā mea tekateka noa e whakarere ana i te atawhai mō rātou.

9Ko ahau ia ka mea patunga tapu ki a koe i runga i te reo whakawhetai; ka whakamanā e ahau āku kupu taurangi. Nā Ihowā te whakaoranga!”

10Nā, ka kōrero a Ihowā ki te ika, ā, ka ruakina e tērā a Hona ki te wāhi maroke.

← Chapter 1 Jump to: Chapter 3 →