Nahum 2

Maori (Paipera Tapu 2012)

← Chapter 1 Jump to: Chapter 3 →

1Kua tae ake te kaiwāwāhi ki tōu aroaro. Tiakina te pā, tūteia te ara, kia kaha tōu hope, kia ū rawa tōu kaha.

2Nō te mea ka whakahokia mai e Ihowā te korōria o Hākopa, me te korōria o Īharaira; kua takoto kau hoki rātou i ngā kaiwhakatakoto kau, kua hē anō ā rātou manga wāina i a rātou.

3Kua oti te whakangungu rākau a āna mārohirohi te whakawhero, he ngangana te kākahu o ngā māia. Kei te rino e kanapa ana te rite o ngā hāriata i te rā e takatū ai ia, ā, ko ngā tao wiri rawa.

4Ngana tonu ngā hāriata i ngā ara, taututetute ana ki a rātou anō i ngā waharoa; ko tō rātou āhua ānō he roherohe, e rere ana me he uira.

5Ka mahara ia ki āna metararahi; ka tapatu rātou i a rātou e haere ana; ka hohoro rātou ki tō reira taiepa, ā, ka rite te ārai.

6Ka whakatuwheratia ngā kūwaha o ngā awa, ka papahoro te whare kīngi.

7Nā, kua tū tahanga a Huhapa, kua maua atu ia, ā, ka tangi āna pononga wāhine, ko te reo koia anō kei tō te kūkupa, ko ō rātou uma hei timipera mā rātou.

8Ko Ninewe ia, ko tōna rite mai onamata, kei te puna wai. Heoi, ka tahuti rātou; ka karanga, “E tū, e tū!” Heoi, e kore tētahi e titiro whakamuri.

9Pāhuatia te hiriwa, pāhuatia te kōura; kāhore hoki he mutunga o ngā rawa, o te korōria i roto i ngā taonga āhuareka katoa.

10Kua takoto kau ia, kāhore āna mea, mōtī rawa! Harotu kau te ngākau, kei te āki anō ngā turi ki a rāua, he nui te mamae kei ngā hope katoa, kua kōmā ngā mata o rātou katoa.

11Kei hea te nohoanga o ngā raiona, te wāhi kai a ngā kūao raiona, te wāhi i hāereere ai te raiona, me te raiona kātua, me te kūao raiona, tē ai he kaiwhakawehi?

12I haehaea mai e te raiona he mea e mākona ai āna kūao, nōtia ana e ia te kakī hei mea mā āna raiona uha, whakakīia ana e ia ōna rua ki te kai, ōna nohoanga hoki ki te mea i haehaea.

13“Nanā, hei hoariri tēnei ahau mōu,” e ai tā Ihowā o ngā mano, “ka tahuna anō e ahau ana hāriata i roto i te paowa, ka pau āu kūao raiona i te hoari. Ka kore i ahau he haehaenga māu i runga i te whenua, e kore anō te reo o āu karere e rangona ā muri ake nei.”

← Chapter 1 Jump to: Chapter 3 →