Proverbs 28

Maori (Paipera Tapu 2012)

← Chapter 27 Jump to: Chapter 29 →

1E rere ana te hunga kino i te mea kāhore he kaiwhai; ko te tangata tika anō ia, ānō he raiona te māia.

2He hē nō tētahi whenua i tokomaha ai ōna rangatira; nā, kia ai he tangata e mahara ana, e mātau ana, ka mau roa ai tōna āhua.

3Ko te tangata rawakore e tūkino ana i ngā ware, ko tōna rite kei te ua tā e kore ai te kai.

4Ko te hunga e whakarere ana i te ture, he whakamoemiti tā rātou ki te tangata kino; ko tā ngā kaipupuri ia o te ture he ngangare ki a rātou.

5E kore te hunga kino e mōhio ki te whakawā: ko te hunga ia e rapu ana i a Ihowā, ka mōhio rātou ki ngā mea katoa.

6He pai kē te rawakore e haere ana i runga i tōna tapatahi, i te tangata he parori kē ōna ara, ahakoa he whai taonga ia.

7Ko te tangata e pupuri ana i te ture, he tamaiti mōhio ia; engari ko te tangata whakahoa ki te hunga kakai, ka whakamā tōna pāpā i a ia.

8Ko te tangata e whakanui ana i ōna rawa ki te moni whakatupu, ki te whakapiki utu, e kohia ana e ia ērā mā te tangata e atawhaitia ai te rawakore.

9Ko te tangata e tahuri kē ana tōna taringa, ā, kāhore e rongo ki te ture, ko tāna īnoi nei ānō he mea whakarihariha.

10Ko te tangata i meinga ai te hunga tika, kia kotiti kē ki te ara hē, ka taka a ia anō ki tāna ake poka; ka whiwhi ia te hunga ngākau tapatahi ki te pai.

11Ki te whakaaro a te tangata taonga he nui tōna whakaaro mōhio; otiia e rapua ana tāna e te rawakore whai whakaaro.

12Nui atu te ātaahua, ina koa te hunga tika; engari ki te ara te hunga kino, ka huna ngā tāngata i a rātou.

13Ko te tangata e hīpoki ana i ōna hē, e kore tāna e kake; ko te tangata ia e whāki ana, ā, e whakarere ana, ka tohungia.

14Ka hari te tangata e wehi tonu ana; ko te tangata ia e whakapakeke ana i tōna ngākau, ka taka ki te kino.

15E rite ana ki te raiona e hāmama ana, ki te pea e kōpikopiko ana, te tangata kino e kīngi ana ki te iwi rawakore.

16Ko te rangatira kore whakaaro he nui anō tāna tūkino; ko te tangata ia e kino ana ki te apo ka roa ōna rā.

17Ko te tangata e waha ana i te toto o te tangata, ka rere ia ki roto ki te rua; kaua tētahi e pupuri i a ia.

18Ko te tangata he tapatahi nei te haere, ka ora; ko te tangata ia he parori kē ōna ara, hinga tonu iho.

19Ko te tangata e ngaki ana i tōna oneone, ka mākona i te taro; ko te tangata ia e whai ana i te hunga wairangi, ka whiwhi nui ki te rawakore.

20Ko te tangata pono, ka nui ngā manaaki mōna; ko te tangata ia e hīkaka ana ki te mea taonga, e kore ia e kore te whiwhi i te hē.

21Ko te whakapai kanohi ehara i te mea pai – ehara anō hoki i te mea pai kia hē te tangata mō te kongakonga taro.

22Ko te tangata he kino tōna kanohi e tākare tonu ana ki te taonga; kāhore hoki ia e whakaaro ka tae mai te kore o te rawa ki a ia.

23Ko te tangata i rīria ai te hē o tētahi, ka nui atu te manako ki a ia i muri iho, i te manako ki te tangata i whakapati nei tōna arero.

24Ko te tangata e pāhua ana i tōna pāpā, i tōna whaea, ā, e kī ana, “Ehara i te hē,” he hoa ia nō te kaiwhakangaro.

25Ko tā te tangata ngākau apo he whakapātari pakanga; ko te tangata ia e okioki ana ki a Ihowā ka tetere.

26He kūware te tangata e whakawhirinaki ana ki tōna ake ngākau; ko te tangata ia e haere ana i runga i te whakaaro nui, ka mawhiti.

27Ko te tangata e hoatu ana ki te rawakore, e kore ia e hapa; ko te tangata ia e kaupare ana i ōna kanohi, ka maha ngā kanga mōna.

28Ka ara te hunga kino, ka huna ngā tāngata i a rātou; nā, ki te ngaro rātou, ka tupu te hunga tika.

← Chapter 27 Jump to: Chapter 29 →